ශ්රීමද්වාල්මීකීය රාමායණේ සුංදරකාංඩම් ।
අථ ෂෂ්ඨස්සර්ගඃ ।
ස නිකාමං විමානේෂු නිෂණ්ණඃ කාමරූපධෘත් ।
විචචාර පුනර්ලංකාං ලාඝවේන සමන්විතඃ ॥ 1 ॥
ආසසාදාථ ලක්ෂ්මීවාන්රාක්ෂසේංද්රනිවේශනම් ।
ප්රාකාරේණාර්කවර්ණේන භාස්වරේණාභිසම්වෘතම් ॥ 2 ॥
රක්ෂිතං රාක්ෂසෛර්ඝෝරෛඃ සිංහෛරිව මහද්වනම් ।
සමීක්ෂමාණෝ භවනං චකාශේ කපිකුංජරඃ ॥ 3 ॥
රූප්යකෝපහිතෛ ශ්චිත්රෛස්තෝරණෛර්හේමභූෂිතෛඃ ।
විචිත්රාභිශ්ච කක්ෂ්යාභිර්ද්වාරෛශ්ච රුචිරෛර්වෘතම් ॥ 4 ॥
ගජාස්ථිතෛර්මහාමාත්රෛඃ ශූරෛශ්ච විගතශ්රමෛඃ ।
උපස්ථිතමසංහාර්යෛඃ ර්හයෛඃ ස්යංදනයායිභිඃ ॥ 5 ॥
සිංහව්යාඝ්රතනුත්රාණෛර්දාංතකාංචනරාජතෛඃ ।
ඝෝෂවද්භිර්විචිත්රෛශ්ච සදා විචරිතං රථෛඃ ॥ 6 ॥
බහුරත්නසමාකීර්ණං පරාර්ථ්යසනභාජනම් ।
මහාරථසමාවාසං මහාරථමහාස්වනම් ॥ 7 ॥
දෘශ්යෛශ්ච පරමෝදාරෛස්තෛස්තෛශ්ච මෘගපක්ෂිභිඃ ।
විවිධෛ ර්බහුසාහස්රෛඃ පරිපූර්ණං සමංතතඃ ॥ 8 ॥
විනීතෛරංතපාලෛශ්ච රක්ෂෝභිශ්ච සුරක්ෂිතම් ।
මුඛ්යාභිශ්ච වරස්ත්රීභිඃ පරිපූර්ණං සමංතතඃ ॥ 9 ॥
මුදිතප්රමදාරත්නං රාක්ෂසේංද්රනිවේශනම් ।
වරාභරණසංහ්රාදෛඃ සමුද්රස්වනන්නිස්වනම් ॥ 10 ॥
තද්රාජගුණසංපන්නං මුඛ්යෛශ්චාගුරුචංදනෛඃ ।
මහාජනෛඃ සමාකීර්ණාං සිංහෛරිව මහද්වනම් ॥ 11 ॥
භේරීමෘදංගාභිරුතං ශංඛඝෝෂනිනාදිතම් ।
නිත්යාර්චිතං පර්වහුතං පූජිතං රාක්ෂසෛඃ සදා ॥ 12 ॥
සමුද්රමිව ගංභීරං සමුද්රමිව නිස්ස්වනම් ।
මහාත්මනෝ මහාද්වේශ්ම මහාරත්නපරිච්ඡදම් ॥ 13 ॥
මහාරත්නසමාකීර්ණං දදර්ශ ස මහාකපිඃ ।
විරාජමානං වපුෂා ගජාශ්වරථසංකුලම් ॥ 14 ॥
ලංකාභරණමිත්යේව සෝऽමන්යත මහාකපිඃ ।
චචාර හනුමාංස්තත්ර රාවණස්ය සමීපතඃ ॥ 15 ॥
ගෘහාද්ගෘහං රාක්ෂසානාමුද්යානානි ච වානරඃ ।
වීක්ෂමාණෝऽහ්යසංත්රස්තඃ ප්රාසාදාංශ්ච චචාර සඃ ॥ 16 ॥
අවප්ලුත්ය මහාවේගඃ ප්රහස්තස්ය නිවේශනම් ।
තතෝऽන්යත්පුප්ලුවේ වේශ්ම මහාපාර්ශ්වස්ය වීර්යවාන් ॥ 17 ॥
අථ මේඝප්රතීකාශං කුංභකර්ණනිවේශනම් ।
විභීෂණස්ය ච තදා පුප්ලුවේ ස මහාකපිඃ ॥ 18 ॥
මහෝදරස්ය ච ගෘහං විරූපාක්ෂස්ය චෛව හි ।
විද්යුජ්ජිහ්වස්ය භවනං විද්යුන්මාලේස්තථෛව ච ॥ 19 ॥
වජ්රදංෂ්ට්රස්ය ච තථා පුප්ලුවේ ස මහාකපිඃ ।
ශුකස්ය ච මහාතේජාඃ සාරණස්ය ච ධීමතඃ ॥ 20 ॥
තථා චේංද්රජිතෝ වේශ්ම ජගාම හරියූථපඃ ।
ජංබුමාලේඃ සුමාලේශ්ච ජගාම හරිසත්තමඃ ॥ 21 ॥
රශ්මිකේතෝශ්ච භවනං සූර්යකේතෝස්තථෛව ච ।
වජ්රකායස්ය ච තථා පුප්ලුවේ ස මහාකපිඃ ॥ 22 ॥
