ශ්රීමද්වාල්මීකීය රාමායණේ අයෝධ්යාකාංඩම් ।
අථ පංචචත්වාරිංශස්සර්ගඃ ।
අනුරක්තා මහාත්මානං රාමං සත්යපරාක්රමම් ।
අනුජග්මුඃ ප්රයාංතං තං වනවාසාය මානවාඃ ॥ 1 ॥
නිවර්තිතේऽපි ච බලාත්සුහෘද්වර්ගේ ච රාජනි ।
නෛව තේ සංන්යවර්තංත රාමස්යානුගතා රථම් ॥ 2 ॥
අයෝධ්යානිලයානාං හි පුරුෂාණාං මහායශාඃ ।
බභූව ගුණසංපන්නඃ පූර්ණචංද්ර ඉව ප්රියඃ ॥ 3 ॥
ස යාච්යමානඃ කාකුත්ස්ථඃ ස්වාභිඃ ප්රකෘතිභිස්තදා ।
කුර්වාණඃ පිතරං සත්යං වනමේවාන්වපද්යත ॥ 4 ॥
අවේක්ෂමාණඃ සස්නේහං චක්ෂුෂා ප්රපිබන්නිව ।
උවාච රාමඃ ස්නේහේන තාඃ ප්රජාඃ ස්වාඃ ප්රජා ඉව ॥ 5 ॥
යා ප්රීතිර්බහුමානශ්ච මය්යයෝධ්යානිවාසිනාම් ।
මත්ප්රියාර්ථං විශේෂේණ භරතේ සා නිවේශ්යතාම් ॥ 6 ॥
ස හි කල්යාණචාරිත්රඃ කෛකේය්යානංදවර්ධනඃ ।
කරිෂ්යති යථාවද්වඃ ප්රියාණි ච හිතානි ච ॥ 7 ॥
ජ්ඤානවෘද්ධෝ වයෝබාලෝ මෘදුර්වීර්යගුණාන්විතඃ ।
අනුරූපඃ ස වෝ භර්තා භවිෂ්යති භයාපහඃ ॥ 8 ॥
ස හි රාජගුණෛර්යුක්තෝ යුවරාජඃ සමීක්ෂිතඃ ।
අපි චාපි මයා ශිෂ්ටෛඃ කාර්යං වෝ භර්තෘශාසනම් ॥ 9 ॥
න ච සංතප්යේද්යථා චාසෞ වනවාසං ගතේ මයි ।
මහාරාජස්තථා කාර්යෝ මම ප්රියචිකීර්ෂයා ॥ 10 ॥
යථා යථා දාශරථි ර්ධර්ම ඒවාස්ථිතෝऽභවත් ।
තථා තථා ප්රකෘතයෝ රාමං පතිමකාමයන් ॥ 11 ॥
බාෂ්පේණ පිහිතං දීනං රාමඃ සෞමිත්රිණා සහ ।
චකර්ෂේව ගුණෛර්බද්ධ්වා ජනං පුරනිවාසිනම් ॥ 12 ॥
තේ ද්විජාස්ත්රිවිධං වෘද්ධා ජ්ඤානේන වයසෞජසා ।
වයඃ ප්රකංපශිරසෝ දූරාදූචුරිදං වචඃ ॥ 13 ॥
වහංතෝ ජවනා රාමං භෝ භෝ ජාත්යාස්තුරංගමාඃ ।
නිවර්තධ්වං න ගංතව්යං හිතා භවත භර්තරි ॥ 14 ॥
කර්ණවංති හි භූතානි විශේෂේණ තුරංගමාඃ ।
යූයං තස්මාන්නිවර්තධ්වං යාචනාං ප්රතිවේදිතාඃ ॥ 15 ॥
ධර්මතඃ ස විශුද්ධාත්මා වීරඃ ශුභදෘඪව්රතඃ ।
උපවාහ්යස්තු වෝ භර්තා නාපවාහ්යඃ පුරාද්වනම් ॥ 16 ॥
ඒවමාර්තප්රලාපාංස්තාන් වෘද්ධාන් ප්රලපතෝ ද්විජාන් ।
අවේක්ෂ්ය සහසා රාමෝ රථාදවතතාර හ ॥ 17 ॥
