ශ්රීමද්වාල්මීකීය රාමායණේ අරණ්යකාංඩම් ।
අථ ඒකත්රිංශස්සර්ගඃ ।
ත්වරමාණස්තතෝ ගත්වා ජනස්ථානාදකංපනඃ ।
ප්රවිශ්ය ලංකාං වේගේන රාවණං වාක්යමබ්රවීත් ॥ 1 ॥
ජනස්ථානස්ථිතා රාජන්රාක්ෂසා බහවෝ හතාඃ ।
ඛරශ්ච නිහතස්සංඛ්යේ කථංචිදහමාගතඃ ॥ 2 ॥
ඒවමුක්තෝ දශග්රීවඃ ක්රුද්ධ ස්සංරක්තලෝචනඃ ।
අකංපනමුවාචේදං නිර්දහන්නිව චක්ෂුෂා ॥ 3 ॥
කේන රම්යං ජනස්ථානං හතං මම පරාසුනා ।
කෝ හි සර්වේෂු ලෝකේෂු ගතිං චාධිගමිෂ්යති ॥ 4 ॥
න හි මේ විප්රියං කෘත්වා ශක්යං මඝවතා සුඛම් ।
ප්රාප්තුං වෛශ්රවණේනාපි න යමේන න විෂ්ණුනා ॥ 5 ॥
කාලස්ය චාප්යහං කාලෝ දහේයමපි පාවකම් ।
මෘත්යුං මරණධර්මේණ සංයෝජයිතුමුත්සහේ ॥ 6 ॥
දහේයමපි සංකෘද්ධස්තේජසාऽදිත්යපාවකෞ ।
වාතස්ය තරසා වේගං නිහංතුමහමුත්සහේ ॥ 7 ॥
තථා ක්රුද්ධං දශග්රීවං කෘතාංජලිරකංපනඃ ।
භයාත්සංදිග්ධයා වාචා රාවණං යාචතේऽභයම් ॥ 8 ॥
දශග්රීවෝऽභයං තස්මෛ ප්රදදෞ රක්ෂසාං වරඃ ।
ස විස්රබ්ධෝऽබ්රවීද්වාක්යමසංදිග්ධමකංපනඃ ॥ 9 ॥
පුත්රෝ දශරථස්යාස්ති සිංහසංහනනෝ යුවා ।
රාමෝ නාම වෘෂස්කංධෝ වෘත්තායතමහාභුජඃ ॥ 10 ॥
වීරඃ පෘථුයශාශ්ශ්රීමානතුල්යබලවික්රමඃ ।
හතං තේන ජනස්ථානං ඛරශ්ච සහ දූෂණඃ ॥ 11 ॥
අකංපනවච ශ්රුත්වා රාවණෝ රාක්ෂසාධිපඃ ।
නාගේංද්ර ඉව නිශ්වස්ය වචනං චේදමබ්රවීත් ॥ 12 ॥
ස සුරේංද්රේණ සංයුක්තෝ රාමස්සර්වාමරෛස්සහ ।
උපයාතෝ ජනස්ථානං බ්රූහි කච්චිදකංපන ॥ 13 ॥
රාවණස්ය පුනර්වාක්යං නිශම්ය තදකංපනඃ ।
ආචචක්ෂේ බලං තස්ය වික්රමං ච මහාත්මනඃ ॥ 14 ॥
රාමෝ නාම මහාතේජා ශ්රේෂ්ඨස්සර්වධනුෂ්මතාම් ।
දිව්යාස්ත්රගුණසංපන්නඃ පුරංදරසමෝ යුධි ॥ 15 ॥
තස්යානුරූපෝ බලවාන්රක්තාක්ෂෝ දංදුභිස්වනඃ ।
කනීයාන්ලක්ෂ්මණෝ නාම භ්රාතා ශශිනිභානනඃ ॥ 16 ॥
ස තේන සහ සංයුක්තඃ පාවකේනානිලෝ යථා ।
ශ්රීමාන්රාජවරස්තේන ජනස්ථානං නිපාතිතම් ॥ 17 ॥
නෛව දේවා මහාත්මානෝ නාත්ර කාර්යා විචාරණා ।
