ශ්රීමද්වාල්මීකීය රාමායණේ අරණ්යකාංඩම් ।
අථ සප්තචත්වාරිංශස්සර්ගඃ ।
රාවණේන තු වෛදේහී තදා පෘෂ්ටා ජිහීර්ෂතා ।
පරිව්රාජකරූපේණ ශශංසාත්මානමාත්මනා ॥ 1 ॥
බ්රාහ්මණශ්චාතිථිශ්චායමනුක්තෝ හි ශපේත මාම් ।
ඉති ධ්යාත්වා මුහූර්තං තු සීතා වචනමබ්රවීත් ॥ 2 ॥
දුහිතා ජනකස්යාහං මෛථිලස්ය මහාත්මනඃ ।
සීතා නාම්නාස්මි භද්රං තේ රාමභාර්යා ද්විජෝත්තම ॥ 3 ॥
උෂිත්වා ද්වාදශ සමා ඉක්ෂ්වාකුණාං නිවේශනේ ।
භුංජානා මානුෂාන්භෝගාන්සර්වකාමසමෘද්ධිනී ॥ 4 ॥
තතස්ත්රයෝදශේ වර්ෂේ රාජාමංත්රයත ප්රභුඃ ।
අභිෂේචයිතුං රාමං සමේතෝ රාජමංත්රිභිඃ ॥ 5 ॥
තස්මින්සංභ්රියමාණේ තු රාඝවස්යාභිෂේචනේ ।
කෛකේයී නාම භර්තාරමාර්යා සා යාචතේ වරම් ॥ 6 ॥
ප්රතිගෘහ්ය තු කෛකේයී ශ්වශුරං සුකෘතේන මේ ।
මම ප්රව්රාජනං භර්තුර්භරතස්යාභිෂේචනම් ॥ 7 ॥
ද්වාවයාචත භර්තාරං සත්යසංධං නෘපෝත්තමම් ।
නාද්ය භෝක්ෂ්යේ න ච ස්වප්ස්යේ න පාස්යේච කථංචන ॥ 8 ॥
ඒෂ මේ ජීවිතස්යාංතෝ රාමෝ යද්යභිෂිච්යතේ ।
ඉති බ්රුවාණාං කෛකේයීං ශ්වශුරෝ මේ ස මානදඃ ॥ 9 ॥
අයාචතාර්ථෛරන්වර්ථෛර්න ච යාංචාං චකාර සා ।
මම භර්තාමහාතේජා වයසා පංචවිංශකඃ ॥ 10 ॥
අෂ්ටාදශ හි වර්ෂාණි මම ජන්මනි ගණ්යතේ ।
රාමේති ප්රථිතෝ ලෝකේ ගුණවාන්සත්යවාන්ශුචිඃ ॥ 11 ॥
විශාලාක්ෂෝ මහාබාහුස්සර්වභූතහිතේ රතඃ ।
කාමාර්තස්තු මහාතේජාඃ පිතා දශරථස්ස්වයම් ॥ 12 ॥
කෛකේය්යාඃ ප්රියකාමාර්ථං තං රාමං නාභ්යෂේචයත් ।
අභිෂේකාය තු පිතුස්සමීපං රාමමාගතම් ॥ 13 ॥
කෛකේයී මම භර්තාරමිත්යුවාච ධෘතං වචඃ ।
තව පිත්රා සමාජ්ඤප්තං මමේදං ශෘණු රාඝව ॥ 14 ॥
භරතාය ප්රදාතව්යමිදං රාජ්යමකංටකම් ।
ත්වයා හි ඛලු වස්තව්යං නව වර්ෂාණි පංච ච ॥ 15 ॥
වනේ ප්රව්රජ කාකුත්ස්ථ පිතරං මෝචයානෘතාන් ।
තථේත්යුක්ත්වා ච තාං රාමඃ කෛකේයීමකුතෝභයඃ ॥ 16 ॥
චකාර තද්වචස්තස්යා මම භර්තා දෘඪව්රතඃ ।
දද්යාන්න ප්රතිගෘහ්ණීයාත්සත්යං බ්රූයාන්න චානෘතම් ॥ 17 ॥
ඒතද්බ්රාහ්මණ රාමස්ය ධ්රෘවං ව්රතමනුත්තමම් ।
