ශ්රීමද්වාල්මීකීය රාමායණේ අයෝධ්යාකාංඩම් ।
අථ චතුරධිකශතතමස්සර්ගඃ ।
තං තු රාම ස්සමාශ්වාස්ය භ්රාතරං ගුරවත්සලම් ।
ලක්ෂ්මණේන සහ භ්රාත්රා ප්රෂ්ටුං සමුපචක්රමේ ॥ 1 ॥
කිමේතදිච්ඡේයමහං ශ්රෝතුං ප්රව්යාහෘතං ත්වයා ।
යස්මාත්ත්වමාගතෝ දේශමිමං චීරජටාජිනඃ ॥ 2 ॥
යන්නිමිත්තමිමං දේශං කෘෂ්ණාජිනජටාධරඃ ।
හිත්වා රාජ්යං ප්රවිෂ්ටස්ත්වං තත්සර්වං වක්තුමර්හසි ॥ 3 ॥
ඉත්යුක්තඃ කෛකයීපුත්රඃ කාකුත්ස්ථේන මහාත්මනා ।
ප්රගෘහ්ය බලවද්භූයඃ ප්රාංජලිර්වාක්යමබ්රවීත් ॥ 4 ॥
ආර්යං තාතඃ පරිත්යජ්ය කෘත්වා කර්ම සුදුෂ්කරම් ।
ගතඃ ස්වර්ග මහාබාහුඃ පුත්රශෝකාභිපීඩිතඃ ॥ 5 ॥
ස්ත්රියා නියුක්තඃ කෛකේය්යා මම මාත්රා පරංතප ।
චකාර සා මහත්පාපමිදමාත්මයශෝහරම් ॥ 6 ॥
සා රාජ්යඵලමප්රාප්ය විධවා ශෝකකර්ශිතා ।
පතිෂ්යති මහාඝෝරේ නිරයේ ජනනී මම ॥ 7 ॥
තස්ය මේ දාසභූතස්ය ප්රසාදං කර්තුමර්හසි ।
අභිෂිංචස්ව චාද්යේව රාජ්යේන මඝවානිව ॥ 8 ॥
ඉමාඃ ප්රකෘතය ස්සර්වා විධවා මාතරශ්ච යාඃ ।
ත්වත්සකාශමනුප්රාප්තා ප්රසාදං කර්තුමර්හසි ॥ 9 ॥
තදානුපූර්ව්යා යුක්තං ච යුක්තං චාත්මනි මානද ।
රාජ්යං ප්රාප්නුහි ධර්මේණ සකාමාන්සුහෘදඃ කුරු ॥ 10 ॥
භවත්වවිධවා භූමි ස්සමග්රා පතිනා ත්වයා ।
ශශිනා විමලේනේව ශාරදී රජනී යථා ॥ 11 ॥
ඒභිශ්ච සචිවෛස්සාර්ධං ශිරසා යාචිතෝ මයා ।
භ්රාතු ශිෂ්යස්ය දාසස්ය ප්රසාදං කර්තුමර්හසි ॥ 12 ॥
තදිදං ශාශ්වතං පිත්ර්යං සර්වං ප්රකෘතිමංඩලම් ।
පූජිතං පුරුෂව්යාඝ්ර නාතික්රමිතුමර්හසි ॥ 13 ॥
ඒවමුක්ත්වා මහාබාහු ස්සබාෂ්පඃ කෛකයීසුතඃ ।
රාමස්ය ශිරසා පාදෞ ජග්රාහ භරතඃ පුනඃ ॥ 14 ॥
තං මත්තමිව මාතංගං නිඃශ්වසංතං පුන පුනඃ ।
භ්රාතරං භරතං රාමඃ පරිෂ්වජ්යේදමබ්රවීත් ॥ 15 ॥
කුලීනඃසත්ත්වසංපන්නස්තේජස්වී චරිතව්රතඃ ।
රාජ්යහේතෝඃ කථං පාපමාචරේත්ත්වද්විධෝ ජනඃ ॥ 16 ॥
න දෝෂං ත්වයි පශ්යාමි සූක්ෂ්මමප්යරිසූදන ।
න චාපි ජනනීං බාල්යාත්ත්වං විගර්හිතුමර්හසි ॥ 17 ॥
කාමකාරෝ මහාප්රාජ්ඤ ගුරූණාං සර්වදාऽනඝ ।
උපපන්නේෂු දාරේෂු පුත්රේෂු ච විධීයතේ ॥ 18 ॥
වයමස්ය යථා ලෝකේ සංඛ්යාතාඃ සෞම්ය සාධුභිඃ ।
භාර්යාඃ පුත්රාශ්ච ශිෂ්යාශ්ච ත්වමනුජ්ඤාතුමර්හසි ॥ 19 ॥
වනේ වා චීරවසනං සෞම්ය කෘෂ්ණාජිනාංබරම් ।
රාජ්යේ වාऽපි මහාරාජෝ මාං වාසයිතුමීශ්වරඃ ॥ 20 ॥
යාවත පිතරි ධර්මජ්ඤේ ගෞරවං ලෝකසත්කෘතම් ।
තාවද්ධර්මභෘතාං ශ්රේෂ්ඨ ජනන්යාමපි ගෞරවම් ॥ 21 ॥
ඒතාභ්යාං ධර්මශීලාභ්යාං වනං ගච්ඡේති රාඝව ।
මාතාපිතෘභ්යාමුක්තෝऽහං කථමන්යත්සමාචරේ ॥ 22 ॥
ත්වයා රාජ්යමයෝධ්යායාං ප්රාප්තව්යං ලෝකසත්කෘතම් ।
වස්තව්යං දංඩකාරණ්යේ මයා වල්කලවාසසා ॥ 23 ॥
ඒවං කෘත්වා මහාරාජෝ විභාගං ලෝකසන්නිධෞ ।
ව්යාදිශ්ය ච මහාතේජා දිවං දශරථෝ ගතඃ ॥ 24 ॥
ස ච ප්රමාණං ධර්මාත්මා රාජා ලෝකගුරුස්තව ।
පිත්රා දත්තං යථාභාගමුපභෝක්තුං ත්වමර්හසි ॥ 25 ॥
චතුර්දශ සමාස්සෞම්ය දංඩකාරණ්යමාශ්රිතඃ ।
උපභෝක්ෂ්යේ ත්වහං දත්තං භාගං පිත්රා මහාත්මනා ॥ 26 ॥
යදබ්රවීන්මාං නරලෝකසත්කෘතඃ පිතා මහාත්මා විබුධාධිපෝපමඃ ।
තදේව මන්යේ පරමාත්මනෝ හිතං න සර්වලෝකේශ්වර භාවමප්යයම් ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ චතුරධිකශතතමස්සර්ගඃ ॥
