ශ්රීමද්වාල්මීකීය රාමායණේ අරණ්යකාංඩම් ।
අථ චතුස්ත්රිංශස්සර්ගඃ ।
තතශ්ශූර්පණඛාං දෘෂ්ට්වා බ්රුවංතීං පරුෂං වචඃ ।
අමාත්යමධ්යේ සංක්රුද්ධඃ පරිපප්රච්ඡ රාවණඃ ॥ 1 ॥
කශ්ච රාමඃ කථංවීර්යඃ කිංරූපඃ කිංපරාක්රමඃ ।
කිමර්ථං දංඩකාරණ්යං ප්රවිෂ්ටස්සුදුරාසදම් ॥ 2 ॥
ආයුධං කිංච රාමස්ය නිහතා යේන රාක්ෂසාඃ ।
ඛරශ්ච නිහතස්සංඛ්යේ දූෂණස්ත්රිශිරාස්තථා ॥ 3 ॥
ඉත්යුක්තා රාක්ෂසේංද්රේණ රාක්ෂසී ක්රෝධමූර්ඡිතා ।
තතෝ රාමං යථාතත්වමාඛ්යාතුමුපචක්රමේ ॥ 4 ॥
දීර්ඝබාහුර්විශාලාක්ෂ ශ්චීරකෘෂ්ණාජිනාංබරඃ ।
කංදර්පසමරූපශ්ච රාමෝ දශරථාත්මජඃ ॥ 5 ॥
ශක්රචාපනිභං චාපං විකෘෂ්ය කනකාංගදම් ।
දීප්තාන් ක්ෂිපති නාරාචාන්සර්පානිව මහාවිෂාන් ॥ 6 ॥
නාදදානං ශරාන්ඝෝරාන්නමුංචංතං ශිලීමුඛාන් ।
න කාර්මුකං විකර්ෂංතං රාමං පශ්යාමි සංයුගේ ॥ 7 ॥
හන්යමානං තු තත්සෛන්යං පශ්යාමි ශරවෘෂ්ටිභිඃ ।
ඉංද්රේණේවෝත්තමං සස්යමාහතංත්වශ්මවෘෂ්ටිභිඃ ॥ 8 ॥
රක්ෂසාං භීමරූපාණාං සහස්රාණි චතුර්දශ ।
නිහතානි ශරෛ ස්තීක්ෂ්ණෛස්තේනෛකේන පදාතිනා ॥ 9 ॥
අර්ධාධිකමුහූර්තේන ඛරශ්ච සහදූෂණඃ ।
ඍෂීණාමභයං දත්තං කෘතක්ෂේමාශ්ච දංඩකාඃ ॥ 10 ॥
ඒකා කථංචින්මුක්තාහං පරිභූය මහාත්මනා ।
ස්ත්රීවධං ශංකමානේන රාමේණ විදිතාත්මනා ॥ 11 ॥
භ්රාතා චාස්ය මහාතේජා ගුණතස්තුල්යවික්රමඃ ।
අනුරක්තශ්ච භක්තශ්ච ලක්ෂ්මණෝ නාම වීර්යවාන් ॥ 12 ॥
අමර්ෂී දුර්ජයෝ ජේතා වික්රාංතෝ බුද්ධිමාන්බලී ।
රාමස්ය දක්ෂිණෝ බාහුර්නිත්යං ප්රාණෝ බහිශ්චරඃ ॥ 13 ॥
රාමස්ය තු විශාලාක්ෂී පූර්ණේංදුසදෘශානනා ।
ධර්මපත්නී ප්රියා භර්තුර්නිත්යං ප්රියහිතේ රතා ॥ 14 ॥
සා සුකේශී සුනාසෝරුස්සුරූපා ච යශස්විනී ।
දේවතේව වනස්යාස්ය රාජතේ ශ්රීරිවාපරා ॥ 15 ॥
තප්තකාංචනවර්ණාභා රක්තතුංගනඛී ශුභා ।
සීතා නාම වරාරෝහා වෛදේහී තනුමධ්යමා ॥ 16 ॥
නෛව දේවී න ගංධර්වී න යක්ෂී න ච කින්නරී ।
නෛවංරූපා මයා නාරී දෘෂ්ටපූර්වා මහීතලේ ॥ 17 ॥
යස්ය සීතා භවේද්භාර්යා යං ච හෘෂ්ටා පරිෂ්වජේත් ।
අතිජීවේත්ස සර්වේෂු ලෝකේෂ්වපි පුරංදරාත් ॥ 18 ॥
සා සුශීලා වපුශ්ශ්ලාඝ්යා රූපේණාප්රතිමා භුවි ।
තවානුරූපා භාර්යා ස්යාත්ත්වං ච තස්යාස්තථා පතිඃ ॥ 19 ॥
තාං තු විස්තීර්ණජඝනාං පීනශ්රෝණිපයෝධරාම් ।
භාර්යාර්ථේ ච තවානේතුමුද්යතාහං වරානනාම් ॥ 20 ॥
විරූපිතාස්මි ක්රූරේණ ලක්ෂ්මණේන මහාභුජ ।
තාං තු දෘෂ්ට්වාද්ය වෛදේහීං පූර්ණචංද්රනිභානනාම් ।
මන්මථස්ය ශරාණාං වෛ ත්වං විධේයෝ භවිෂ්යසි ॥ 21 ॥
යදි තස්යාමභිප්රායෝ භාර්යාර්ථේ තව ජායතේ ।
ශීඝ්රමුද්ධ්රියතාං පාදෝ ජයාර්ථමිහ දක්ෂිණඃ ॥ 22 ॥
කුරු ප්රියං තථා තේෂාං රක්ෂසාං රාක්ෂසේශ්වර ।
වධාත්තස්ය නෘශංසස්ය රාමස්යාශ්රමවාසිනඃ ॥ 23 ॥
තං ශරෛර්නිශිතෛර්හත්වා ලක්ෂ්මණං ච මහාරථම් ।
හතනාථාං සුඛං සීතාං යථාවදුපභෝක්ෂ්යසි ॥ 24 ॥
රෝචතේ යති තේ වාක්යං මමෛතද්රාක්ෂසේශ්වර ।
ක්රියතාං නිර්විශංකේන වචනං මම රාවණ ॥ 25 ॥
විජ්ඤායේහාත්මශක්තිං ච හ්රියතාමබලා බලාත් ।
සීතා සර්වානවද්යාංගී භාර්යාර්ථේ රාක්ෂසේශ්වර ॥ 26 ॥
නිශම්ය රාමේණ ශරෛරජිහ්මගෛ ර්හතාන් ජනස්ථානගතාන්නිශාචරාන් ।
ඛරං ච බුද්ධ්වා නිහතං ච දූෂණං ත්වමත්ර කෘත්යං ප්රතිපත්තුමර්හසි ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චතුස්ත්රිංශස්සර්ගඃ ॥
