ශ්රීමද්වාල්මීකීය රාමායණේ සුංදරකාංඩම් ।
අථ විංශස්සර්ගඃ ।
ස තාං පරිවෘතාං දීනාං නිරානංදාං තපස්විනීම් ।
සාකාරෛර්මධුරෛර්වාක්යෛර්න්යදර්ශයත රාවණඃ ॥ 1 ॥
මාං දෘෂ්ට්වා නාගනාසෝරු ගූහමානා ස්තනෝදරම් ।
අදර්ශනමිවාත්මානං භයාන්නේතුං ත්වමිච්ඡසි ॥ 2 ॥
කාමයේ ත්වාං විශාලාක්ෂි බහුමන්යස්ව මාං ප්රියේ ।
සර්වාංගගුණසංපන්නේ සර්වලෝකමනෝහරේ ॥ 3 ॥
නේහ කේචින්මනුෂ්යා වා රාක්ෂසාඃ කාමරූපිණඃ ।
ව්යපසර්පතු තේ සීතේ භයං මත්තඃ සමුත්ථිතම් ॥ 4 ॥
ස්වධර්මෝ රක්ෂසාං භීරු සර්වථෛව න සංශයඃ ।
ගමනං වා පරස්ත්රීණාං හරණං සංප්රමථ්ය වා ॥ 5 ॥
ඒවං චෛතදකාමාං තු න ත්වාං ස්ප්රක්ෂ්යාමි මෛථිලි ।
කාමං කාමඃ ශරීරේ මේ යථාකාමං ප්රවර්තතාම් ॥ 6 ॥
දේවි නේහ භයං කාර්යං මයි විශ්වසි හි ප්රියේ ।
ප්රණයස්ව ච තත්ත්වේන මෛවං භූඃ ශෝකලාලසා ॥ 7 ॥
ඒකවේණී ධරාශය්යා ධ්යානං මලිනමංබරම් ।
අස්ථානේऽප්යුපවාසශ්ච නෛතාන්යෞපයිකානි තේ ॥ 8 ॥
විචිත්රාණි ච මාල්යානි චංදනාන්යගරූණි ච ।
විවිධානි ච වාසාංසි දිව්යාන්යාභරණානි ච ॥ 9 ॥
මහාර්හාණි ච පානානි ශයනාන්යාසනානි ච ।
ගීතං නෘත්තං ච වාද්යං ච ලභ මාං ප්රාප්ය මෛථිලි ॥ 10 ॥
ස්ත්රීරත්නමසි මෛවං භූඃ කුරු ගාත්රේෂු භූෂණම් ।
මාං ප්රාප්ය හි කථං නු ස්වාස්ත්වමනර්හා සුවිග්රහේ ॥ 11 ॥
ඉදං තේ චාරු සංජාතං යෞවනං ව්යතිවර්තතේ ।
යදතීතං පුනර්නෛති ස්රෝතඃ ශීඝ්රමපාමිව ॥ 12 ॥
ත්වාං කෘත්වෝපරතෝ මන්යේ රූපකර්තා ස විශ්වසෘක් ।
න හි රූපෝපමා ත්වන්යා තවාස්ති ශුභදර්ශනේ ॥ 13 ॥
ත්වාං සමාසාද්ය වෛදේහි රූපයෞවනශාලිනීම් ।
කඃ පුමානතිවර්තේත සාක්ෂාදපි පිතාමහඃ ॥ 14 ॥
යද්යත්පශ්යාමි තේ ගාත්රං ශීතාංශුසදෘශානනේ ।
තස්මිංස්තස්මින් පෘථුශ්රෝණි චක්ෂුර්මම නිබධ්යතේ ॥ 15 ॥
භව මෛථිලි භාර්යා මේ මෝහමේනං විසර්ජය ।
බහ්වීනාමුත්තමස්ත්රීණාමාහෘතානාමිතස්තතඃ ॥ 16 ॥
සර්වාසාමේව භද්රං තේ මමාග්රමහිෂී භව ।
ලෝකේභ්යෝ යානි රත්නානි සංප්රමථ්යාහෘතානි වෛ ॥ 17 ॥
තානි මේ භීරු සර්වාණි රාජ්යං චෛතදහං ච තේ ।
විජිත්ය පෘථිවීං සර්වාං නානානගරමාලිනීම් ॥ 18 ॥
ජනකාය ප්රදාස්යාමි තව හේතෝර්විලාසිනි ।
නේහ පශ්යාමි ලෝකේऽන්යං යෝ මේ ප්රතිබලෝ භවේත් ।
