ශ්රීමද්වාල්මීකීය රාමායණේ කිෂ්කිංධාකාංඩම් ।
අථ තෘතීයස්සර්ගඃ ।
වචෝ විජ්ඤාය හනුමාන් සුග්රීවස්ය මහාත්මනඃ ।
පර්වතාදෘශ්යමූකාත්තු පුප්ලුවේ යත්ර රාඝවෞ ॥ 1 ॥
කපිරූපං පරිත්යජ්ය හනුමාන්මාරුතාත්මජඃ ।
භික්ෂුරූපං තතෝ භේජේ ශඨබුද්ධිතයා කපිඃ ॥ 2 ॥
තතස්ස හනුමාන්වාචා ශ්ලක්ෂ්ණයා සුමනෝජ්ඤයා ।
විනීතවදුපාගම්ය රාඝවෞ ප්රණිපත්ය ච ॥ 3 ॥
ආබභාෂේ තදා වීරෞ යථාවත්ප්රශශංස ච ।
සංපූජ්ය විධිවද්වීරෞ හනුමාන්මාරුතාත්මජඃ ।
උවාච කාමතෝ වාක්යං මෘදු සත්යපරාක්රමෞ ॥ 4 ॥
රාජර්ෂිදේවප්රතිමෞ තාපසෞ සංශිතව්රතෞ ।
දේශං කථමිමං ප්රාප්තෞ භවංතෞ වරවර්ණිනෞ ॥ 5 ॥
ත්රාසයංතෞ මෘගගණානන්යාංශ්ච වනචාරිණඃ ॥ 6 ॥
පංපාතීරරුහාන්වෘක්ෂාන් වීක්ෂමාණෞ සමංතතඃ ।
ඉමාං නදීං ශුභජලාං ශෝභයංතෞ තපස්විනෞ ॥ 7 ॥
ධෛර්යවංතෞ සුවර්ණාභෞ කෞ යුවාං චීරවාසසෞ ।
නිඃශ්වසංතෞ වරභුජෞ පීඩයංතාවිමාඃ ප්රජාඃ ॥ 8 ॥
සිංහවිප්රේක්ෂිතෞ වීරෞ මහාබලවික්රමෞ ।
ශක්රචාපනිභේ චාපේ ගෘහීත්වා ශත්රුසූදනෞ ॥ 9 ॥
ශ්රීමංතෞ රූපසංපන්නෞ වෘෂභශ්රේෂ්ඨවික්රමෞ ।
හස්තිහස්තෝපමභුජෞ ද්යුතිමංතෞ නරර්ෂභෞ ॥ 10 ॥
ප්රභයා පර්වතේංද්රෝऽයං යුවයෝරවභාසිතඃ ।
රාජ්යාර්හාවමරප්රඛ්යෞ කථං දේශමිහාගතෞ ॥ 11 ॥
පද්මපත්රේක්ෂණෞ වීරෞ ජටාමංඩලධාරිණෞ ।
අන්යෝන්යසදෘශෞ වීරෞ දේවලෝකාදිවාගතෞ ॥ 12 ॥
යදෘච්ඡයේව සංප්රාප්තෞ චංද්රසූර්යෞ වසුංධරාම් ।
විශාලවක්ෂසෞ වීරෞ මානුෂෞ දේවරූපිණෞ ॥ 13 ॥
සිංහස්කංධෞ මහෝත්සාහෞ සමදාවිව ගෝවෘෂෞ ।
ආයතාශ්ච සුවෘත්තාශ්ච බාහවඃ පරිඝෝපමාඃ ।
සර්වභූෂණභූෂාර්හාඃ කිමර්ථං න විභූෂිතාඃ ॥ 14 ॥
උභෞ යෝග්යාවහං මන්යේ රක්ෂිතුං පෘථිවීමිමාම් ।
සසාගරවනාං කෘත්ස්නාං විංධ්යමේරුවිභූෂිතාම් ॥ 15 ॥
ඉමේ ච ධනුෂී චිත්රේ ශ්ලෂ්ණේ චිත්රානුලේපනේ ।
ප්රකාශේතේ යථේංද්රස්ය වජ්රේ හේමවිභූෂිතේ ॥ 16 ॥
සංපූර්ණා නිශිතෛර්බාණෛ ස්තූණාශ්ච ශුභදර්ශනාඃ ॥ 17 ॥
ජීවිතාංතකරෛර්ඝෝරෛ ශ්ශ්වසද්භිරිව පන්නගෛඃ ।
මහාප්රමාණෞ විස්තීර්ණෞ තප්තහාටකභූෂිතෞ ॥ 18 ॥
ඛඩගාවේතෞ විරාජේතේ නිර්මුක්තාවිවපන්නගෞ ।
ඒවං මාං පරිභාෂංතං කස්මාද්වෛ නාභිභාෂථඃ ॥ 19 ॥
සුග්රීවෝ නාම ධර්මාත්මා කශ්චිද්වානරයූථපඃ ।
වීරෝ විනිකෘතෝ භ්රාත්රා ජගද්භ්රමති දුඃඛිතඃ ॥ 20 ॥
