ශ්රීමද්වාල්මීකීය රාමායණේ අරණ්යකාංඩම් ।
අථ විංශස්සර්ගඃ ।
තතශ්ශූර්පණඛා ඝෝරා රාඝවාශ්රමමාගතා ।
රාක්ෂසානාචචක්ෂේ තෞ භ්රාතරෞ සහ සීතයා ॥ 1 ॥
තේ රාමං පර්ණශාලායාමුපවිෂ්ටං මහාබලම් ।
දදෘශුස්සීතයා සාර්ධං වෛදේහ්යා ලක්ෂ්මණේන ච ॥ 2 ॥
තාංදෘෂ්ට්වා රාඝවශ්ශ්රීමානාගතාංස්තාං ච රාක්ෂසීම් ।
අබ්රවීද්භ්රාතරං රාමෝ ලක්ෂ්මණං දීප්තතේජසම් ॥ 3 ॥
මුහූර්තං භව සෞමිත්රේ සීතායාඃ ප්රත්යනංතරඃ ।
ඉමානස්යා වධිෂ්යාමි පදවීමාගතානිහ ॥ 4 ॥
වාක්යමේතත්තතශ්ශ්රුත්වා රාමස්ය විදිතාත්මනඃ ।
තථේති ලක්ෂ්මණෝ වාක්යං රාමස්ය ප්රත්යපූජයත් ॥ 5 ॥
රාඝවෝऽපි මහච්චාපං චාමීකරවිභූෂිතම් ।
චකාර සජ්යං ධර්මාත්මා තානි රක්ෂාංසි චාබ්රවීත් ॥ 6 ॥
පුත්රෞ දශරථස්යාවාං භ්රාතරෞ රාමලක්ෂ්මණෞ ।
ප්රවිෂ්ටෞ සීතයා සාර්ධං දුශ්චරං දංඩකාවනම් ॥ 7 ॥
ඵලමූලාශනෞ දාංතෞ තාපසෞ ධර්මචාරිණෞ ।
වසංතෞ දංඩකාරණ්යේ කිමර්ථමුපහිංසථ ॥ 8 ॥
යුෂ්මාන්පාපාත්මකාන්හංතුං විප්රකාරාන්මහාහවේ ।
ඍෂීණාං තු නියෝගේන ප්රාප්තෝऽහං සශරායුධඃ ॥ 9 ॥
තිෂ්ඨතෛවාත්ර සංතුෂ්ටා නෝපාවර්තිතුමර්හථ ।
යදි ප්රාණෛරිහාර්ථෝ වා නිවර්තධ්වං නිශාචරාඃ ॥ 10 ॥
තස්ය තද්වචනං ශ්රුත්වා රාක්ෂසාස්තේ චතුර්දශ ।
ඌචුර්වාචං සුසංක්රුද්ධා බ්රහ්මඝ්නාශ්ශූලපාණයඃ ॥ 11 ॥
ක්රෝධමුත්පාද්ය නෝ භර්තුඃ ඛරස්ය සුමහාත්මනඃ ।
ත්වමේව හාස්යසේ ප්රාණානද්යාස්මාභිර්හතෝ යුධි ॥ 12 ॥
කා හි තේ ශක්තිරේකස්ය බහූනාං රණමූර්ධනී ।
අස්මාකමග්රතඃ ස්ථාතුං කිං පුනර්යෝද්දුමාහවේ ॥ 13 ॥
ඒහි බාහුප්රයුක්තෛර්නඃ පරිඝෛශ්ශූලපට්ටිසෛඃ ।
ප්රාණාංස්ත්යක්ෂසි වීර්යං ච ධනුශ්ච කරපීඩිතම් ॥ 14 ॥
ඉත්යේවමුක්ත්වා සංකෘද්ධා රාක්ෂසාස්තේ චතුර්දශ ।
චික්ෂිපුස්තානි ශූලානි රාඝවං ප්රති දුර්ජයම් ॥ 15 ॥
තානි ශූලානි කාකුත්ස්ථස්සමස්තානි චතුර්දශ ।
තාවද්භිරේව චිච්ඡේද ශරෛඃ කාංචනභූෂණෛඃ ॥ 16 ॥
තතඃ පශ්චාන්මහාතේජා නාරාචාන්සූර්යසන්නිභාන් ।
ජග්රාහ පරමක්රුද්ධශ්චතුර්දශ ශිලාශිතාන් ॥ 17 ॥
ගෘහීත්වා ධනුරායම්ය ලක්ෂ්යානුද්දිශ්ය රාක්ෂසාන් ।
මුමෝච රාඝවෝ බාණාන්වජ්රානිව ශතක්රතුඃ ॥ 18 ॥
රුක්මපුංඛාශ්ච විශිඛා දීප්තා හේමවිභූෂිතාඃ ।
තේ භිත්ත්වා රක්ෂසාං වේගාද්වක්ෂාංසි රුධිරාප්ලුතාඃ ॥ 19 ॥
විනිෂ්පේතුස්තදා භූමෞ න්යමජ්ජංතාශනිස්වනාඃ ।
තේ භින්නහෘදයා භූමෞ ඡින්නමූලා ඉව ද්රුමාඃ ॥ 20 ॥
නිපේතුශ්ශෝණිතාර්ද්රාංගා විකෘතා විගතාසවඃ ।
තාන් දෘෂ්ට්වා පතිතාන්භූමෞ රාක්ෂසී ක්රෝධමූර්ඡිතා ॥ 21 ॥
පරිත්රස්තා පුනස්තත්ර ව්යසෘජද්භෛරවස්වනාන් ।
උපගම්ය ඛරං සා තු කිංචිත්සංශුෂ්කශෝණිතා ॥ 22 ॥
පපාත පුනරේවාර්තා සනිර්යාසේව සල්ලකී ।
පපාත පුනරේවාර්තා සනිර්යාසේව සල්ලකී ॥ 23 ॥
භ්රාතුස්සමීපේ ශෝකාර්තා සසර්ජ නිනදං මුහුඃ ॥ 24 ॥
සස්වරං මුමුචේ බාෂ්පං විෂණ්ණවදනා තදා ।
නිපාතිතාන් දෘශ්ය රණේ තු රාක්ෂසාන් ප්රධාවිතා ශූර්පණඛා පුනස්තතඃ ।
වධං ච තේෂාං නිඛිලේන රක්ෂසාං ශශංස සර්වං භගිනී ඛරස්ය සා ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ විංශස්සර්ගඃ ॥