තස්ය භ්රාතා තු ද්වෛමාත්රෝ ලක්ෂ්මණෝ නාම වීර්යවාන් ॥ 18 ॥
රාමස්ය පුරුෂව්යාඝ්රස්සහායස්සමරේරිහා ।
ස භ්රාතා ලක්ෂ්මණෝ නාම ධර්මචාරී දෘඪව්රතඃ ॥ 19 ॥
අන්වගච්ඡද්දනුෂ්පාණිඃ ප්රව්රජංතං මයා සහ ।
ජටී තාපසරූපේණ මයා සහ සහානුජඃ ॥ 20 ॥
ප්රවිෂ්ටෝ දංඩකාරණ්යං ධර්මනිත්යෝ ජිතේංද්රියඃ ।
තේ වයං ප්රච්යුතා රාජ්යාත්කෛකේය්යාස්තු කෘතේ ත්රයඃ ॥ 21 ॥
විචරාමෝ ද්විජශ්රේෂ්ඨ වනං ගංභීරමෝජසා ।
සමාශ්වස මුහූර්තං තු ශක්යං වස්තුමිහ ත්වයා ॥ 22 ॥
ආගමිෂ්යති මේ භර්තා වන්යමාදාය පුෂ්කලම් ।
රුරූන්ගෝධා න්වරාහාංශ්ච හත්වාऽදායාऽමිෂාන්බහූන් ॥ 23 ॥
ස ත්වං නාම ච ගෝත්රංච කුලං චාචක්ෂ්ව තත්ත්වතඃ ।
ඒකශ්ච දංඩකාරණ්යේ කිමර්ථං චරසි ද්විජ ॥ 24 ॥
ඒවං බෘවංත්යාං සීතායාං රාමපත්න්යාං මහාබලඃ ।
ප්රත්යුවාචෝත්තරං තීව්රං රාවණෝ රාක්ෂසාධිපඃ ॥ 25 ॥
යේන විත්රාසිතා ලෝකාස්සදේවාසුරපන්නගාඃ ।
අහං තු රාවණෝ නාම සීතේ රක්ෂෝගණේශ්වරඃ ॥ 26 ॥
ත්වාං තු කාංචනවර්ණාභාං දෘෂ්ට්වා කෞශේයවාසිනීම් ।
රතිං ස්වකේෂු දාරේෂු නාධිගච්ඡාම්යනිංදිතේ ॥ 27 ॥
බහ්වීනාමුත්තමස්ත්රීණාමාහෘතානාමිතස්තතඃ ।
සර්වාසාමේව භද්රං තේ මමාග්රමහිෂී භව ॥ 28 ॥
ලංකානාම සමුද්රස්ය මම මධ්යේ මහාපුරී ।
සාගරේණ පරික්ෂිස්තා නිවිෂ්ටා නගමූර්ධනි ॥ 29 ॥
තත්ර සීතේ මයා සාර්ධං වනේෂු විහරිෂ්යසි ।
න චාස්යාරණ්යවාසස්ය ස්පෘහයිෂ්යසි භාමිනි ॥ 30 ॥
පංච දාස්යස්සහස්රාණි සර්වාභරණභූෂිතාඃ ।
සීතේ පරිචරිෂ්යංති භාර්යා භවසි මේ යදි ॥ 31 ॥
රාවණේනෛවමුක්තා තු කුපිතා ජනකාත්මජා ।
ප්රත්යුවාචානවද්යාංගී තමනාදෘත්ය රාක්ෂසම් ॥ 32 ॥
මහාගිරිමිවාකංප්යං මහේංද්රසදෘශං පතිම් ।
මහෝදධිමිවාක්ෂෝභ්යමහං රාමමනුව්රතා ॥ 33 ॥
සර්වලක්ෂණසංපන්නං න්යග්රෝධපරිමංඩලම් ।
සත්යසංධං මහාභාගමහං රාමමනුව්රතා ॥ 34 ॥
මහාබාහුං මහෝරස්කං සිංහවික්රාංතගාමිනම් ।
නෘසිංහං සිංහසංකාශමහං රාමමනුව්රතා ॥ 35 ॥
පූර්ණචංද්රානනං රාමං රාජවත්සං ජිතේංද්රියම් ।