පද්භ්යාමේව ජගාමාථ සසීත ස්සහලක්ෂ්මණඃ ।
සන්නිකෘෂ්ටපදන්යාසෝ රාමෝ වනපරායණඃ ॥ 18 ॥
ද්විජාතීංස්තු පදාතීංස්තාන් රාමශ්චාරිත්රවත්සලඃ ।
න ශශාක ඝෘණාචක්ෂුඃ පරිමෝක්තුං රථේන සඃ ॥ 19 ॥
ගච්ඡංතමේව තං දෘෂ්ට්වා රාමං සංභ්රාංතචේතසඃ ।
ඌචුඃ පරමසංතප්තා රාමං වාක්යමිදං ද්විජාඃ ॥ 20 ॥
බ්රාහ්මණ්යං සර්වමේතත්ත්වාං බ්රහ්මණ්යමනුගච්ඡති ।
ද්විජස්කංධාධිරූඪාස්ත්වාමග්නයෝऽප්යනුයාංත්යමී ॥ 21 ॥
වාජපේයසමුත්ථානි ඡත්රාණ්යේතානි පශ්ය නඃ ।
පෘෂ්ඨතෝऽනුප්රයාතානි මේඝානිව ජලාත්යයේ ॥ 22 ॥
අනවාප්තාතපත්රස්ය රශ්මිසංතාපිතස්ය තේ ।
ඒභිශ්ඡායාං කරිෂ්යාමඃ ස්වෛශ්ඡත්රෛර්වාජපේයිකෛඃ ॥ 23 ॥
යා හි නඃ සතතං බුද්ධිර්වේදමංත්රානුසාරිණී ।
ත්වත්කෘතේ සා කෘතා වත්ස වනවාසානුසාරිණී ॥ 24 ॥
හෘදයේෂ්වේව තිෂ්ඨංති වේදා යේ නඃ පරං ධනම් ।
වත්ස්යංත්යපි ගෘහේෂ්වේව දාරාශ්චාරිත්රරක්ෂිතාඃ ॥ 25 ॥
න පුනර්නිශ්චයඃ කාර්යස්ත්වද්ගතෞ සුකෘතා මතිඃ ।
ත්වයි ධර්මව්යපේක්ෂේ තු කිං ස්යාද්ධර්මපථේ ස්ථිතම් ॥ 26 ॥
යාචිතෝ නෝ නිවර්තස්ව හංසශුක්ලශිරෝරුහෛඃ ।
ශිරෝභිර්නිභෘතාචාර මහීපතනපාංසුලෛඃ ॥ 27 ॥
බහූනාං විතතා යජ්ඤා ද්විජානාං ය ඉහාගතාඃ ।
තේෂාං සමාප්තිරායත්තා තව වත්ස නිවර්තනේ ॥ 28 ॥
භක්තිමංති හි භූතානි ජංගමාජංගමානි ච ।
යාචමානේෂු රාම ත්වං භක්තිං භක්තේෂු දර්ශය ॥ 29 ॥
අනුගංතුමශක්තා ස්ත්වාං මූලෛරුද්ධතවේගිනඃ ।
උන්නතා වායුවේගේන වික්රෝශංතීව පාදපාඃ ॥ 30 ॥
නිශ්චේෂ්ටාහාරසංචාරා වෘක්ෂෛකස්ථානවිෂ්ඨිතාඃ ।
පක්ෂිණෝऽපි ප්රයාචංතේ සර්වභූතානුකංපිනම් ॥ 31 ॥
ඒවං වික්රෝශතාං තේෂාං ද්විජාතීනාං නිවර්තනේ ।
දදෘශේ තමසා තත්ර වාරයංතීව රාඝවම් ॥ 32 ॥
තතඃ සුමංත්රෝऽපි රථාද්විමුච්ය ශ්රාංතාන්හයාන්සංපරිවර්ත්ය ශීඝ්රම් ।
පීතෝදකාංස්තෝයපරිප්ලුතාංගා නචාරයද්වෛ තමසාවිදූරේ ॥ 33 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ පංචචත්වාරිංශස්සර්ගඃ ॥
