ශ්රීමද්වාල්මීකීය රාමායණේ අයෝධ්යාකාංඩම් ।
අථ ෂඩශීතිතමස්සර්ගඃ ।
ආචචක්ෂේऽථ සද්භාවං ලක්ෂ්මණස්ය මහාත්මනඃ ।
භරතායාප්රමේයාය ගුහෝ ගහනගෝචරඃ ॥ 1 ॥
තං ජාග්රතං ගුණෛර්යුක්තං ශරචාපාසිධාරිණම් ।
භ්රාතෘගුප්ත්යර්ථමත්යංතමහං ලක්ෂ්මණමබෘවම් ॥ 2 ॥
ඉයං තාත සුඛා ශය්යා ත්වදර්ථමුපකල්පිතා ।
ප්රත්යාශ්වසිහි ශේෂ්වාස්යාං සුඛං රාඝවනංදන ॥ 3 ॥
උචිතෝऽයං ජනස්සර්වෝ දුඃඛානාං ත්වං සුඛෝචිතඃ ।
ධර්මාත්මංස්තස්ය ගුප්ත්යර්ථං ජාගරිෂ්යාමහේ වයම් ॥ 4 ॥
නහි රාමාත්ප්රියතරෝ මමාස්ති භුවි කශ්චන ।
මෝත්සුකෝऽභූර්බ්රවීම්යේතදප්යසත්යං තවාග්රතඃ ॥ 5 ॥
අස්ය ප්රසාදාදාශංසේ ලෝකේऽස්මින් සුමහද්යශඃ ।
ධර්මාවාප්තිං ච විපුලාමර්ථකාමෞ ච කේවලම් ॥ 6 ॥
සෝऽහං ප්රියසඛං රාමං ශයානං සහ සීතයා ।
රක්ෂිෂ්යාමි ධනුෂ්පාණි ස්සර්වෛ ස්ස්වෛර්ජ්ඤාතිභිස්සහ ॥ 7 ॥
න හි මේऽවිදිතං කිංචිද්වනේऽස්මිංශ්චරත ස්සදා ।
චතුරංගං හ්යපි බලං ප්රසහේම වයං යුධි ॥ 8 ॥
ඒවමස්මාභිරුක්තේන ලක්ෂ්මණේන මහාත්මනා ।
අනුනීතා වයං සර්වේ ධර්මමේවානුපශ්යතා ॥ 9 ॥
කථං දාශරථෞ භූමෞ ශයානේ සහ සීතයා ।
ශක්යා නිද්රා මයා ලබ්ධුං ජීවිතං වා සුඛානි වා ॥ 10 ॥
යෝ න දේවාසුරෛස්සර්වෛශ්ශක්යඃ ප්රසහිතුං යුධි ।
තං පශ්ය ගුහ සංවිෂ්ටං තෘණේෂු සහ සීතයා ॥ 11 ॥
මහතා තපසා ලබ්ධෝ විවිධෛශ්ච පරිශ්රමෛඃ ।
ඒකෝ දශරථස්යෛෂ පුත්රස්සදෘශලක්ෂණඃ ॥ 12 ॥
අස්මින්ප්රව්රාජිතේ රාජා න චිරං වර්තයිෂ්යති ।
විධවා මේදිනී නූනං ක්ෂිප්රමේව භවිෂ්යති ॥ 13 ॥
විනද්ය සුමහානාදං ශ්රමේණෝපරතාඃ ස්ත්රියඃ ।
නිර්ඝෝෂෝ විරතෝ නූනමධ්ය රාජනිවේශනේ ॥ 14 ॥
කෞසල්යා චෛව රාජා ච තථෛව ජනනී මම ।
නාශංසේ යදි ජීවේයුස්සර්වේ තේ ශර්වරීමිමාම් ॥ 15 ॥
ජීවේදපි ච මේ මාතා ශත්රුඝ්නස්යාන්වවේක්ෂයා ।
දුඃඛිතා යා තු කෞසල්යා වීරසූර්විනශිෂ්යති ॥ 16 ॥
අතික්රාංතමතික්රාංතමනවාප්ය මනෝරථම් ।
රාජ්යේ රාමමනික්ෂිප්ය පිතා මේ විනශිෂ්යති ॥ 17 ॥
සිද්ධාර්ථාඃ පිතරං වෘත්තං තස්මින්කාලේ හ්යුපස්ථිතේ ।
ප්රේතකාර්යේෂු සර්වේෂු සංස්කරිෂ්යංති භූමිපම් ॥ 18 ॥
රම්යචත්වරසංස්ථානාං සුවිභක්තමහාපථාම් ।
හර්ම්යප්රාසාදංපන්නාං සර්වරත්නවිභූෂිතාම් ॥ 19 ॥
ගජාශ්වරථසංබාධාං තූර්යනාදවිනාදිතාම් ।
සර්වකල්යාණසංපූර්ණාං හෘෂ්ටපුෂ්ටජනාකුලාම් ॥ 20 ॥
ආරාමෝද්යානසංපූර්ණාං සමාජෝත්සවශාලිනීම් ।
සුඛිතා විචරිෂ්යංති රාජධානීං පිතුර්මම ॥ 21 ॥
අපිසත්යප්රතිජ්ඤේන සාර්ධං කුශලිනා වයම් ।
නිවෘත්තේ සමයේ හ්යස්මින් සුඛිතාඃ ප්රවිශේමහි ॥ 22 ॥
පරිදේවයමානස්ය තස්යෛවං සුමහාත්මනඃ ।
තිෂ්ඨතෝ රාජපුත්රස්ය ශර්වරී සාऽත්යවර්තත ॥ 23 ॥
ප්රභාතේ විමලේ සූර්යේ කාරයිත්වා ජටා උභෞ ।
අස්මින් භාගීරථීතීරේ සුඛං සංතාරිතෞ මයා ॥ 24 ॥
ජටාධරෞ තෞ ද්රුමචීරවාසසෞ මහාබලෞ කුංජරයූථපෝපමෞ ।
වරේෂුචාපාසිධරෞ පරංතපෞ ව්යපේක්ෂමාණෞ සහ සීතයා ගතෞ ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ෂඩශීතිතමස්සර්ගඃ ॥
