ශ්රීමද්වාල්මීකීය රාමායණේ අයෝධ්යාකාංඩම් ।
අථ ද්වාශීතිතමස්සර්ගඃ ।
තාමාර්යගණසංපූර්ණාං භරතඃ ප්රග්රහාං සභාම් ।
දදර්ශ බුද්ධිසංපන්නඃ පූර්ණචංද්රෝ නිශාමිව ॥ 1 ॥
ආසනානි යථාන්යායමාර්යාණාං විශතාං තදා ।
වස්ත්රාංගරාගප්රභයා ද්යෝතිතා සා සභෝත්තමා ॥ 2 ॥
සා විද්වජ්ජනසංපූර්ණා සභා සුරුචිරා තදා ।
අදෘශ්යත ඝනාපායේ පූර්ණචංද්රේව ශර්වරී ॥ 3 ॥
රාජ්ඤස්තු ප්රකෘතී ස්සර්වා ස්සමග්රාඃ ප්රේක්ෂ්ය ධර්මවිත් ।
ඉදං පුරෝහිතෝ වාක්යං භරතං මෘදු චාබ්රවීත් ॥ 4 ॥
තාත රාජා දශරථ ස්ස්වර්ගතෝ ධර්මමාචරන් ।
ධනධාන්යවතීං ස්ඵීතාං ප්රදාය පෘථිවීං තව ॥ 5 ॥
රාමස්තථා සත්යධෘතිස්සතාං ධර්මමනුස්මරන් ।
නාජහාත්පිතුරාදේශං ශශී ජ්යෝත්ස්නාමිවෝදිතඃ ॥ 6 ॥
පිත්රා භ්රාත්රා ච තේ දත්තං රාජ්යං නිහතකංටකම් ।
තද්භුංක්ෂ්ව මුදිතාමාත්යඃ ක්ෂිප්රමේවාභිෂේචය ॥ 7 ॥
උදීච්යා ශ්ච ප්රතීච්යා ශ්ච දාක්ෂිණාත්යාශ්ච කේවලාඃ ।
කෝට්යාපරාංතාස්සාමුද්රාරත්නාන්යභිහරංතුතේ ॥ 8 ॥
තච්ඡ්රුත්වා භරතෝ වාක්යං ශෝකේනාභිපරිප්ලුතඃ ।
ජගාම මනසා රාමං ධර්මජ්ඤෝ ධර්මකාංක්ෂයා ॥ 9 ॥
සබාෂ්පකලයා වාචා කලහංසස්වරෝ යුවා ।
විලලාප සභාමධ්යේ ජගර්හේ ච පුරෝහිතම් ॥ 10 ॥
චරිතබ්රහ්මචර්යස්ය විද්යාස්නාතස්ය ධීමතඃ ।
ධර්මේ ප්රයතමානස්ය කෝ රාජ්යං මද්විධෝ හරේත් ॥ 11 ॥
කථං දශරථාජ්ජාතෝ භවේද්රාජ්යාපහාරකඃ ।
රාජ්යං චාහං ච රාමස්ය ධර්මං වක්තුමිහාර්හසි ॥ 12 ॥
ජ්යේෂ්ඨ ශ්ශ්රේෂ්ඨශ්ච ධර්මාත්මා දිලීපනහුෂෝපමඃ ।
ලබ්ධුමර්හති කාකුත්ස්ථෝ රාජ්යං දශරථෝ යථා ॥ 13 ॥
අනාර්යජුෂ්ටමස්වර්ග්යං කුර්යාං පාපමහං යදි ।
ඉක්ෂ්වාකූණාමහං ලෝකේ භවේයං කුලපාංසනඃ ॥ 14 ॥
යද්ධි මාත්රා කෘතං පාපං නාහං තදපි රෝචයේ ।
ඉහස්ථෝ වනදුර්ගස්ථං නමස්යාමි කෘතාංජලිඃ ॥ 15 ॥
රාමමේවානුගච්ඡාමි රාජා ස ද්විපදාං වරඃ ।
ත්රයාණාමපි ලෝකානාං රාජ්යමර්හති රාඝවඃ ॥ 16 ॥
තද්වාක්යං ධර්මසංයුක්තං ශ්රුත්වා සර්වේ සභාසදඃ ।
හර්ෂාන්මුමුචුරශ්රූණි රාමේ නිහිතචේතසඃ ॥ 17 ॥
