śrīmadvālmīkīya rāmāyaṇē bālakāṇḍam ।
atha ēkōnaviṃśassargaḥ ।
tachChrutvā rājasiṃhasya vākyamadbhutavistaram ।
hṛṣṭarōmā mahātējā viśvāmitrō'bhyabhāṣata ॥ 1 ॥
sadṛśaṃ rājaśārdūla tavaitadbhuvi nānyathā ।
mahāvaṃśaprasūtasya vasiṣṭhavyapadēśinaḥ ॥ 2 ॥
yattu mē hṛdgataṃ vākyaṃ tasya kāryasya niśchayam ।
kurūṣva rājaśārdūla bhava satyapratiśravaḥ ॥ 3 ॥
ahanniyamamātiṣṭhē sidhyarthaṃ puruṣarṣabha ।
tasya vighnakarau dvau tu rākṣasau kāmarūpiṇau ॥ 4 ॥
vratē mē bahuśaśchīrṇē samāptyāṃ rākṣasāvimau ।
mārīchaścha subāhuścha vīryavantau suśikṣitau ॥ 5 ॥
samāṃsarudhiraughēṇa vēdiṃ tāmabhyavarṣatām ।
avadhūtē tathābhūtē tasminniyamaniśchayē ॥ 6 ॥
kṛtaśramō nirutsāhastasmāddēśādapākramē ।
na cha mē krōdhamutsraṣṭuṃ buddhirbhavati pārthiva ॥ 7 ॥
tathā bhūtā hi sā charyā na śāpastatra muchyatē ।
svaputraṃ rājaśārdūla rāmaṃ satyaparākramam ॥ 8 ॥
kākapakṣadharaṃ śūraṃ jyēṣṭhaṃ mē dātumarhasi ।
śaktō hyēṣa mayā guptō divyēna svēna tējasā ॥ 9 ॥
rākṣasā yē vikartārastēṣāmapi vināśanē ।
śrēyaśchāsmai pradāsyāmi bahurūpaṃ na saṃśayaḥ ॥ 10 ॥
trayāṇāmapi lōkānāṃ yēna khyātiṃ gamiṣyati ।
na cha tau rāmamāsādya śaktau sthātuṃ kathañchana ॥ 11 ॥
na cha tau rāghavādanyō hantumutsahatē pumān ।
vīryōtsiktau hi tau pāpau kālapāśavaśaṃ gatau ॥ 12 ॥
rāmasya rājaśārdūla na paryāptau mahātmanaḥ ।
na cha putrakṛtasnēhaṃ kartumarhasi pārthiva ॥ 13 ॥
ahaṃ tē pratijānāmi hatau tau viddhi rākṣasau ।
ahaṃ vēdmi mahātmānaṃ rāmaṃ satyaparākramam ॥ 14 ॥
vasiṣṭhō'pi mahātējā yē chēmē tapasi sthitāḥ ।
yadi tē dharmalābhaṃ cha yaśaścha paramaṃ bhuvi ॥ 15 ॥
sthitamichChasi rājēndra rāmaṃ mē dātumarhasi ।
yadihyanujñāṃ kākutstha dadatē tava mantriṇaḥ ॥ 16 ॥
vasiṣṭhapramukhāḥ sarvē tatō rāmaṃ visarjaya ।
abhiprētamasaṃsaktamātmajaṃ dātumarhasi ॥ 17 ॥
daśarātraṃ hi yajñasya rāmaṃ rājīvalōchanam ।
nātyēti kālō yajñasya yathā'yaṃ mama rāghava ॥ 18 ॥
tathā kuruṣva bhadraṃ tē mā cha śōkē manaḥ kṛthāḥ ।
ityēvamuktvā dharmātmā dharmārthasahitaṃ vachaḥ ॥ 19 ॥
virarāma mahātējā viśvāmitrō mahāmuniḥ ।
sa tanniśamya rājēndrō viśvāmitravachaśśubham ॥ 20 ॥
śōkamabhyagamattīvraṃ vyaṣīdata bhayānvitaḥ ।
iti hṛdayamanōvidāraṇaṃ munivachanaṃ tadatīva śuśruvān ।
narapatirabhavanmahāṃstadā vyathitamanāḥ prachachāla chāsanāt ॥ 21 ॥
ityārṣē śrīmadrāmāyaṇē vālmīkīya ādikāvyē bālakāṇḍē ēkōnaviṃśassargaḥ ॥
