ශ්රීමද්වාල්මීකීය රාමායණේ බාලකාංඩම් ।
අථ ඒකත්රිංශස්සර්ගඃ ।
අථ තාං රජනීං තත්ර කෘතාර්ථෞ රාමලක්ෂ්මණෞ ।
ඌෂතුර්මුදිතෞ වීරෞ ප්රහෘෂ්ටේනාංතරාත්මනා ॥ 1 ॥
ප්රභාතායාං තු ශර්වර්යාං කෘතපෞර්වාහ්ණිකක්රියෞ ।
විශ්වාමිත්රමෘෂීංශ්චාන්යාන් සහිතාවභිජග්මතුඃ ॥ 2 ॥
අභිවාද්ය මුනිශ්රේෂ්ඨං ජ්වලංතමිව පාවකම් ।
ඌචතුර්මධුරෝදාරං වාක්යං මධුරභාෂිණෞ ॥ 3 ॥
ඉමෞ ස්ම මුනිශාර්දූල කිංකරෞ සමුපස්ථිතෞ ।
ආජ්ඤාපය යථේෂ්ටං වෛ ශාසනං කරවාව කිම් ॥ 4 ॥
ඒවමුක්තා ස්තතස්තාභ්යාං සර්ව ඒව මහර්ෂයඃ ।
විශ්වාමිත්රං පුරස්කෘත්ය රාමං වචනමබ්රුවන් ॥ 5 ॥
මෛථිලස්ය නරශ්රේෂ්ඨ ජනකස්ය භවිෂ්යති ।
යජ්ඤඃ පරමධර්මිෂ්ඨස්තස්ය යාස්යාමහේ වයම් ॥ 6 ॥
ත්වං චෛව නරශාර්දූල සහාස්මාභිර්ගමිෂ්යසි ।
අද්භුතං ධනුරත්නං ච තත්ර තද්රෂ්ටුමර්හසි ॥ 7 ॥
තද්ධි පූර්වං නරශ්රේෂ්ඨ දත්තං සදසි දෛවතෛඃ ।
අප්රමේයබලං ඝෝරං මඛේ පරමභාස්වරම් ॥ 8 ॥
නාස්ය දේවා න ගංධර්වා නාසුරා න ච රාක්ෂසාඃ ।
කර්තුමාරෝපණං ශක්තා න කථංචන මානුෂාඃ ॥ 9 ॥
ධනුෂස්තස්ය වීර්යං තු ජිජ්ඤාසංතෝ මහීක්ෂිතඃ ।
න ශේකුරාරෝපයිතුං රාජපුත්රා මහාබලාඃ ॥ 10 ॥
තද්ධනුර්නරශාර්දූල මෛථිලස්ය මහාත්මනඃ ।
තත්ර ද්රක්ෂ්යසි කාකුත්ස්ථ යජ්ඤං චාද්භුතදර්ශනම් ॥ 11 ॥
තද්ධි යජ්ඤඵලං තේන මෛථිලේනෝත්තමං ධනුඃ ।
යාචිතං නරශාර්දූල සුනාභං සර්වදෛවතෛඃ ॥ 12 ॥
ආයාගභූතං නෘපතේස්තස්ය වේශ්මනි රාඝව ।
අර්චිතං විවිධෛර්ගංධෛර්ධූපෛශ්චාගරුගංධිභිඃ ॥ 13 ॥
ඒවමුක්ත්වා මුනිවරඃ ප්රස්ථානමකරෝත්තදා ।
සර්ෂිසංඝ ස්සකාකුත්ස්ථඃ ආමංත්ර්ය වනදේවතාඃ ॥ 14 ॥
ස්වස්ති වෝऽස්තු ගමිෂ්යාමි සිද්වස්සිද්ධාශ්රමාදහම් ।
උත්තරේ ජාහ්නවීතීරේ හිමවංතං ශිලෝච්චයම් ॥ 15 ॥
ප්රදක්ෂිණං තතඃ කෘත්වා සිද්ධාශ්රමමනුත්තමම් ।
උත්තරාං දිශමුද්දිශ්ය ප්රස්ථාතුමුපචක්රමේ ॥ 16 ॥
තං ප්රයාංතං මුනිවරමන්වයාදනුසාරිණම් ।
ශකටීශතමාත්රං තු ප්රායේණ බ්රහ්මවාදිනාම් ॥ 17 ॥
මෘගපක්ෂිගණාශ්චෛව සිද්ධාශ්රමනිවාසිනඃ ।
අනුජග්මුර්මහාත්මානං විශ්වාමිත්රං මහාමුනිම් ॥ 18 ॥
නිවර්තයාමාස තතඃ පක්ෂිසංඝාන් මෘගානපි ।
තේ ගත්වා දූරමධ්වානං ලංබමානේ දිවාකරේ ।
වාසං චක්රුර්මුනිගණාඃ ශෝණාකූලේ සමාහිතාඃ ॥ 19 ॥
තේऽස්තං ගතේ දිනකරේ ස්නාත්වා හුතහුතාශනාඃ ।
විශ්වාමිත්රං පුරස්කෘත්ය නිෂේදුරමිතෞජසඃ ॥ 20 ॥
රාමෝऽපි සහසෞමිත්රිර්මුනීං ස්තානභිපූජ්ය ච ।
අග්රතෝ නිෂසාදාථ විශ්වාමිත්රස්ය ධීමතඃ ॥ 21 ॥
අථ රාමෝ මහාතේජාඃ විශ්වාමිත්රං මහාමුනිම් ।
පප්රච්ඡ නරශාර්දූලඃ කෞතූහලසමන්විතඃ ॥ 22 ॥
භගවන් කෝऽන්වයං දේශස්සමෘද්ධවනශෝභිතඃ ।
ශ්රෝතුමිච්ඡාමි භද්රං තේ වක්තුමර්හසි තත්ත්වතඃ ॥ 23 ॥
චෝදිතෝ රාමවාක්යේන කථයාමාස සුව්රතඃ ।
තස්ය දේශස්ය නිඛිලමෘෂිමධ්යේ මහාතපාඃ ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ ඒකත්රිංශස්සර්ගඃ ॥
