ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ද්වාත්රිංශස්සර්ගඃ ।
අංගදස්ය වචශ්ශ්රුත්වා සුග්රීවස්සචිවෛස්සහ ।
ලක්ෂ්මණං කුපිතං ශ්රුත්වා මුමෝචාසනමාත්මවාන් ॥ 1 ॥
සචිවානබ්රවීද්වාක්යං නිශ්චිත්ය ගුරුලාඝවම් ।
මංත්රජ්ඤාන්මංත්රකුශලෝ මංත්රේෂු පරිනිෂ්ඨිතාන් ॥ 2 ॥
න මේ දුර්ව්යාහෘතං කිංචින්නාපි මේ දුරනුෂ්ඨිතම් ।
ලක්ෂ්මණෝ රාඝවභ්රාතා ක්රුද්ධඃ කිමිති චිංතයේ ॥ 3 ॥
අසුහෘද්භිර්මමාමිත්රෛර්නිත්යමංතරදර්ශිභිඃ ।
මම දෝෂානසංභූතාන් ශ්රාවිතෝ රාඝවානුජඃ ॥ 4 ॥
අත්ර තාවද්යථාබුද්ධි සර්වෛරේව යථාවිධි ।
භාවස්ය නිශ්චයස්තාවද්විජ්ඤේයෝ නිපුණං ශනෛඃ ॥ 5 ॥
න ඛල්වස්ති මම ත්රාසෝ ලක්ෂ්මණාන්නාපි රාඝවාත් ।
මිත්රං ත්වස්ථානකුපිතං ජනයත්යේව සංභ්රමම් ॥ 6 ॥
සර්වථා සුකරං මිත්රං දුෂ්කරං පරිපාලනම් ।
අනිත්යත්වාච්ඡ චිත්තානාං ප්රීතිරල්පේපි භිද්යතේ ॥ 7 ॥
අතෝ නිමිත්තං ත්රස්තෝහං රාමේණ තු මහාත්මනා ।
යන්මයෝපකෘතං ශක්යං ප්රතිකර්තුං න තන්මයා ॥ 8 ॥
සුග්රීවේණෛවමුක්තස්තු හනුමාන්හරිපුංගවඃ ।
උවාච ස්වේන තර්කේණ මධ්යේ වානරමංත්රිණාම් ॥ 9 ॥
සර්වථා නෛතදාශ්චර්යං යස්ත්වං හරිගණේශ්වර ।
න විස්මරසි සුස්නිග්ධමුපකාර කෘතං ශුභම් ॥ 10 ॥
රාඝවේණ තු වීරේණ භයමුත්සෘජ්ය දූරතඃ ।
ත්වත්ප්රියාර්ථං හතෝ වාලී ශක්රතුල්යපරාක්රමඃ ॥ 11 ॥
සර්වථා ප්රණයාත්කෘද්ධෝ රාඝවෝ නාත්ර සංශයඃ ।
භ්රාතරං සංප්රහිතවාන්ලක්ෂ්මණං ලක්ෂ්මිවර්ධනම් ॥ 12 ॥
ත්වං ප්රමත්තෝ න ජානීෂේ කාලං කාලවිදාං වර ।
ඵුල්ලසප්තච්ඡදශ්යාමා ප්රවෘත්තා තු ශරච්ඡිවා ॥ 13 ॥
නිර්මලග්රහනක්ෂත්රා ද්යෞඃ ප්රනෂ්ටවලාහකා ।
ප්රසන්නාශ්ච දිශස්සර්වාස්සරිතශ්ච සරාංසි ච ॥ 14 ॥
ප්රාප්තමුද්යෝගකාලං තු නාවෛෂි හරිපුංගව ।
ත්වං ප්රමත්ත ඉති ව්යක්තං ලක්ෂ්මණෝऽයමිහාගතඃ ॥ 15 ॥
ආර්තස්ය හෘතදාරස්ය පුරුෂං පුරුෂාංතරාත් ।
වචනං මර්ෂණීයං තේ රාඝවස්ය මහාත්මනඃ ॥ 16 ॥
කෘතාපරාධස්ය හි තේ නාන්යත්පශ්යාම්යහං ක්ෂමම් ।
අංතරේණාංජලිං බද්ධ්වා ලක්ෂ්මණස්ය ප්රසාදනාත් ॥ 17 ॥
නියුක්තෛර්මංත්රිභිර්වාච්යෝ හ්යවශ්යං පාර්ථිවෝ හිතම් ।
අත ඒව භයං ත්යක්ත්වා බ්රවීම්යවධෘතං වචඃ ॥ 18 ॥
අභික්රුද්ධස්සමර්ථෝ හි චාපමුද්යම්ය රාඝවඃ ।
සදේවාසුරගංධර්වං වශේ ස්ථාපයිතුං ජගත් ॥ 19 ॥
න ස ක්ෂමඃ කෝපයිතුං යඃ ප්රසාද්යඃ පුනර්භවේත් ।
පූර්වෝපකාරං ස්මරතා කෘතජ්ඤේන විශේෂතඃ ॥ 20 ॥
තස්ය මූර්ධ්නා ප්රණම්ය ත්වං සපුත්රස්සසුහෘජ්ජනඃ ।
රාජංස්තිෂ්ඨස්ව සමයේ භර්තුර්භාර්යේව තද්වශඃ ॥ 21 ॥
න රාමරාමානුජශාසනං ත්වයා කපීංද්ර යුක්තං මනසාऽප්යපෝහිතුම් ।
මනෝ හි තේ ජ්ඤාස්යති මානුෂං බලං ස රාඝවස්යාස්ය සුරේංද්රවර්චසඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ද්වාත්රිංශස්සර්ගඃ ॥