පශ්ය මේ සුමහද්වීර්යමප්රතිද්වංද්වමාහවේ ॥ 19 ॥
අසකෘත්සංයුගේ භග්නා මයා විමෘදිතධ්වජාඃ ॥ 20 ॥
අශක්තාඃ ප්රත්යනීකේෂු ස්ථාතුං මම සුරාසුරාඃ ।
ඉච්ඡ මාං ක්රියතාමද්ය ප්රතිකර්ම තවෝත්තමම් ॥ 21 ॥
සප්රභාණ්යවසජ්යංතාං තවාංගේ භූෂණානි ච ।
සාධු පශ්යාමි තේ රූපං සංයුක්තං ප්රතිකර්මණා ॥ 22 ॥
ප්රතිකර්මාභිසංයුක්තා දාක්ෂිණ්යේන වරානනේ ।
භුංක්ෂ්ව භෝගාන්යථාකාමං පිබ භීරු රමස්ව ච ॥ 23 ॥
යථේෂ්ටං ච ප්රයච්ඡ ත්වං පෘථිවීං වා ධනානි ච ।
ලලස්ව මයි විස්රබ්ධා ධෘෂ්ටමාජ්ඤාපයස්ව ච ॥ 24 ॥
මත්ප්රසාදාල්ලලංත්යාශ්ච ලලංතාං බාංධවාස්තව ।
ඍද්ධිං මමානුපශ්ය ත්වං ශ්රියං භද්රේ යශශ්ච මේ ॥ 25 ॥
කිං කරිෂ්යසි රාමේණ සුභගේ චීරවාසසා ।
නික්ෂිප්තවිජයෝ රාමෝ ගතශ්රීර්වනගෝචරඃ ॥ 26 ॥
ව්රතී ස්ථංඩිලශායී ච ශංකේ ජීවති වා න වා ।
න හි වෛදේහි රාමස්ත්වාං ද්රෂ්ටුං වා ප්යුපලප්ස්යතේ ।
පුරෝබලාකෛරසිතෛර්මේඝෛර්ජ්යෝත්ස්නාමිවාවෘතාම් ॥ 27 ॥
න චාපි මම හස්තාත්ත්වාං ප්රාප්තුමර්හති රාඝවඃ ॥ 28 ॥
හිරණ්යකශිපුඃ කීර්තිමිංද්රහස්තගතාමිව ।
චාරුස්මිතේ චාරුදති චාරුනේත්රේ විලාසිනි ॥ 29 ॥
මනෝ හරසි මේ භීරු සුපර්ණඃ පන්නගං යථා ।
ක්ලිෂ්ටකෞශේයවසනාං තන්වීමප්යනලංකෘතාම් ॥ 30 ॥
ත්වාං දෘෂ්ට්වා ස්වේෂු දාරේෂු රතිං නෝපලභාම්යහම් ।
අංතඃපුරනිවාසින්යඃ ස්ත්රියඃ සර්වගුණාන්විතාඃ ॥ 31 ॥
යාවංත්යෝ මම සර්වාසාමෛශ්වර්යං කුරු ජානකි ।
මම හ්යසිතකේශාංතේ ත්රෛලෝක්යප්රවරාඃ ස්ත්රියඃ ॥ 32 ॥
තාස්ත්වාං පරිචරිෂ්යංති ශ්රියමප්සරසෝ යථා ।
යානි වෛශ්රවණේ සුභ්රු රත්නානි ච ධනානි ච ॥ 33 ॥
තානි ලෝකාංශ්ච සුශ්රෝණි මාං ච භුංක්ෂ්ව යථාසුඛම් ।
න රාමස්තපසා දේවි න බලේන න වික්රමෛඃ ॥ 34 ॥
න ධනේන මයා තුල්යස්තේජසා යශසාපි වා ।
පිබ විහර රමස්ව භුංක්ෂ්ව භෝගාන් ධනනිචයං ප්රදිශාමි මේදිනීං ච ।
මයි ලල ලලනේ යථාසුඛං ත්වං ත්වයි ච සමේත්ය ලලංතු බාංධවාස්තේ ॥ 35 ॥
කුසුමිතතරුජාලසංතතානි භ්රමරයුතානි සමුද්රතීරජානි ।
කනකවිමලහාරභූෂිතාංගී විහර මයා සහ භීරු කානනානි ॥ 36 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ විංශස්සර්ගඃ ॥
