ශ්රීමද්වාල්මීකීය රාමායණේ අරණ්යකාංඩම් ।
අථ ඒකෝනෂෂ්ටිතමස්සර්ගඃ ।
අථාශ්රමාදුපාවෘත්තමංතරා රඝුනංදනඃ ।
පරිපප්රච්ඡ සෞමිත්රිං රාමෝ දුඃඛාර්දිතං පුනඃ ॥ 1 ॥
තමුවාච කිමර්ථං ත්වමාගතෝऽපාස්ය මෛථිලීම් ।
යදා සා තව විශ්වාසාද්වනේ විරහිතා මයා ॥ 2 ॥
දෘෂ්ට්වෛවාභ්යාගතං ත්වාං මේ මෛථිලීං ත්යජ්ය ලක්ෂ්මණ ।
ශංකමානං මහත්පාපං යත්සත්යං ව්යථිතං මනඃ ॥ 3 ॥
ස්ඵුරතේ නයනං සව්යං බාහුශ්ච හෘදයං ච මේ ।
දෘෂ්ට්වා ලක්ෂ්මණ දූරේ ත්වාං සීතාවිරහිතං පථි ॥ 4 ॥
ඒවමුක්තංතු සෞමිත්රිර්ලක්ෂ්මණශ්ශුභලක්ෂණඃ ।
භූයෝ දුඃඛසමාවිෂ්ටෝ දුඃඛිතං රාමමබ්රවීත් ॥ 5 ॥
න ස්වයං කාමකාරේණ තාං ත්යක්ත්වාහමිහාගතඃ ।
ප්රචෝදිත ස්තයෛවෝග්රෛස්ත්වත්සකාශමිහාගතඃ ॥ 6 ॥
ආර්යේණේව පරාක්රුෂ්ටං හාසීතේ ලක්ෂ්මණේති ච ।
පරිත්රාහීති යද්වාක්යං මෛථිල්යාස්තච්ඡ්රුතිං ගතම් ॥ 7 ॥
සා තමාර්තස්වරං ශ්රුත්වා තව ස්නේහේන මෛථිලී ।
ගච්ඡ ගච්ඡේති මාමාහ රුදංතී භයවිහ්වලා ॥ 8 ॥
ප්රචෝද්යමානේන මයා ගච්ඡේති බහුශස්තයා ।
ප්රත්යුක්තා මෛථිලී වාක්යමිදං ත්වත්ප්රත්යයාන්විතම් ॥ 9 ॥
න තත්පශ්යාම්යහං රක්ෂෝ යදස්ය භයමාවහේත් ।
නිර්වෘතා භව නාස්ත්යේතත්කේනාප්යේවමුදාහෘතම් ॥ 10 ॥
විගර්හිතං ච නීචං ච කථමාර්යෝऽභිධාස්යති ।
ත්රාහීති වචනං සීතේ යස්ත්රායේත්රිදශානපි ॥ 11 ॥
කිං නිමිත්තං තු කේනාපි භ්රාතුරාලංබ්ය මේ ස්වරම් ।
රාක්ෂසේනේරිතං වාක්යං ත්රාහි ත්රාහීති ශෝභනේ ॥ 12 ॥
විස්වරං ව්යාහෘතං වාක්යං ලක්ෂ්මණ ත්රාහි මාමිති ।
න භවත්යා ව්යථා කාර්යා කුනාරීජනසේවිතා ॥ 13 ॥
අලං වෛක්ලබ්යමාලංබ්ය ස්වස්ථා භව නිරුත්සුකා ।
න සෝऽස්ති ත්රිෂු ලෝකේෂු පුමාන්වෛ රාඝවං රණේ ॥ 14 ॥
ජාතෝ වා ජායමානෝ වා සංයුගේ යඃ පරාජයේත් ।
න ජය්යෝ රාඝවෝ යුද්ධේ දේවෛශ්ශක්රපුරෝගමෛඃ ॥ 15 ॥
ඒවමුක්තා තු වෛදේහී පරිමෝහිතචේතනා ।
උවාචාශ්රූණි මුංචංතී දාරුණං මාමිදං වචඃ ॥ 16 ॥
භාවෝ මයි තවාත්යර්ථං පාප ඒව නිවේශිතඃ ।
විනෂ්ටේ භ්රාතරි ප්රාප්තුං න ච ත්වං මාමවාප්ස්යසි ॥ 17 ॥
සංකේතාද්භරතේන ත්වං රාමං සමනුගච්ඡසි ।
ක්රෝශංතං හි යථාත්යර්ථං නෛවමභ්යවපද්යසේ ॥ 18 ॥
රිපුඃ ප්රච්ඡන්නචාරී ත්වං මදර්ථමනුගච්ඡසි ।
රාඝවස්යාංතරප්රේප්සුස්තථෛනං නාභිපද්යසේ ॥ 19 ॥
ඒවමුක්තෝ හි වෛදේහ්යා සංරබ්ධෝ රක්තලෝචනඃ ।
ක්රෝධාත්ප්රස්ඵුරමාණෝෂ්ඨ ආශ්රමාදභිනිර්ගතඃ ॥ 20 ॥
ඒවං බ්රුවාණං සෞමිත්රිං රාමස්සංතාපමෝහිතඃ ।
අබ්රවීද්දුෂ්කෘතං සෞම්ය තාං විනා යත්ත්වමාගතඃ ॥ 21 ॥
ජානන්නපි සමර්ථං මාං රක්ෂසාං විනිවාරණේ ।
අනේන ක්රෝධවාක්යේන මෛථිල්යා නිස්සෘතෝ භවාන් ॥ 22 ॥
න හි තේ පරිතුෂ්යාමි ත්යක්ත්වා යද්යාසි මෛථිලීම් ।
ක්රුද්ධායාඃ පරුෂං ශ්රුත්වා තාං විහාය ත්වමාගතඃ ॥ 23 ॥
සර්වථා ත්වවිනීතං තේ සීතයා යත්ප්රචෝදිතඃ ।
ක්රෝධස්ය වශමාපන්නෝ නාකරෝශ්ශාසනං මම ॥ 24 ॥
අසෞ හි රාක්ෂසශ්ශේතේ ශරේණාභිහතෝ මයා ।
මෘගරූපේණ යේනාහමාශ්රමාදපවාහිතඃ ॥ 25 ॥
විකෘෂ්ය චාපං පරිධාය සායකං සලීලබාණේන ච තාඩිතෝ මයා ।
මාර්ගීං තනුං ත්යජ්ය ස වික්ලබස්වරෝ බභූව කේයූරධරස්සරාක්ෂසඃ ॥ 26 ॥
ශරාහතේනෛව තදාර්තයා ගිරා ස්වරං සමාලංබ්ය සුදූරසුශ්රවම් ।
උදාහෘතං තද්වචනං සුදාරුණං ත්වමාගතෝ යේන විහාය මෛථිලීම් ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකෝනෂෂ්ටිතමස්සර්ගඃ ॥