පෘථුකීර්තිං මහාත්මානමහං රාමමනුව්රතා ॥ 36 ॥
ත්වං පුනර්ජංබුකස්සිංහීං මාමිච්ඡසි සුදුර්ලභාම් ।
නාහං ශක්යා ත්වයා ස්ප්රෂ්ටුමාදිත්යස්ය ප්රභා යථා ॥ 37 ॥
පාදපාන්කාංචනාන්නූනං බහූන්පශ්යසි මංදභාක් ।
රාඝපස්ය ප්රියාං භාර්යාං යස්ත්වමිච්ඡසි රාවණ ॥ 38 ॥
ක්ෂුධිතස්ය හි සිංහස්ය මෘගශත්රෝස්තරස්විනඃ ।
ආශීවිෂස්ය මුඛාද්දංෂ්ට්රාමාදාතුමිච්ඡසි ॥ 39 ॥
මංදරං පර්වතශ්රේෂ්ඨං පාණිනා හර්තුමිච්ඡසි ।
කාලකූටං විෂං පීත්වා ස්වස්තිමාන්ගංතුමිච්ඡසි ॥ 40 ॥
අක්ෂි සූච්යා ප්රමෘජසි ජිහ්වයා ලේක්ෂි ච ක්ෂුරම් ।
රාඝවස්ය ප්රියාං භාර්යාං යෝऽධිගංතුං ත්වමිච්ඡසි ॥ 41 ॥
අවසජ්ය ශිලාං කංඨේ සමුද්රං තර්තුමිච්ඡසි ।
සූර්යාචංද්රමසෞ චෝභෞ පාණිභ්යාං හර්තුමිච්ඡසි ॥ 42 ॥
යෝ රාමස්ය ප්රියාං භාර්යාං ප්රධර්ෂයිතුමිච්ඡසි ।
අග්නිං ප්රජ්වලිතං දෘෂ්ට්වා වස්ත්රේණාහර්තුමිච්ඡසි ॥ 43 ॥
කාල්යාණවෘත්තාං රාමස්ය යෝ භාර්යාංහර්තුමිච්ඡසි ।
අයෝමුඛානාං ශූලානාමග්රේ චරිතුමිච්ඡසි ॥ 44 ॥
රාමස්ය සදෘශීං භාර්යාං යෝऽධිගංතුං ත්වමිච්ඡසි ।
යදංතරං සිංහශෘගාලයෝර්වනේ යදංතරං ස්යංදිනිකා සමුද්රයෝඃ ।
සුරාග්ර්ය සෞවීරකයෝර්යදංතරං තදංතරං වෛ තව රාඝවස්ය ච ॥ 45 ॥
යදංතරං කාංචනසීසලෝහයෝර්යදංතරං චංදනවාරිපංකයෝඃ ।
යදංතරං හස්තිබිඩාලයෝර්වනේ තදංතරං දාශරථේස්තවෛව ච ॥ 46 ॥
යදංතරං වායසවෛනතේයයෝර්යදංතරං මද්ගුමයූරයෝරපි ।
යදංතරං සාරසගෘධ්රයෝර්වනේ තදංතරං දාශරථේස්තවෛව ච ॥ 47 ॥
තස්මින්සහස්රාක්ෂසමප්රභාවේ රාමේ ස්ථිතේ කාර්මුකබාණපාණෞ ।
හෘතාපි තේහං න ජරාං ගමිෂ්යේ වජ්රං යථා මක්ෂිකයාවගීර්ණම් ॥ 48 ॥
ඉතීව තද්වාක්යමදුෂ්ටභාවා සුදුෂ්ටමුක්ත්වා රජනීචරං තම් ।
ගාත්රප්රකංපාද්ව්යථිතා බභූව වාතෝද්ධතා සා කදලීව තන්වී ॥ 49 ॥
තාං වේපමානාමුපලක්ෂ්ය සීතාං ස රාවණෝ මෘත්යුසමප්රභාවඃ ।
කුලං බලං නාම ච කර්ම චාත්මනඃ සමාචචක්ෂේ භයකාරණාර්ථම් ॥ 50 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තචත්වාරිංශස්සර්ගඃ ॥
