ශ්රීමද්වාල්මීකීය රාමායණේ අයෝධ්යාකාංඩම් ।
අථ ද්විෂෂ්ටිතමස්සර්ගඃ ।
ඒවං තු ක්රුද්ධයා රාජා රාමමාත්රා සශෝකයා ।
ශ්රාවිතඃ පරුෂං වාක්යං චිංතයාමාස දුඃඛිතඃ ॥ 1 ॥
චිංතයිත්වා ස ච නෘපෝ මුමෝහ ව්යාකුලේංද්රියඃ ।
අථ දීර්ඝීණ කාලේන සංජ්ඤාමාප පරංතපඃ ॥ 2 ॥
ස සංජ්ඤාමුපලභ්යෛව දීර්ඝමුෂ්ණං ච නිශ්ශ්වසන් ।
කෞසල්යාං පාර්ශ්වතෝ දෘෂ්ට්වා පුන ශ්චිංතාමුපාගමත් ॥ 3 ॥
තස්ය චිංතයමානස්ය ප්රත්යාභාත්කර්ම දුෂ්කෘතම් ।
යදනේන කෘතං පූර්වමජ්ඤානාච්ඡබ්දවේධිනා ॥ 4 ॥
අමනාස්තේන ශෝකේන රාමශෝකේන ච ප්රභුඃ ।
ද්වාභ්යාමපි මහාරාජ ශ්ශෝකාභ්යාමන්වතප්යත ॥ 5 ॥
දහ්යාමාන ස්සශෝකාභ්යාං කෞසල්යාමාහ භූපතිඃ ।
වේපමානෝऽංජලිං කෘත්වා ප්රසාදාර්ථමවාඞ්මුඛඃ ॥ 6 ॥
ප්රසාදයේ ත්වාං කෞසල්යේ රචිතෝऽයං මයාऽංජලිඃ ।
වත්සලා චානෘශංසා ච ත්වං හි නිත්යං පරේෂ්වපි ॥ 7 ॥
භර්තා තු ඛලු නාරීණාං ගුණවාන්නිර්ගුණෝऽපි වා ।
ධර්මං විමෘශමානානාං ප්රත්යක්ෂං දේවි දෛවතම් ॥ 8 ॥
සා ත්වං ධර්මපරා නිත්යං දෘෂ්ටලෝක පරාවරා ।
නාර්හසේ විප්රියං වක්තුං දුඛිඃතාऽපි සුදුඃඛිතම් ॥ 9 ॥
තද්වාක්යං කරුණං රාජ්ඤඃ ශ්රුත්වා දීනස්ය භාෂිතම් ।
කෞසල්යා ව්යසෘජද්බාෂ්පං ප්රණාලීව නවෝදකම් ॥ 10 ॥
සා මූර්ධ්නිබධ්වා රුදතී රාජ්ඤඃ පද්මමිවාංජලිම් ।
සංභ්රමාදබ්රවීත් ත්රස්තා ත්වරමාණාක්ෂරං වචඃ ॥ 11 ॥
ප්රසීද ශිරසා යාචේ භූමෞ නිපතිතාස්මි තේ ।
යාචිතාස්මි හතා දේව ක්ෂංතව්යාऽහං න හි ත්වයා ॥ 12 ॥
නෛෂා හි සා ස්ත්රී භවති ශ්ලාඝනීයේන ධීමතා ।
උභයෝර්ලෝකයෝර්වීර පත්යා යා සම්සාද්යතේ ॥ 13 ॥
ජානාමි ධර්මං ධර්මජ්ඤ ත්වාං ජානේ සත්යවාදිනම් ।
පුත්රශෝකාර්තයා තත්තු මයා කිමපි භාෂිතම් ॥ 14 ॥
ශෝකෝ නාශයතේ ධෛර්යං ශෝකෝ නාශයතේ ශ්රුතම් ।
ශෝකෝ නාශයතේ සර්වං නාස්ති ශෝකසමෝ රිපුඃ ॥ 15 ॥
ශක්ය ආපතිත ස්සෝඪුං ප්රහාරෝ රිපුහස්තතඃ ।
සෝඪුංමාපතිතශ්ශෝකස්සුසූක්ෂ්මෝऽපි න ශක්යතේ ॥ 16 ॥
ධර්මජ්ඤා ශ්ශ්රුතිමංතෝऽපි ඡින්නධර්මාර්ථසංශයාඃ ।
යතයෝ වීර මුහ්යංති ශෝකසම්මූඪචේතසඃ ॥ 17 ॥
වනවාසාය රාමස්ය පංචරාත්රෝऽද්ය ගණ්යතේ ।
ය ශ්ශෝකහතහර්ෂායාඃ පංචවර්ෂෝපමෝ මම ॥ 18 ॥
තං හි චිංතයමානායා ශ්ශෝකෝऽයං හෘදි වර්ධතේ ।
නදීනාමිව වේගේන සමුද්රසලිලං මහත් ॥ 19 ॥
ඒවං හි කථයංත්යාස්තු කෞසල්යායාශ්ශුභං වචඃ ।
මංදරශ්මිරභූත්සූර්යෝ රජනී චාභ්යවර්තත ॥ 20 ॥
තථා ප්රසාදිතෝ වාක්යෛර්දේව්යා කෞසල්යයා නෘපඃ ।
ශෝකේන ච සමාක්රාංතෝ නිද්රායා වශංතෝමේයිවාන් ॥ 21 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ද්විෂෂ්ටිතමස්සර්ගඃ ॥