ශරා රාමේණ තූත්සෘෂ්ටා රුක්මපුංඛාඃ පතත්රිණඃ ॥ 18 ॥
සර්පාඃ පංචානනා භූත්වා භක්ෂයංති ස්ම රාක්ෂසාන් ।
යේන යේන ච ගච්ඡංති රාක්ෂසා භයකර්ශිතාඃ ॥ 19 ॥
තේන තේන ස්ම පශ්යංති රාමමේවාග්රතඃ ස්ථිතම් ।
ඉත්ථං විනාශිතං තේන ජනස්ථානං තවානඝ ॥ 20 ॥
අකංපනවචශ්රුත්වා රාවණෝ වාක්යමබ්රවීත් ।
ජනස්ථානං ගමිෂ්යාමි හංතුං රාමං සලක්ෂ්මණම් ॥ 21 ॥
අථෛවමුක්තේ වචනේ ප්රෝවාචේදමකංපනඃ ।
ශෘණු රාජන්යථාවෘත්තං රාමස්ය බලපෞරුෂම් ॥ 22 ॥
අසාධ්යඃ කුපිතෝ රාමෝ වික්රමේණ මහායශාඃ ।
ආපගායාස්සුපූර්ණායා වේගං පරිහරේච්ඡරෛඃ ॥ 23 ॥
සතාරග්රහනක්ෂත්රං නභශ්චාප්යවසාදයේත් ।
අසෞ රාමස්තු සීදංතීං ශ්රීමානභ්යුද්ධරේන්මහීම් ॥ 24 ॥
භිත්ත්වා වේලාං සමුද්රස්ය ලෝකානාප්ලාවයේද්විභුඃ ।
වේගං වාපි සමුද්රස්ය වායුං වා විධමේච්ඡරෛඃ ॥ 25 ॥
සංහෘත්ය වා පුනර්ලෝකාන්වික්රමේණ මහායශාඃ ।
ශක්තස්සපුරුෂව්යාඝ්රඃ ස්රෂ්ටුං පුනරපි ප්රජාඃ ॥ 26 ॥
න හි රාමෝ දශග්රීව ශක්යෝ ජේතුං ත්වයා යුධි ।
රක්ෂසාං වාපි ලෝකේන ස්වර්ගඃ පාපජනෛරිව ॥ 27 ॥
න තං වධ්යමහං මන්යේ සර්වෛර්දේවාසුරෛරපි ।
අයං තස්ය වධෝපායස්තන්මමෛකමනාශ්ශෘණු ॥ 28 ॥
භාර්යා තස්යෝත්තමා ලෝකේ සීතා නාම සුමධ්යමා ।
ශ්යාමා සමවිභක්තාංගී ස්ත්රීරත්නං රත්නභූෂිතා ॥ 29 ॥
නෛව දේවී න ගංධර්වී නාප්සරා නාපි දානවී ।
තුල්යා සීමංතිනී තස්යා මානුෂීෂු කුතෝ භවේත් ॥ 30 ॥
තස්යාපහර භාර්යාංත්වං ප්රමථ්ය තු මහාවනේ ।
සීතයා රහිතඃ කාමී රාමෝ හාස්යති ජීවිතම් ॥ 31 ॥
අරෝචයත තද්වාක්යං රාවණෝ රාක්ෂසාධිපඃ ।
චිංතයිත්වා මහාබාහුරකංපනමුවාච හ ॥ 32 ॥
බාඪං කාල්යං ගමිෂ්යාමි හ්යේකස්සාරථිනා සහ ।
ආනයිෂ්යාමි වෛදේහීමිමාං හෘෂ්ටෝ මහාපුරීම් ॥ 33 ॥
අථෛවමුක්ත්වා ප්රයයෞ ඛරයුක්තේන රාවණඃ ।
රථේනාදිත්යවර්ණේන දිශස්සර්වාඃ ප්රකාශයන් ॥ 34 ॥
ස රථෝ රාක්ෂසේංද්රස්ය නක්ෂත්රපථගෝ මහාන් ।
සංචාර්යමාණශ්ශුශුභේ ජලදේ චංද්රමා ඉව ॥ 35 ॥