යදි ත්වාර්යං න ශක්ෂ්යාමි විනිවර්තයිතුං වනාත් ।
වනේ තත්රෛව වත්ස්යාමි යථාऽර්යෝ ලක්ෂ්මණස්තථා ॥ 18 ॥
සර්වෝපායං තු වර්තිෂ්යේ විනිවර්තයිතුං බලාත් ।
සමක්ෂමාර්යමිශ්රාණාං සාධූනාං ගුණවර්තිනාම් ॥ 19 ॥
විෂ්ටිකර්මාංතිකා ස්සර්වේ මාර්ගශෝධකරක්ෂකාඃ ।
ප්රස්ථාපිතා මයා පූර්වං යත්රාපි මම රෝචතේ ॥ 20 ॥
ඒවමුක්ත්වා තු ධර්මාත්මා භරතෝ භ්රාතෘවත්සලඃ ।
සමීපස්ථමුවාචේදං සුමංත්රං මංත්රකෝවිදම් ॥ 21 ॥
තූර්ණමුත්ථාය ගච්ඡ ත්වං සුමංත්ර මම ශාසනාත් ।
යාත්රාමාජ්ඤාපය ක්ෂිප්රං බලං චෛව සමානය ॥ 22 ॥
ඒවමුක්ත ස්සුමංත්රස්තු භරතේන මහාත්මනා ।
හෘෂ්ටස්තදාऽදිශත්සර්වං යථාසංදිෂ්ටමිෂ්ටවත් ॥ 23 ॥
තාඃ ප්රහෘෂ්ටාඃ ප්රකෘතයෝ බලාධ්යක්ෂා බලස්ය ච ।
ශ්රුත්වා යාත්රාං සමාජ්ඤප්තාං රාඝවස්ය නිවර්තනේ ॥ 24 ॥
තතෝ යෝධාංගනා ස්සර්වා භර්ත්රූන්සර්වාන්ගෘහේගෘහේ ।
යාත්රාගමනමාජ්ඤාය ත්වරයංති ස්ම හර්ෂිතාඃ ॥ 25 ॥
තේ හයෛර්ගෝරථෛශ්ශීඝ්රෛස්ස්යංදනෛශ්ච මහාජවෛඃ සහ යෝධෛර්බලාධ්යක්ෂා බලං සර්වමචෝදයන් ॥ 26 ॥
සජ්ජං තු තද්බලං දෘෂ්ට්වා භරතෝ ගුරුසන්නිධෞ ।
රථං මේ ත්වරයස්වේති සුමංත්රං පාර්ශ්වතෝऽබ්රවීත් ॥ 27 ॥
භරතස්ය තු තස්යාජ්ඤාං ප්රතිගෘහ්ය ච හර්ෂිතඃ ।
රථං ගෘහීත්වා ප්රයයෞ යුක්තං පරමවාජිභිඃ ॥ 28 ॥
ස රාඝව ස්සත්යධෘතිඃ ප්රතාපවාන් බ්රුවන් සුයුක්තං දෘඪසත්යවික්රමඃ ।
ගුරුං මහාරණ්යගතං යශස්විනං ප්රසාදයිෂ්යන්භරතෝऽබ්රවීත්තදා ॥ 29 ॥
තූර්ණං සමුත්ථාය සුමංත්ර ගච්ඡ බලස්ය යෝගාය බලප්රධානාන් ।
ආනේතුමිච්ඡාමි හි තං වනස්ථං ප්රසාද්ය රාමං ජගතෝ හිතාය ॥ 30 ॥
සසූතපුත්රෝ භරතේන සම්යගාජ්ඤාපිතස්සංපරිපූර්ණකාමඃ ।
ශශාස සර්වාන්ප්රකෘතිප්රධානාන්බලස්ය මුඛ්යාංශ්ච සුහෘජ්ජනං ච ॥ 31 ॥
තත ස්සමුත්ථාය කුලේ කුලේ තේ රාජන්යවෛශ්යා වෘෂලාශ්ච විප්රාඃ ।
අයූයුජන්නුෂ්ට්රඛරාන්රථාංශ්ච නාගාන්හයාංශ්චෛව කුලප්රසූතාන් ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ද්වාශීතිතමස්සර්ගඃ ॥
