ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଏକୋନଵିଂଶସ୍ସର୍ଗଃ ।
ତଚ୍ଛ୍ରୁତ୍ଵା ରାଜସିଂହସ୍ୟ ଵାକ୍ୟମଦ୍ଭୁତଵିସ୍ତରମ୍ ।
ହୃଷ୍ଟରୋମା ମହାତେଜା ଵିଶ୍ଵାମିତ୍ରୋଽଭ୍ୟଭାଷତ ॥ 1 ॥
ସଦୃଶଂ ରାଜଶାର୍ଦୂଲ ତଵୈତଦ୍ଭୁଵି ନାନ୍ୟଥା ।
ମହାଵଂଶପ୍ରସୂତସ୍ୟ ଵସିଷ୍ଠଵ୍ୟପଦେଶିନଃ ॥ 2 ॥
ୟତ୍ତୁ ମେ ହୃଦ୍ଗତଂ ଵାକ୍ୟଂ ତସ୍ୟ କାର୍ୟସ୍ୟ ନିଶ୍ଚୟମ୍ ।
କୁରୂଷ୍ଵ ରାଜଶାର୍ଦୂଲ ଭଵ ସତ୍ୟପ୍ରତିଶ୍ରଵଃ ॥ 3 ॥
ଅହଂନିୟମମାତିଷ୍ଠେ ସିଧ୍ୟର୍ଥଂ ପୁରୁଷର୍ଷଭ ।
ତସ୍ୟ ଵିଘ୍ନକରୌ ଦ୍ଵୌ ତୁ ରାକ୍ଷସୌ କାମରୂପିଣୌ ॥ 4 ॥
ଵ୍ରତେ ମେ ବହୁଶଶ୍ଚୀର୍ଣେ ସମାପ୍ତ୍ୟାଂ ରାକ୍ଷସାଵିମୌ ।
ମାରୀଚଶ୍ଚ ସୁବାହୁଶ୍ଚ ଵୀର୍ୟଵଂତୌ ସୁଶିକ୍ଷିତୌ ॥ 5 ॥
ସମାଂସରୁଧିରୌଘେଣ ଵେଦିଂ ତାମଭ୍ୟଵର୍ଷତାମ୍ ।
ଅଵଧୂତେ ତଥାଭୂତେ ତସ୍ମିନ୍ନିୟମନିଶ୍ଚୟେ ॥ 6 ॥
କୃତଶ୍ରମୋ ନିରୁତ୍ସାହସ୍ତସ୍ମାଦ୍ଦେଶାଦପାକ୍ରମେ ।
ନ ଚ ମେ କ୍ରୋଧମୁତ୍ସ୍ରଷ୍ଟୁଂ ବୁଦ୍ଧିର୍ଭଵତି ପାର୍ଥିଵ ॥ 7 ॥
ତଥା ଭୂତା ହି ସା ଚର୍ୟା ନ ଶାପସ୍ତତ୍ର ମୁଚ୍ୟତେ ।
ସ୍ଵପୁତ୍ରଂ ରାଜଶାର୍ଦୂଲ ରାମଂ ସତ୍ୟପରାକ୍ରମମ୍ ॥ 8 ॥
କାକପକ୍ଷଧରଂ ଶୂରଂ ଜ୍ୟେଷ୍ଠଂ ମେ ଦାତୁମର୍ହସି ।
ଶକ୍ତୋ ହ୍ୟେଷ ମୟା ଗୁପ୍ତୋ ଦିଵ୍ୟେନ ସ୍ଵେନ ତେଜସା ॥ 9 ॥
ରାକ୍ଷସା ୟେ ଵିକର୍ତାରସ୍ତେଷାମପି ଵିନାଶନେ ।
ଶ୍ରେୟଶ୍ଚାସ୍ମୈ ପ୍ରଦାସ୍ୟାମି ବହୁରୂପଂ ନ ସଂଶୟଃ ॥ 10 ॥
ତ୍ରୟାଣାମପି ଲୋକାନାଂ ୟେନ ଖ୍ୟାତିଂ ଗମିଷ୍ୟତି ।
ନ ଚ ତୌ ରାମମାସାଦ୍ୟ ଶକ୍ତୌ ସ୍ଥାତୁଂ କଥଂଚନ ॥ 11 ॥