ධූම්රාක්ෂස්ය ච සංපාතේර්භවනං මාරුතාත්මජඃ ।
විද්යුද්රූපස්ය භීමස්ය ඝනස්ය විඝනස්ය ච ॥ 23 ॥
ශුකනාසස්ය වක්රස්ය ශඨස්ය විකටස්ය ච ।
බ්රහ්මකර්ණස්ය දංෂ්ට්රස්ය රෝමශස්ය ච රක්ෂසඃ ॥ 24 ॥
යුද්ධෝන්මත්තස්ය මත්තස්ය ධ්වජග්රීවස්ය නාදිනඃ ।
විද්යුජ්ජිහ්වේංද්රජිහ්වානාං තථා හස්තිමුඛස්ය ච ॥ 25 ॥
කරාලස්ය පිශාචස්ය ශෝණිත අක්ෂස්ය චෛව හි ।
ක්රමමාණඃ ක්රමේණ ඒව හනූමාන් මාරුත ආත්මජඃ ॥ 26 ॥
තේෂු තේෂු මහාර්හේෂු භවනේෂු මහායශාඃ ।
තේෂාමෘද්ධිමතාමෘද්ධිං දදර්ශ ස මහාකපිඃ ॥ 27 ॥
සර්වේෂාං සමතික්රම්ය භවනානි සමංතතඃ ।
ආසසාදාථ ලක්ෂ්මීවාන් රාක්ෂසේද්රනිවේශනම් ॥ 28 ॥
රාවණස්යෝපශායින්යෝ දදර්ශ හරිසත්තමඃ ।
විචරන්හරිශාර්දූලෝ රාක්ෂසීර්විකෘතේක්ෂණාඃ ॥ 29 ॥
ශූලමුද්ගරහස්තාශ්ච ශක්තිතෝමරධාරිණීඃ ।
දදර්ශ විවිධාන් ගුල්මාන් තස්ය රක්ෂඃපතේර්ගෘහේ ॥ 30 ॥
රාක්ෂසාංශ්ච මහාකායාන්නානාප්රහරණෝද්යතාන් ।
රක්තාන් ශ්වේතාන් සිතාංශ්චෛව හරීංශ්චාපි මහාජවාන් ॥ 31 ॥
කුලීනාන් රූපසංපන්නාන් ගජාන්පරගජාරුජාන් ।
නිෂ්ඨිතාන් ගජශික්ෂයාමෛරාවතසමාන්යුධි ॥ 32 ॥
නිහංත්රූන් පරසෛන්යානාං ගෘහේ තස්මින් දදර්ශ සඃ ।
ක්ෂරතශ්ච යථා මේඝාන් ස්රවතශ්ච යථා ගිරීන් ॥ 33 ॥
මේඝසංතතිනිර්ඝෝෂාන් දුර්ධර්ෂාන් සමරේ පරෛඃ ।
සහස්රං වාහිනීස්තත්ර ජාංබූනදපරිෂ්කෘතාඃ ॥ 34 ॥
හේමජාලපරිච්ඡන්නාස්තරුණාදිත්යසන්නිභාඃ ।
දදර්ශ රාක්ෂසේංද්රස්ය රාවණස්ය නිවේශනේ ॥ 35 ॥
ශිබිකා විවිධාකාරාඃ ස කපිර්මාරුතාත්මජඃ ।
ලතාගෘහාණි චිත්රාණි චිත්රශාලාගෘහාණි ච ॥ 36 ॥
ක්රීඩාගෘහාණි චාන්යානි දාරුපර්වතකානපි ।
කාමස්ය ගෘහකං රම්යං දිවාගෘහකමේව ච ॥ 37 ॥
දදර්ශ රාක්ෂසේංද්රස්ය රාවණස්ය නිවේශනේ ।
ස මංදරගිරිප්රඛ්යං මයූරස්ථානසංකුලම් ॥ 38 ॥
ධ්වජයෂ්ටිභිරාකීර්ණං දදර්ශ භවනෝත්තමම් ।
අනේකරත්නසංකීර්ණං නිධිජාලං සමංතතඃ ॥ 39 ॥
ධීරනිෂ්ඨිතකර්මාංතං ගෘහං භූතපතේරිව ।
අර්චිර්භිශ්චාපි රත්නානාං තේජසා රාවණස්ය ච ॥ 40 ॥
විරරාජාථ තද්වේශ්ම රශ්මිමානිව රශ්මිභිඃ ।
ජාංබූනදමයාන්යේන ශයනාන්යාසනානි ච ॥ 41 ॥
භාජනානි ච මුඛ්යානි දදර්ශ හරියූථපඃ ।
මධ්වාසවකෘතක්ලේදං මණිභාජනසංකුලම් ॥ 42 ॥
මනෝරමමසංබාධං කුබේරභවනං යථා ।
නූපුරාණාං ච ඝෝෂේණ කාංචීනාං නිනදේන ච ॥ 43 ॥
මෘදඞ්තලඝෝෂෛශ්ච ඝෝෂවද්භිර්විනාදිතම් ।
ප්රාසාදසංඝාතයුතං ස්ත්රීරත්නශතසංකුලම් ॥ 44 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ෂෂ්ඨස්සර්ගඃ ॥
