ශ්රීමද්වාල්මීකීය රාමායණේ අරණ්යකාංඩම් ।
අථ සප්තත්රිංශස්සර්ගඃ ।
තච්ඡෘත්වා රාක්ෂසේංද්රස්ය වාක්යං වාක්යවිශාරදඃ ।
ප්රත්යුවාච මහාප්රාජ්ඤෝ මාරීචෝ රාක්ෂසේශ්වරම් ॥ 1 ॥
සුලභාඃ පුරුෂා රාජන්සතතං ප්රියවාදිනඃ ।
අප්රියස්ය තු පථ්යස්ය වක්තා ශ්රෝතා ච දුර්ලභඃ ॥ 2 ॥
න නූනං බුධ්යසේ රාමං මහාවීර්යං ගුණෝන්නතම් ।
අයුක්තචාරශ්චපලෝ මහේංද්රවරුණෝපමම් ॥ 3 ॥
අපි ස්වස්ති භවේත්තාත සර්වේෂාං භුවි රක්ෂසාම් ।
අපි රාමෝ නාසංක්රුද්ධඃ කුර්යාල්ලෝකමරාක්ෂසම් ॥ 4 ॥
අපි තේ ජීවිතාංතාය නෝත්පන්නා ජනකාත්මජා ।
අපි සීතානිමිත්තං ච න භවේද්ව්යසනං මම ॥ 5 ॥
අපි ත්වාමීශ්වරං ප්රාප්ය කාමවෘත්තං නිරංකුශම් ।
න විනශ්යේත්පුරී ලංකා ත්වයා සහ සරාක්ෂසා ॥ 6 ॥
ත්වද්විධඃ කාමවෘත්තෝ හි දුශ්ශීලඃ පාපමංත්රිතඃ ।
ආත්මානං ස්වජනං රාෂ්ට්රං ස රාජා හංති දුර්මතිඃ ॥ 7 ॥
න ච පිත්රා පරිත්යක්තෝ නාමර්යාදඃ කථංචන ।
න ලුබ්ධෝ න ච දුශ්ශීලෝ න ච ක්ෂත්රියපාංසනඃ ॥ 8 ॥
න ච ධර්මගුණෛර්හීනඃ කෞසල්යානංදවර්ධනඃ ।
න තීක්ෂ්ණෝ න ච භූතානාං සර්වේෂාමහිතේ රතඃ ॥ 9 ॥
වංචිතං පිතරං දෘෂ්ට්වා කෛකේය්යා සත්යවාදිනම් ।
කරිෂ්යාමීති ධර්මාත්මා තාත ප්රව්රජිතෝ වනම් ॥ 10 ॥
කෛකේය්යාඃ ප්රියකාමාර්ථං පිතුර්දශරථස්ය ච ।
හිත්වා රාජ්යං ච භෝගාංශ්ච ප්රවිෂ්ටෝ දංඩකාවනම් ॥ 11 ॥
න රාමඃ කර්කශස්තාත නාවිද්වාන්නාජිතේංද්රියඃ ।
අනෘතං දුශ්ශ්රුතං චෛව නෛව ත්වං වක්තුමර්හසි ॥ 12 ॥
රාමෝ විග්රහවාන් ධර්මස්සාධුස්සත්යපරාක්රමඃ ।
රාජා සර්වස්ය ලෝකස්ය දේවානාං මඝවානිව ॥ 13 ॥
කථං ත්වං තස්ය වෛදේහීං රක්ෂිතාං ස්වේන තේජසා ।
ඉච්ඡසි ප්රසභං හර්තුං ප්රභාමිව විවස්වතඃ ॥ 14 ॥
ශරාර්චිෂමාධෘෂ්යං චාපඛංගේංධනං රණේ ।
රාමාග්නිං සහසා දීප්තං න ප්රවේෂ්ටුං ත්වමර්හසි ॥ 15 ॥
ධනුර්ව්යාදිතදීප්තාස්යං ශරාර්චිෂමමර්ෂණම් ।
චාපබාණධරං තීක්ෂ්ණං ශත්රුසෛන්යප්රහාරිණම් ॥ 16 ॥
රාජ්යං සුඛං ච සංත්යජ්ය ජීවිතං චේෂ්ටමාත්මනඃ ।
නාත්යාසාදයිතුං තාත රාමාංතකමිහාර්හසි ॥ 17 ॥
අප්රමේයං හි තත්තේජෝ යස්ය සා ජනකාත්මජා ।
න ත්වං සමර්ථස්තාං හර්තුං රාමචාපාශ්රයං වනේ ॥ 18 ॥
තස්ය සා නරසිංහස්ය සිංහෝරස්කස්ය භාමිනී ।
ප්රාණේභ්යෝऽපි ප්රියතරා භාර්යා නිත්යමනුව්රතා ॥ 19 ॥
න සා ධර්ෂයිතුං ශක්යා මෛථිල්යෝජස්විනඃ ප්රියා ।
දීප්තස්යේව හුතාශස්ය ශිඛා සීතා සුමධ්යමා ॥ 20 ॥
කිමුද්යමමිමං ව්යර්ථං කෘත්වා තේ රාක්ෂසාධිප ।
දෘෂ්ටශ්චේත්වං රණේ තේන තදංතං තව ජීවිතම් ॥ 21 ॥
ජීවිතං ච සුඛං චෛව රාජ්යං චෛව සුදුර්ලභම් ।
යදීච්ඡසි චිරං භෝක්තුං මා කෘථා රාමවිප්රියම් ॥ 22 ॥
ස සර්වෛස්සචිවෛස්සාර්ධං විභීෂණපුරෝගමෛඃ ।
මංත්රයිත්වා තු ධර්මිෂ්ඨෛඃ කෘත්වා නිශ්චයමාත්මනඃ ॥ 23 ॥
දෝෂාණාං ච ගුණානාං ච සංප්රධාර්ය බලාබලම් ।
ආත්මනශ්ච බලං ජ්ඤාත්වා රාඝවස්ය ච තත්වතඃ ॥ 24 ॥
හිතාහිතං විනිශ්චිත්ය ක්ෂමං ත්වං කර්තුමර්හසි ।
අහං තු මන්යේ තව න ක්ෂමං රණේ සමාගමං කෝසලරාජසූනුනා ।
ඉදං හි භූයශ්ශෘණු වාක්යමුත්තමං ක්ෂමං ච යුක්තං ච නිශාචරේශ්වර ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තත්රිංශස්සර්ගඃ ॥
