ශ්රීමද්වාල්මීකීය රාමායණේ අරණ්යකාංඩම් ।
අථ ද්වාවිංශස්සර්ගඃ ।
ඒවමාධර්ෂිතශ්ශූරශ්ශූර්පණඛ්යා ඛරස්තතඃ ।
උවාච රක්ෂසාං මධ්යේ ඛරඃ ඛරතරං වචඃ ॥ 1 ॥
තවාවමානප්රභවඃ ක්රෝධෝऽයමතුලෝ මම ।
න ශක්යතේ ධාරයිතුං ලවණාංභ ඉවෝල්බණම් ॥ 2 ॥
න රාමං ගණයේ වීර්යාන්මානුෂං ක්ෂීණජීවිතම් ।
ආත්මදුශ්චරිතෛඃ ප්රාණාන්හතෝයෝऽද්ය විමෝක්ෂ්යතේ ॥ 3 ॥
බාෂ්පස්සංහ්රියතාමේෂ සංභ්රමශ්ච විමුච්යතාම් ।
අහං රාමං සහ භ්රාත්රා නයාමි යමසාදනම් ॥ 4 ॥
පරශ්වථහතස්යාද්ය මංදප්රාණස්ය සංයුගේ ।
රාමස්ය රුධිරං රක්තමුෂ්ණං පාස්යසි රාක්ෂසි ॥ 5 ॥
සා ප්රහෘෂ්ටා වචශ්ශ්රුත්වා ඛරස්ය වදනාච්ච්යුතම් ।
ප්රශශංස පුනර්මෞර්ඛ්යාද්භ්රාතරං රක්ෂසාං වරම් ॥ 6 ॥
තයා පරුෂිතඃ පූර්වං පුනරේව ප්රශංසිතඃ ।
අබ්රවීද්දූෂණං නාම ඛරස්සේනාපතිං තදා ॥ 7 ॥
චතුර්දශ සහස්රාණි මම චිත්තානුවර්තිනාම් ।
රක්ෂසාං භීමවේගානාං සමරේෂ්වනිවර්තිනාම් ॥ 8 ॥
නීලජීමූතවර්ණානාං ඝෝරාණාං ක්රූරකර්මණාම් ।
ලෝකහිංසාවිහාරාණාං බලිනාමුග්රතේජසාම් ॥ 9 ॥
තේෂාං ශාර්දූලදර්පාණාං මහාස්යානාං මහෞජසාම් ।
සර්වෝද්යෝග මුදීර්ණානාං රක්ෂසාං සෞම්ය කාරය ॥ 10 ॥
උපස්ථාපය මේ ක්ෂිප්රං රථං සෞම්ය ධනූංෂි ච ।
ශරාංශ්චිත්රාංශ්ච ඛංගාංශ්ච ශක්තීශ්ච විවිධාශ්ශිතාඃ ॥ 11 ॥
අග්රේ නිර්යාතුමිච්ඡාමි පෞලස්ත්යානාං මහාත්මනාම් ।
වධාර්ථං දුර්විනීතස්ය රාමස්ය රණකෝවිදඃ ॥ 12 ॥
ඉති තස්ය බ්රුවාණස්ය සූර්යවර්ණං මහාරථම් ।
සදශ්වෛශ්ශබලෛර්යුක්තමාචචක්ෂේऽථ දූෂණඃ ॥ 13 ॥
තං මේරුශිඛරාකාරං තප්තකාංචනභූෂණම් ।
හේමචක්රමසංබාධං වෛදූර්යමයකූබරම් ॥ 14 ॥
මත්ස්යෛඃ පුෂ්පෛර්ද්රුමෛශ්ශෛලෛශ්චංද්රසූර්යෛශ්ච කාංචනෛඃ ।
මංගලෛඃ පක්ෂිසංඝෛශ්ච තාරාභිරභිසංවෘතම් ॥ 15 ॥
ධ්වජනිස්ත්රිංශසංපන්නං කිංකිණීකවිරාජිතම් ।
සදශ්වයුක්තං සෝऽමර්ෂාදාරුරෝහ ඛරෝ රථම් ॥ 16 ॥
නිශාම්ය තු රථස්ථං තං රාක්ෂසා භීමවික්රමාඃ ।
තස්ථුස්සංපරිවාර්යෛනං දූෂණං ච මහාබලම් ॥ 17 ॥
ඛරස්තු තාන්මහේෂ්වාසාන්ඝෝරවර්මායුධධ්වජාන් ।
නිර්යාතේත්යබ්රවීද්දෘෂ්ට්වා රථස්ථස්සර්වරාක්ෂසාන් ॥ 18 ॥
තතස්තද් රාක්ෂසං සෛන්යං ඝෝරචර්මායුධධ්වජම් ।
නිර්ජගාම ජනස්ථානාන්මහානාදං මහාජවම් ॥ 19 ॥
මුද්ගරෛඃ පට්ටිසෛශ්ශූලෛස්සුතීක්ෂ්ණෛශ්ච පරශ්වධෛඃ ।
ඛංගෛශ්චක්රෛශ්ච හස්තස්ථෛර්භ්රාජමානෛශ්ච තෝමරෛඃ ॥ 20 ॥
ශක්තිභිඃ පරිඝෛර්ඝෝරෛරතිමාත්රෛශ්ච කාර්මුකෛඃ ।
ගදාසිමුසලෛර්වජ්රෛර්ගෘහීතෛර්භීමදර්ශනෛඃ ॥ 21 ॥
රාක්ෂසානාං සුඝෝරාණාං සහස්රාණි චතුර්දශ ।
නිර්යාතානි ජනස්ථානාත්ඛරචිත්තානුවර්තිනාම් ॥ 22 ॥
තාංස්ත්වභිද්රවතෝ දෘෂ්ට්වා රාක්ෂසාන් භීමවික්රමාන් ।
ඛරස්යාපි රථඃ කිංචිජ්ජගාම තදනංතරම් ॥ 23 ॥
තතස්තාංඡබලානශ්වාස්තප්තකාංචනභූෂිතාන් ।
ඛරස්ය මතිමාජ්ඤාය සාරථිස්සමචෝදයත් ॥ 24 ॥
ස චෝදිතෝ රථශ්ශීඝ්රං ඛරස්ය රිපුඝාතිනඃ ।
ශබ්දේනාපූරයාමාස දිශශ්ච ප්රදිශස්තදා ॥ 25 ॥
ප්රවෘද්ධමන්යුස්තු ඛරඃ ඛරස්වනෝ රිපෝර්වධාර්ථං ත්වරිතෝ යථාංතකඃ ।
අචූචුදත්සාරථිමුන්නදන්ඝනං මහාබලෝ මේඝ ඉවාශ්මවර්ෂවාන් ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ද්වාවිංශස්සර්ගඃ ॥