ନ ଚ ତୌ ରାଘଵାଦନ୍ୟୋ ହଂତୁମୁତ୍ସହତେ ପୁମାନ୍ ।
ଵୀର୍ୟୋତ୍ସିକ୍ତୌ ହି ତୌ ପାପୌ କାଲପାଶଵଶଂ ଗତୌ ॥ 12 ॥
ରାମସ୍ୟ ରାଜଶାର୍ଦୂଲ ନ ପର୍ୟାପ୍ତୌ ମହାତ୍ମନଃ ।
ନ ଚ ପୁତ୍ରକୃତସ୍ନେହଂ କର୍ତୁମର୍ହସି ପାର୍ଥିଵ ॥ 13 ॥
ଅହଂ ତେ ପ୍ରତିଜାନାମି ହତୌ ତୌ ଵିଦ୍ଧି ରାକ୍ଷସୌ ।
ଅହଂ ଵେଦ୍ମି ମହାତ୍ମାନଂ ରାମଂ ସତ୍ୟପରାକ୍ରମମ୍ ॥ 14 ॥
ଵସିଷ୍ଠୋଽପି ମହାତେଜା ୟେ ଚେମେ ତପସି ସ୍ଥିତାଃ ।
ୟଦି ତେ ଧର୍ମଲାଭଂ ଚ ୟଶଶ୍ଚ ପରମଂ ଭୁଵି ॥ 15 ॥
ସ୍ଥିତମିଚ୍ଛସି ରାଜେଂଦ୍ର ରାମଂ ମେ ଦାତୁମର୍ହସି ।
ୟଦିହ୍ୟନୁଜ୍ଞାଂ କାକୁତ୍ସ୍ଥ ଦଦତେ ତଵ ମଂତ୍ରିଣଃ ॥ 16 ॥
ଵସିଷ୍ଠପ୍ରମୁଖାଃ ସର୍ଵେ ତତୋ ରାମଂ ଵିସର୍ଜୟ ।
ଅଭିପ୍ରେତମସଂସକ୍ତମାତ୍ମଜଂ ଦାତୁମର୍ହସି ॥ 17 ॥
ଦଶରାତ୍ରଂ ହି ୟଜ୍ଞସ୍ୟ ରାମଂ ରାଜୀଵଲୋଚନମ୍ ।
ନାତ୍ୟେତି କାଲୋ ୟଜ୍ଞସ୍ୟ ୟଥାଽୟଂ ମମ ରାଘଵ ॥ 18 ॥
ତଥା କୁରୁଷ୍ଵ ଭଦ୍ରଂ ତେ ମା ଚ ଶୋକେ ମନଃ କୃଥାଃ ।
ଇତ୍ୟେଵମୁକ୍ତ୍ଵା ଧର୍ମାତ୍ମା ଧର୍ମାର୍ଥସହିତଂ ଵଚଃ ॥ 19 ॥
ଵିରରାମ ମହାତେଜା ଵିଶ୍ଵାମିତ୍ରୋ ମହାମୁନିଃ ।
ସ ତନ୍ନିଶମ୍ୟ ରାଜେଂଦ୍ରୋ ଵିଶ୍ଵାମିତ୍ରଵଚଶ୍ଶୁଭମ୍ ॥ 20 ॥
ଶୋକମଭ୍ୟଗମତ୍ତୀଵ୍ରଂ ଵ୍ୟଷୀଦତ ଭୟାନ୍ଵିତଃ ।
ଇତି ହୃଦୟମନୋଵିଦାରଣଂ ମୁନିଵଚନଂ ତଦତୀଵ ଶୁଶ୍ରୁଵାନ୍ ।
ନରପତିରଭଵନ୍ମହାଂସ୍ତଦା ଵ୍ୟଥିତମନାଃ ପ୍ରଚଚାଲ ଚାସନାତ୍ ॥ 21 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଏକୋନଵିଂଶସ୍ସର୍ଗଃ ॥
