ශ්රීමද්වාල්මීකීය රාමායණේ අරණ්යකාංඩම් ।
අථ චත්වාරිංශස්සර්ගඃ ।
මාරීචේන තු තද්වාක්යං ක්ෂමං යුක්තං ච නිශාචරඃ ।
උක්තෝ න ප්රතිජග්රාහ මර්තුකාම ඉවෞෂධම් ॥ 1 ॥
තං පථ්යහිතවක්තාරං මාරීචං රාක්ෂසාධිපඃ ।
අබ්රවීත්පරුෂං වාක්යමයුක්තං කාලචෝදිතඃ ॥ 2 ॥
යත්කිලෛතදයුක්තාර්ථං මාරීච මයි කථ්යතේ ।
වාක්යං නිෂ්ඵලමත්යර්ථමුප්තං බීජමිවෝෂරේ ॥ 3 ॥
ත්වද්වාක්යෛර්න තු මාං ශක්යං භේත්තුං රාමස්ය සංයුගේ ।
පාපශීලස්ය මූර්ඛස්ය මානුෂස්ය විශේෂතඃ ॥ 4 ॥
යස්ත්යක්ත්වා සුහෘදෝ රාජ්යං මාතරං පිතරං තථා ।
ස්ත්රීවාක්යං ප්රාකෘතං ශ්රුත්වා වනමේකපදේ ගතඃ ॥ 5 ॥
අවශ්යංතු මයා තස්ය සංයුගේ ඛරඝාතිනඃ ।
ප්රාණෛඃ ප්රියතරා සීතා හර්තව්යා තව සන්නිධෞ ॥ 6 ॥
ඒවං මේ නිශ්චිතා බුද්ධිර්හෘදි මාරීච වර්තතේ ।
න ව්යාවර්තයිතුං ශක්යා සේංද්රෛරපි සුරාසුරෛඃ ॥ 7 ॥
දෝෂං ගුණං වා සංපෘෂ්ටස්ත්වමේවං වක්තුමර්හසි ।
අපායං වාප්යුපායං වා කාර්යස්යාස්ය විනිශ්චයේ ॥ 8 ॥
සංපෘෂ්ටේන තු වක්තව්යං සචිවේන විපශ්චිතා ।
උද්යතාංජලිනා රාජ්ඤේ ය ඉච්ඡේද්භූතිමාත්මනඃ ॥ 9 ॥
වාක්යමප්රිතකූලං තු මෘදුපූර්වං හිතං ශුභම් ।
උපචාරේණ යුක්තං ච වක්තව්යෝ වසුධාධිපඃ ॥ 10 ॥
සාවමර්දං තු යද්වාක්යං මාරීච හිතමුච්යතේ ।
නාභිනංදති තද්රාජා මානාර්හෝ මානවර්ජිතම් ॥ 11 ॥
පංච රූපාණි රාජානෝ ධාරයංත්යමිතෞජසඃ ।
අග්නේරිංද්රස්ය සෝමස්ය වරුණස්ය යමස්ය ච ॥ 12 ॥
ඖෂ්ණ්යං තථා වික්රමං ච සෞම්යං දංඩං ප්රසන්නතාම් ।
ධාරයංති මහාත්මානෝ රාජානඃ ක්ෂණදාචර ॥ 13 ॥
තස්මාත්සර්වාස්වවස්ථාසු මාන්යාඃ පූජ්යාශ්ච පාර්ථිවාඃ ।
ත්වං තු ධර්මමවිජ්ඤාය කේවලං මෝහමාස්ථිතඃ ।
අභ්යාගතං මාං දෞරාත්ම්යාත්පරුෂං වක්තුමිච්ඡසි ॥ 14 ॥
ගුණදෝෂෞ න පෘච්ඡාමි ක්ෂමං චාත්මනි රාක්ෂස ।
මයෝක්තං තව චෛතාවත්සංප්රත්යමිතවික්රමඃ ॥ 15 ॥
අස්මිංස්තු ත්වං මහාකෘත්යේ සාහාය්යං කර්තුමර්හසි ।
ශෘණු තත්කර්ම සාහාය්යේ යත්කාර්යං වචනාන්මම ॥ 16 ॥
සෞවර්ණස්ත්වං මෘගෝ භූත්වා චිත්රෝ රජතබිංදුභිඃ ।
ආශ්රමේ තස්ය රාමස්ය සීතායාඃ ප්රමුඛේ චර ॥ 17 ॥
සෞවර්ණස්ත්වං මෘගෝ භූත්වා චිත්රෝ රජතබිංදුභිඃ ।
ආශ්රමේ තස්ය රාමස්ය සීතායාඃ ප්රමුඛේ චර ।
ප්රලෝභයිත්වා වෛදේහීං යථේෂ්ටං ගංතුමර්හසි ॥ 18 ॥
ත්වාං තු මායාමෘගං දෘෂ්ට්වා කාංචනං ජාතවිස්මයා ।
ආනයෛනමිති ක්ෂිප්රං රාමං වක්ෂ්යති මෛථිලී ॥ 19 ॥
අපක්රාංතේ තු කාකුත්ස්ථේ දූරං යාත්වාප්යුදාහර ।
හා සීතේ ලක්ෂ්මණේත්යේවං රාමවාක්යානුරූපකම් ॥ 20 ॥
තච්ඡ්රුත්වා රාමපදවීං සීතයා ච ප්රචෝදිතඃ ।
අනුගච්ඡති සංභ්රාංතඃ සෞමිත්රිරපි සෞහෘදාත් ॥ 21 ॥
අපක්රාංතේ ච කාකුත්ස්ථේ ලක්ෂ්මණේ ච යථාසුඛම් ।
ආනයිෂ්යාමි වෛදේහීං සහස්රාක්ෂශ්ශචීමිව ॥ 22 ॥
ඒවං කෘත්වා ත්විදං කාර්යං යථේෂ්ටං ගච්ඡ රාක්ෂස ।
රාජ්යස්යාර්ධං ප්රයච්ඡාමි මාරීච තව සුව්රත ॥ 23 ॥
ගච්ඡ සෞම්ය ශිවං මාර්ගං කාර්යස්යාස්ය විවෘද්ධයේ ।
අහං ත්වානුගමිෂ්යාමි සරථෝ දංඩකාවනම් ॥ 24 ॥
ප්රාප්ය සීතාමයුද්ධේන වංචයිත්වා තු රාඝවම් ।
ලංකාං ප්රතිගමිෂ්යාමි කෘතකාර්යස්සහ ත්වයා ॥ 25 ॥
න චේත්කරෝෂි මාරීච හන්මි ත්වාමහමද්ය වෛ ।
ඒතත්කාර්යමවශ්යං මේ බලාදපි කරිෂ්යසි ।
රාජ්ඤෝ හි ප්රතිකූලස්ථෝ න ජාතු සුඛමේධතේ ॥ 26 ॥
ආසාද්ය තං ජීවිතසංශයස්තේ මෘත්යුර්ධ්රුවෝ හ්යද්ය මයා විරුධ්ය ।
ඒතද්යථාවත්ප්රතිගෘහ්ය බුද්ධ්යා යදත්ර පථ්යං කුරු තත්තථා ත්වම් ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චත්වාරිංශස්සර්ගඃ ॥
