ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ද්විපංචාශස්සර්ගඃ ।
අථ තානබ්රවීත්සර්වාන්විශ්රාංතාන්හරියූථපාන් ।
ඉදං වචනමේකාග්රා තාපසී ධර්මචාරිණී ॥ 1 ॥
වානරා යදි වඃ ඛේදඃ ප්රනෂ්ටඃ ඵලභක්ෂණාත් ।
යදි චෛතන්මයා ශ්රාව්යං ශ්රෝතුමිච්ඡාමි කථ්යතාම් ॥ 2 ॥
තස්යාස්තද්වචනං ශ්රුත්වා හනූමාන්මාරුතාත්මජඃ ।
ආර්ජවේන යථාතත්ත්වමාඛ්යාතුමුපචක්රමේ ॥ 3 ॥
රාජා සර්වස්ය ලෝකස්ය මහේංද්රවරුණෝපමඃ ।
රාමෝ දාශරථිශ්ශීමාන්ප්රවිෂ්ටෝ දංඩකාවනම් ॥ 4 ॥
ලක්ෂ්මණේන සහ භ්රාත්රා වෛදේහ්යා චාපි භාර්යයා ।
තස්ය භාර්යා ජනස්ථානාද්රාවණේන හෘතා බලාත් ॥ 5 ॥
වීරස්තස්ය සඛා රාජ්ඤස්සුග්රීවෝ නාම වානරඃ ।
රාජා වානරමුඛ්යානාං යේන ප්රස්ථාපිතා වයම් ॥ 6 ॥
අගස්ත්යචරිතාමාශාං දක්ෂිණාං යමරක්ෂිතාම් ।
සහෛභිර්වානරෛර්ඝෝරෛරංගදප්රමුඛෛර්වයම් ॥ 7 ॥
රාවණං සහිතාස්සර්වේ රාක්ෂසං කාමරූපිණම් ।
සීතයා සහ වෛදේහ්යා මාර්ගධ්වමිති චෝදිතාඃ ॥ 8 ॥
විචිත්ය තු වයං සර්වේ සමග්රාං දක්ෂිණාං දිශම් ।
පරිත්රාංතා බුභුක්ෂිතා වෘක්ෂමූලමුපාශ්රිතාඃ ॥ 9 ॥
විවර්ණවදනාස්සර්වේ සර්වේ ධ්යානපරායණාඃ ।
නාධිගච්ඡාමහේ පාරං මග්නාශ්චිංතාමහාර්ණවේ ॥ 10 ॥
චාරයංතස්තතශ්චක්ෂුර්දෘෂ්ටවංතෝ වයං බිලම් ।
ලතාපාදපසංච්ඡන්නං තිමිරේණ සමාවෘතම් ॥ 11 ॥
අස්මාද්ධංසා ජලක්ලින්නාඃ පක්ෂෛස්සලිලවිස්රවෛඃ ।
කුරරාස්සාරසාශ්චෛව නිෂ්පතංති පතත්රිණඃ ॥ 12 ॥
සාධ්වත්ර ප්රවිශාමේති මයා තූක්තාඃ ප්ලවංගමාඃ ।
තේෂාමපි හි සර්වේෂාමනුමානමුපාගතම් ॥ 13 ॥
ගච්ඡාම ප්රවිශාමේති භර්තෘකාර්යත්වරාන්විතාඃ ।
තතෝ ගාඪං නිපතිතා ගෘහ්ය හස්තෞ පරස්පරම් ॥ 14 ॥
ඉදං ප්රවිෂ්ටාස්සහසා බිලං තිමිරසංවෘතම් ।
ඒතන්නඃ කාර්යමේතේන කෘත්යේන වයමාගතාඃ ॥ 15 ॥
ත්වාං චෛවෝපගතාස්සර්වේ පරිද්යූනා බුභුක්ෂිතාඃ ।
ආතිථ්යධර්මදත්තානි මූලානි ච ඵලානි ච ॥ 16 ॥
අස්මාභිරුපභුක්තානි බුභුක්ෂාපරිපීඩිතෛඃ ।
යත්ත්වයා රක්ෂිතාස්සර්වේ ම්රියමාණා බුභුක්ෂයා ॥ 17 ॥
බ්රූහි ප්රත්යුපකාරාර්ථං කිං තේ කුර්වංතු වානරාඃ ।
ඒවමුක්තා තු ධර්මජ්ඤෛර්වානරෛස්තෛස්ස්වයංප්රභා ॥ 18 ॥
ප්රත්යුවාච තතස්සර්වානිදං වානරපුංගවාන් ।
සර්වේෂාං පරිතුෂ්ටාऽස්මි වානරාණාං තරස්විනාම් ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ද්විපංචාශස්සර්ගඃ ॥