ස මාරීචාශ්රමං ප්රාප්ය තාටකේයමුපාගමත් ।
මාරීචේනාර්චිතෝ රාජා භක්ෂ්යභෝජ්යෛරමානුෂෛඃ ॥ 36 ॥
තං ස්වයං පූජයිත්වා තු ආසනේනෝදකේන ච ।
අර්ථෝපහිතයා වාචා මාරීචෝ වාක්යමබ්රවීත් ॥ 37 ॥
කච්චිත්සුකුශලං රාජන්ලෝකානාං රාක්ෂසේශ්වර ।
ආශංකේ නාථ ජානේ ත්වං යතස්තූර්ණමිහාගතඃ ॥ 38 ॥
ඒවමුක්තෝ මහාතේජා මාරීචේන ස රාවණඃ ।
තතඃ පශ්චාදිදං වාක්යමබ්රවීද්වාක්යකෝවිදඃ ॥ 39 ॥
ආරක්ෂෝ මේ හතස්තාත රාමේණාක්ලිෂ්ටකර්මණා ।
ජනස්ථානමවධ්ය තත්සර්වං යුධි නිපාතිතම් ॥ 40 ॥
තස්ය මේ කුරු සාචිව්යං තස්ය භාර්යාපහාරණේ ।
රාක්ෂසේංද්රවචශ්ශ්රුත්වා මාරීචෝ වාක්යමබ්රවීත් ॥ 41 ॥
ආඛ්යාතා කේන සීතා සා මිත්රරූපේණ ශත්රුණා ।
ත්වයා රාක්ෂසශාර්දූල කෝ න නංදති නංදිතඃ ॥ 42 ॥
සීතාමිහානයස්වේති කෝ බ්රවීති බ්රවීහි මේ ।
රක්ෂෝලෝකස්ය සර්වස්ය කශ්ශෘංගං ඡේත්තුමිච්ඡති ॥ 43 ॥
ප්රෝත්සාහයති කශ්ච ත්වාං ස ච ශත්රුරසංශයඃ ।
අශීවිෂමුඛාද්දංෂ්ට්රාමුද්ධර්තුං චේච්ඡති ත්වයා ॥ 44 ॥
කර්මණා කේන කේනාසි කාපථං ප්රතිපාදිතඃ ।
සුඛසුප්තස්ය තේ රාජන් ප්රහෘතං කේන මූර්ධනි ॥ 45 ॥
විශුද්ධවංශාභිජනාග්රහස්ත ස්තේජෝමදස්සංස්ථිතදෝර්විෂාණඃ ।
උදීක්ෂිතුං රාවණ නේහ යුක්තඃ ස සංයුගේ රාඝවගංධහස්තී ॥ 46 ॥
අසෞ රණාංතඃ ස්ථිතිසංධිවාලෝ විදග්ධරක්ෂෝමෘගහා නෘසිංහඃ ।
සුප්තස්ත්වයා බෝධයිතුං න යුක්තඃ ශරාංගපූර්ණෝ නිශිතාසිදංෂ්ට්රඃ ॥ 47 ॥
චාපාපහාරේ භුජවේගපංකේ ශරෝර්මිමාලේ සුමහාහවෞඝේ ।
න රාමපාතාලමුඛේऽතිඝෝරේ ප්රස්කංදිතුං රාක්ෂසරාජ යුක්තම් ॥ 48 ॥
ප්රසීද ලංකේශ්වර රාක්ෂසේංද්ර ලංකාං ප්රසන්නෝ භව සාධු ගච්ඡ ।
ත්වං ස්වේෂු දාරේෂු රමස්ව නිත්යං රාමස්සභාර්යෝ රමතාං වනේෂු ॥ 49 ॥
ඒවමුක්තෝ දශග්රීවෝ මාරීචේන ස රාවණඃ ।
න්යවර්තත පුරීං ලංකාං විවේශ ච ගෘහෝත්තමම් ॥ 50 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකත්රිංශස්සර්ගඃ ॥