ප්රාප්තෝऽහං ප්රේෂිතස්තේන සුග්රීවේණ මහාත්මනා ।
රාජ්ඤා වානරමුඛ්යානාං හනුමාන්නාම වානරඃ ॥ 21 ॥
යුවාභ්යාං සහ ධර්මාත්මා සුග්රීවස්සඛ්යමිච්ඡති ।
තස්ය මාං සචිවං විත්තං වානරං පවනාත්මජම් ॥ 22 ॥
භික්ෂුරූපප්රතිච්ඡන්නං සුග්රීවප්රියකාම්යයා ।
ඍෂ්යමූකාදිහ ප්රාප්තං කාමගං කාමරූපිණම් ॥ 23 ॥
ඒවමුක්ත්වා තු හනුමාංස්තෞ වීරෞ රාමලක්ෂ්මණෞ ।
වාක්යජ්ඤෞ වාක්යකුශලඃ පුනර්නෝවාච කිංචන ॥ 24 ॥
ඒතච්ඡ්රුත්වා වචංතස්ය රාමෝ ලක්ෂ්මණමබ්රවීත් ।
ප්රහෘෂ්ටවදනශ්ශ්රීමාන්භ්රාතරං පාර්ශ්වතඃ ස්ථිතම් ॥ 25 ॥
සචිවෝऽයං කපීංද්රස්ය සුග්රීවස්ය මහාත්මනඃ ।
තමේව කාංක්ෂමාණස්ය මමාංතිකමුපාගතඃ ॥ 26 ॥
තමභ්යභාෂ සෞමිත්රේ සුග්රීවසචිවං කපිම් ।
වාක්යජ්ඤං මධුරෛර්වාක්යෛස්ස්නේහයුක්තමරිංදම ॥ 27 ॥
නානෘග්වේදවිනීතස්ය නායජුර්වේද්ධාරිණඃ ।
නාසාමවේදවිදුෂශ්ශක්යමේවං විභාෂිතුම් ॥ 28 ॥
නූනං ව්යාකරණං කෘත්ස්නමනේන බහුධා ශ්රුතම් ।
බහු ව්යාහරතාऽනේන න කිංචිදපශබ්දිතම් ॥ 29 ॥
න මුඛේ නේත්රයෝර්වාපි ලලාටේ ච භ්රුවෝස්තථා ।
අන්යේෂ්වපි ච ගාත්රේෂු දෝෂස්සංවිදිතඃ ක්වචිත් ॥ 30 ॥
අවිස්තරමසංදිග්ධමවිලංබිතමද්රුතම් ।
උරස්ථං කංඨගං වාක්යං වර්තතේ මධ්යමේ ස්වරේ ॥ 31 ॥
සංස්කාරක්රමසංපන්නාමද්රුතාමවිලංබිතාම් ।
උච්චාරයති කල්යාණීං වාචං හෘදයහාරිණීම් ॥ 32 ॥
අනයා චිත්රයා වාචා ත්රිස්ථානව්යංජනස්ථයා ।
කස්ය නාරාධ්යතේ චිත්තමුද්යතාසේරරේරපි ॥ 33 ॥
ඒවං විධෝ යස්ය දූතෝ න භවේත්පාර්ථිවස්ය තු ।
සිද්ධ්යංති හි කථං තස්ය කාර්යාණාං ගතියෝऽනඝ ॥ 34 ॥
ඒවං ගුණගණෛර්යුක්තා යස්ය ස්යුඃ කාර්යසාධකාඃ ।
තස්ය සිධ්යංති සර්වාऽර්ථා දූතවාක්යප්රචෝදිතාඃ ॥ 35 ॥
ඒවමුක්තස්තු සෞමිත්රිස්සුග්රීවසචිවං කපිම් ।
අභ්යභාෂත වාක්යජ්ඤෝ වාක්යජ්ඤං පවනාත්මජම් ॥ 36 ॥
විදිතෞ නෞ ගුණා විද්වංත්සුග්රීවස්ය මහාත්මනඃ ।
තමේව චාऽවාං මාර්ගාවස්සුග්රීවං ප්ලවගේශ්වරම් ॥ 37 ॥
යථා බ්රවීෂි හනුමාන්සුග්රීවවචනාදිහ ।
තත්තථා හි කරිෂ්යාවෝ වචනාත්තව සත්තම ॥ 38 ॥
තත්තස්ය වාක්යං නිපුණං නිශම්ය ප්රහෘෂ්ටරූපඃ පවනාත්මජඃ කපිඃ ।
මනස්සමාධාය ජයෝපපත්තෞ සඛ්යං තදා කර්තුමියේෂ තාභ්යාම් ॥ 39 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ තෘතීයස්සර්ගඃ ॥
