ශ්රීමද්වාල්මීකීය රාමායණේ අයෝධ්යාකාංඩම් ।
අථ අෂ්ටත්රිංශස්සර්ගඃ ।
තස්යාං චීරං වසානායාං නාථවත්යාමනාථවත් ।
ප්රචුක්රෝශ ජනස්සර්වෝ ධික්ත්වාං දශරථං ත්විති ॥ 1 ॥
තේන තත්ර ප්රණාදේන දුඃඛිතස්ස මහීපතිඃ ।
චිච්ඡේද ජීවිතේ ශ්රද්ධාං ධර්මේ යශසි චාත්මනඃ ॥ 2 ॥
ස නිඃශ්වස්යෝෂ්ණමෛක්ෂ්වාක ස්තාං භාර්යාමිදමබ්රවීත් ।
කෛකේයි කුශචීරේණ න සීතා ගංතුමර්හති ॥ 3 ॥
සුකුමාරී ච බාලා ච සතතං ච සුඛෝචිතා ।
නේයං වනස්ය යෝග්යේති සත්යමාහ ගුරුර්මම ॥ 4 ॥
ඉයං හි කස්යාපකරෝති කිංචි ත්තපස්විනී රාජවරස්ය කන්යා ।
යා චීරමාසාද්ය ජනස්ය මධ්යේ ස්ථිතා විසංජ්ඤාශ්රමණීව කාචිත් ॥ 5 ॥
චීරාණ්යපාස්යාජ්ජනකස්ය කන්යා නේයං ප්රතිජ්ඤා මම දත්තපූර්වා ।
යථාසුඛං ගච්ඡතු රාජපුත්රී වනං සමග්රා සහ සර්වරත්නෛඃ ॥ 6 ॥
අජීවනාර්හේණ මයා නෘශංසා කෘතා ප්රතිජ්ඤා නියමේන තාවත් ।
තවයා හි බාල්යාත් ප්රතිපන්නමේතත් තන්මාං දහේද්වේණුමිවාත්මපුෂ්පම් ॥ 7 ॥
රාමේණ යදි තේ පාපේ කිංචිත්කෘතමශෝභනම් ।
අපකාරඃ ක ඉහ තේ වෛදේහ්යා දර්ශිතෝऽධමේ ॥ 8 ॥
මෘගීවෝත්ඵුල්ලනයනා මෘදුශීලා තපස්වීනී ।
අපකාරං කමිහ තේ කරෝති ජනකාත්මජා ॥ 9 ॥
නනු පර්යාප්ත මේතත්තේ පාපේ රාමවිවාසනම් ।
කිමේභිඃ කෘපණෛර්භූයඃ පාතකෛරපි තේ කෘතෛඃ ॥ 10 ॥
ප්රතිජ්ඤාතං මයා තාවත් ත්වයෝක්තං දේවි ශෘණ්වතා ।
රාමං යදභිෂේකාය ත්වමිහාගතමබ්රවීඃ ॥ 11 ॥
තත්ත්වේතත්සමතික්රම්ය නිරයං ගංතුමිච්ඡසි ।
මෛථිලීමපි යා හි ත්වමීක්ෂසේ චීරවාසිනීම් ॥ 12 ॥
ඉතීව රාජා විලපන්මහාත්මා ශෝකස්ය නාංතං ස දදර්ශ කිංචිත් ।
භෘශාතුරත්වාච්ච පපාත භූමෞ තේනෛව පුත්රව්යසනේන මග්නඃ ॥ 13 ॥
ඒවං බ්රුවංතං පිතරං රාමස්සංප්රස්ථිතෝ වනම් ।
අවාක්ඡිරසමාසීනමිදං වචනමබ්රවීත් ॥ 14 ॥
යං ධාර්මික කෞශල්යා මම මාතා යශස්විනී ।
වෘද්ධා චාක්ෂුද්රශීලා ච න ච ත්වාං දේව ගර්හතේ ॥ 15 ॥
මයා විහීනාං වරද ප්රපන්නාං ශෝකසාගරම් ।
අදෘෂ්ටපූර්වව්යසනාං භූයස්සම්මංතුමර්හසි ॥ 16 ॥
පුත්රශෝකං යථා නර්ච්ඡේත්ත්වයා පූජ්යේන පූජිතා ।
මාං හි සංචිංතයංතී සා ත්වයි ජීවේත්තපස්විනී ॥ 17 ॥
ඉමාං මහේංංද්රෝපම ජාතගර්ධිනීං තථා විධාතුං ජනනීං මමාර්හසි ।
යථා වනස්ථේ මයි ශෝකකර්ශිතා න ජීවිතං න්යස්ය යමක්ෂයං ව්රජේත් ॥ 18 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ අෂ්ටත්රිංශස්සර්ගඃ ॥
