ශ්රීමද්වාල්මීකීය රාමායණේ සුංදරකාංඩම් ।
අථ සප්තෂෂ්ටිතමස්සර්ගඃ ।
ඒවමුක්තස්තු හනුමාන් රාඝවේණ මහාත්මනා ।
සීතායා භාෂිතං සර්වං න්යවේදයත රාඝවේ ॥ 1 ॥
ඉදමුක්තවතී දේවී ජානකී පුරුෂර්ෂභ ।
පූර්ව වෘත්තමභිජ්ඤානං චිත්රකූටේ යථාතථම් ॥ 2 ॥
සුඛසුප්තා ත්වයා සාර්ධං ජානකී පූර්වමුත්ථිතා ।
වායස ස්සහසෝත්පත්ය විදදාර ස්තනාංතරේ ॥ 3 ॥
පර්යායේණ ච සුප්තස්ත්වං දේව්යංකේ භරතාග්රජ ।
පුනශ්ච කිල පක්ෂී ස දේව්යා ජනයති ව්යථාම් ॥ 4 ॥
පුනඃ පුනරුපාගම්ය විදදාර භෘශං කිල ।
තතස්ත්වං බෝධිතස්තස්යාශ්ශෝණිතේන සමුක්ෂිතඃ ॥ 5 ॥
වායසේන ච තේනෛව සතතං බාධ්යමානයා ।
බෝධිතඃ කිල දේව්යා ත්වං සුඛසුප්තඃ පරංතප ॥ 6 ॥
තාං තු දෘෂ්ට්වා මහාබාහෝ දාරිතාං ච ස්තනාංතරේ ।
ආශීවිෂ ඉව ක්රුද්ධෝ නිශ්වසන්නභ්යභාෂථාඃ ॥ 7 ॥
නඛාග්රෛඃ කේන තේ භීරු දාරිතං තු ස්තනාංතරම් ।
කඃ ක්රීඩති සරෝෂේණ පංචවක්ත්රේණ භෝගිනා ॥ 8 ॥
නිරීක්ෂමාණස්සහසා වායසං සමවෛක්ෂථාඃ ।
නඛෛ ස්සරුධිරෛස්තීක්ෂ්ණෛස්තාමේවාභිමුඛං ස්ථිතම් ॥ 9 ॥
සුතඃ කිල ස ශක්රස්ය වායසඃ පතතාං වරඃ ।
ධරාංතරචරශ්ශීඝ්රං පවනස්ය ගතෞ සමඃ ॥ 10 ॥
තතස්තස්මින්මහාබාහෝ කෝපසංවර්තිතේක්ෂණඃ ।
වායසේ ත්වං කෘථාඃ ක්රූරාං මතිං මතිමතාං වර ॥ 11 ॥
ස දර්භං සංස්තරාද්ගෘහ්ය බ්රහ්මාස්ත්රේණ හ්යයෝජයඃ ।
ස දීප්ත ඉව කාලාග්නිර්ජජ්වාලාභිමුඛඃ ඛගම් ॥ 12 ॥
ක්ෂිප්තවාංස්ත්වං ප්රදීප්තං හි දර්භං තං වායසං ප්රති ।
තතස්තු වායසං දීප්තස්ස දර්භෝऽනුජගාම හ ॥ 13 ॥
ස පිත්රා ච පරිත්යක්තස්සුරෛශ්ච සමහර්ෂිභිඃ ।
ත්රීන් ලෝකාන් සංපරික්රම්ය ත්රාතාරං නාධිගච්ඡති ॥ 14 ॥
පුනරේවාගතස්ත්රස්තස්ත්වත්සකාශමරිංදම ।
ස තං නිපතිතං භූමෞ ශරණ්යශ්ශරණාගතම් ॥ 15 ॥
වධාර්හමපි කාකුත්ස්ථ කෘපයා පර්යපාලයඃ ।
මෝඝමස්ත්රං න ශක්යං තු කර්තුමිත්යේව රාඝව ॥ 16 ॥
භවාංස්තස්යාක්ෂි කාකස්ය හිනස්ති ස්ම ස දක්ෂිණම් ।
රාම ත්වාං ස නමස්කෘත්ය රාජ්ඤේ දශරථාය ච ॥ 17 ॥
විසෘෂ්ටස්තු තදා කාක ප්රතිපේදේ ස්වමාලයම් ।
ඒවමස්ත්රවිදාං ශ්රේෂ්ඨස්සත්ත්වවාන් ශීලවානපි ॥ 18 ॥
කිමර්ථමස්ත්රං රක්ෂස්සු න යෝජයති රාඝවඃ ।
න නාගා නාපි ගංධර්වා නාසුරා න මරුද්ගණාඃ ॥ 19 ॥
න ච සර්වේ රණේ ශක්තා රාමං ප්රතිසමාසිතුම් ।
තස්ය වීර්යවතඃ කශ්චිද්යද්යස්ති මයි සංභ්රමඃ ॥ 20 ॥
ක්ෂිප්රං සුනිශිතෛර්බාණෛර්හන්යතාං යුධි රාවණඃ ।
භ්රාතුරාදේශමාජ්ඤාය ලක්ෂ්මණෝ වා පරංතපඃ ॥ 21 ॥
ස කිමර්ථං නරවරෝ න මාං රක්ෂති රාඝවඃ ।
ශක්තෞ තෞ පුරුෂව්යාඝ්රෞ වාය්වග්නිසමතේජසෞ ॥ 22 ॥
සුරාණාමපි දුර්ධර්ෂෞ කිමර්ථං මාමුපේක්ෂතඃ ।
මමෛව දුෂ්කෘතං කිංචින්මහදස්ති න සංශයඃ ॥ 23 ॥
සමර්ථෞ සහිතෞ යන්මාං නාවේක්ෂේතේ පරංතපෞ ।
වෛදේහ්යා වචනං ශ්රුත්වා කරුණං සාශ්රු භාෂිතම් ।
පුනරප්යහමාර්යාං තාමිදං වචනමබ්රුවම් ॥ 24 ॥
ත්වච්ඡෝකවිමුඛෝ රාමෝ දේවි සත්යේන තේ ශපේ ॥ 25 ॥
රාමේ දුඃඛාභිභූතේ තු ලක්ෂ්මණඃ පරිතප්යතේ ।
කථංචිද්භවතී දෘෂ්ටා න කාලඃ පරිශෝචිතුම් ॥ 26 ॥
අස්මින්මුහූර්තේ දුඃඛානාමංතං ද්රක්ෂ්යසි භාමිනි ।
තාවුභෞ නරශාර්දූලෞ රාජපුත්රාවනිංදිතෞ ॥ 27 ॥
ත්වද්දර්ශනකෘතෝත්සාහෞ ලංකාං භස්මීකරිෂ්යතඃ ।
හත්වා ච සමරේ රෞද්රං රාවණං සහ බාංධවම් ॥ 28 ॥
රාඝවස්ත්වාං වරාරෝහේ ස්වාං පුරීං නයතේ ධ්රුවම් ।
යත්තු රාමෝ විජානීයාදභිජ්ඤානමනිංදිතේ ॥ 29 ॥
ප්රීතිසංජනනං තස්ය ප්රදාතුං ත්වමිහාර්හසි ।
සාභිවීක්ෂ්ය දිශස්සර්වා වේණ්යුද්ග්රථිතමුත්තමම් ॥ 30 ॥
මුක්ත්වා වස්ත්රාද්දදෞ මහ්යං මණිමේතං මහාබල ।
ප්රතිගෘහ්ය මණිං දිව්යං තව හේතෝ රඝූද්වහ ॥ 31 ॥
ශිරසා තාං ප්රණම්යාර්යාමහමාගමනේ ත්වරේ ।
ගමනේ ච කෘතෝත්සාහමවේක්ෂ්ය වරවර්ණිනී ॥ 32 ॥
විවර්ධමානං ච හි මාමුවාච ජනකාත්මජා ।
අශ්රුපූර්ණමුඛී දීනා බාෂ්පසංදිග්ධභාෂිණී ॥ 33 ॥
මමෝත්පතනසංභ්රාංතා ශෝකවේගසමාහතා ।
හනුමන් සිංහසංකාශාවුභෞ තෞ රාමලක්ෂ්මණෞ ॥ 34 ॥
සුග්රීවංච සහාමාත්යං සර්වාන් බ්රූයා හ්යනාමයම් ।
යථා ච ස මහාබාහුර්මාං තාරයති රාඝවඃ ।
අස්මාද්ධුඃඛාංබුසංරෝධාත්ත්වං සමාධාතුමර්හසි ॥ 35 ॥
ඉමං ච තීව්රං මම ශෝකවේගං රක්ෂෝභිරේභිඃ පරිභර්ත්සනං ච ।
බ්රූයාස්තු රාමස්ය ගතස්සමීපං ශිවශ්ච තේऽධ්වාස්තු හරිප්රවීර ॥ 36 ॥
ඒතත්තවාර්යා නෘපරාජසිංහ සීතා වචඃ ප්රාහ විෂාදපූර්වම් ।
ඒතච්ච බුද්ධ්වා ගදිතං මයා ත්වං ශ්රද්ධත්ස්ව සීතාං කුශලාං සමග්රාම් ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ සප්තෂෂ්ටිතමස්සර්ගඃ ॥
