ශ්රීමද්වාල්මීකීය රාමායණේ කිෂ්කිංධාකාංඩම් ।
අථ සප්තදශස්සර්ගඃ ।
තතශ්ශරේණාභිහතෝ රාමේණ රණකර්කශඃ ।
පපාත සහසා වාලී නිකෘත්ත ඉව පාදපඃ ॥ 1 ॥
ස භූමෞ න්යස්තසර්වාංගස්තප්තකාංචනභූෂණඃ ।
අපතද්දේවරාජස්ය මුක්තරශ්මිරිව ධ්වජඃ ॥ 2 ॥
තස්මින්නිපතිතේ භූමෞ වානරාණාං ගණේශ්වරේ ।
නෂ්ටචංද්රමිව ව්යෝම න ව්යරාජත භූතලම් ॥ 3 ॥
භූමෞ නිපතිතස්යාපි තස්ය දේහං මහාත්මනඃ ।
න ශ්රීර්ජහාති න ප්රාණා න තේජෝ න පරාක්රමඃ ॥ 4 ॥
ශක්රදත්තා වරා මාලා කාංචනී වජ්රභූෂිතා ।
දධාර හරිමුඛ්යස්ය ප්රාණාංස්තේජ්ශියං ච සා ॥ 5 ॥
ස තයා මාලයා වීරෝ හේමයා හරියූථපඃ ।
සංධ්යානුගතපර්යංතඃ පයෝධර ඉවාභවත් ॥ 6 ॥
තස්ය මාලා ච දේහශ්ච මර්මඝාතී ච යශ්ශරඃ ।
ත්රිධේව රචිතා ලක්ෂ්මීඃ පතිතස්යාපි ශෝභතේ ॥ 7 ॥
තදස්ත්රං තස්ය වීරස්ය ස්වර්ගමාර්ගප්රභාවනම් ।
රාමබාණාසනක්ෂිප්තමාවහත්පරමාං ගතිම් ॥ 8 ॥
තං තදා පතිතං සංඛ්යේ ගතාර්චිෂමිවානලම් ।
බහුමාන්ය ච තං වීර වීක්ෂමාණං ශනෛරිව ॥ 9 ॥
යයාතිමිව පුණ්යාංතේ දේවලෝකාදිහච්යුතම් ।
ආදිත්යමිව කාලේන යුගාංතේ භුවි පාතිතම් ॥ 10 ॥
මහේංද්රමිව දුර්ධර්ෂංමුපේංද්රමිව දුස්සහම් ।
මහේංද්රපුත්රං පතිතං වාලිනං හේමමාලිනම් ॥ 11 ॥
සිංහෝරස්කං මහාබාහුං දීප්තාස්යං හරිලෝචනම් ।
ලක්ෂ්මණානුගතෝ රාමෝ දදර්ශෝපසසර්ප ච ॥ 12 ॥
තං දෘෂ්ට්වා රාඝවං වාලී ලක්ෂ්මණං ච මහාබලම් ।
අබ්රවීත්ප්රශ්රිතං වාක්යං පරුෂං ධර්මසංහිතම් ॥ 13 ॥
ත්වං නරාධිපතේඃ පුත්රඃ ප්රථිතඃ ප්රියදර්ශනඃ කුලීනස්සත්ත්වසංපන්න ස්තේජස්වී චරිතව්රතඃ ॥ 14 ॥
පරාඞ්මුඛවධං කෘත්වා කෝऽත්ර ප්රාප්තස්ත්වයා ගුණඃ ।
යදහං යුද්ධසංරබ්ධශ්ශරේණෝරසි තාඩිතඃ ॥ 15 ॥
රාමඃ කරුණවේදී ච ප්රජානාං ච හිතේ රතඃ ।
සානුක්රෝශෝ ජිතෝත්සාහස්සමයජ්ඤෝ දෘඪව්රතඃ ॥ 16 ॥
ඉති තේ සර්වභූතානි කථයංති යශෝ භුවි ॥ 17 ॥
දමශ්ශමඃ ක්ෂමා ධර්මෝ ධෘතිස්සත්යං පරාක්රමඃ ।
පාර්ථිවානාං ගුණා රාජංදංඩශ්චාප්යපරාධිෂු ॥ 18 ॥
තාන්ගුණාන්සංප්රධාර්යාහමග්ර්යං චාභිජනං තව ।
තාරයා ප්රතිෂිද්ධෝऽපි සුග්රීවේණ සමාගතඃ ॥ 19 ॥
න මාමන්යේන සම්රබ්ධං ප්රමත්තං යෝද්ධු මර්හසි ।
ඉති මේ බුද්ධිරුත්පන්නා බභූවාදර්ශනේ තව ॥ 20 ॥
න ත්වාං විනිහතාත්මානං ධර්මධ්වජමධාර්මිකම් ।
ජානේ පාපසමාචාරං තෘණෛඃ කූපමිවාවෘතම් ॥ 21 ॥
සතාං වේෂධරං පාපං ප්රච්ඡන්නමිව පාවකම් ।
නාහං ත්වාමභිජානාමි ධර්මච්ඡද්මාභිසංවෘතම් ॥ 22 ॥
විෂයේ වා පුරේ වා තේ යදා පාපං කරෝම්යහම් ।
න ච ත්වාමවජානේ ච කස්මාත්ත්වං හංස්යකිල්බිෂම් ॥ 23 ॥
ඵලමූලාශනං නිත්යං වානරං වනගෝචරම් ।
මාමිහාප්රතියුධ්යංතමන්යේන ච සමාගතම් ॥ 24 ॥
ත්වං නරාධිපතේඃ පුත්රඃ ප්රතීතඃ ප්රියදර්ශනඃ ।
ලිංගමප්යස්ති තේ රාජනංදෘශ්යතේ ධර්මසංහිතම් ॥ 25 ॥
කඃ ක්ෂත්රියකුලේ ජාත්ශෘතවාන්නෂ්ටසංශයඃ ।
ධර්මලිංගප්රතිච්ඡන්න ක්රූරං කර්ම සමාචරේත් ॥ 26 ॥
රාම රාජකුලේ ජාතෝ ධර්මවානිති විශ්රුතඃ ॥ 27 ॥
අභව්යෝ භව්යරූපේණ කිමර්ථං පරිධාවසි ।
සාම දානං ක්ෂමා ධර්මස්සත්යං ධෘතිපරාක්රමෞ ।
පාර්ථිවානාං ගුණා රාජන් දංඩශ්චාප්යපරාධිෂු ॥ 28 ॥
වයං වනචරා රාම මෘගා මූලඵලාශනාඃ ।
ඒෂා ප්රකෘතිරස්මාකං පුරුෂස්ත්වං නරේශ්වරඃ ॥ 29 ॥
භූමිර්හිරණ්යං රූප්යං ච විග්රහේ කාරණානි ච ।
අත්ර කස්තේ වනේ ලෝභෝ මදීයේෂු ඵලේෂු වා ॥ 30 ॥
නයශ්ච විනයශ්චෝභෞ නිග්රහානුග්රහාවපි ॥ 31 ॥
රාජවෘත්තිරසංකීර්ණා න නෘපාඃ කාමවෘත්තයඃ ।
ත්වං තු කාමප්රධානශ්ච කෝපනශ්චානවස්ථිතඃ ॥ 32 ॥
රාජවෘත්තේශ්ච සංකීණශ්ශරාසනපරායණඃ ।
න තේऽස්ත්යපචිතිර්ධර්මේ නාර්ථේ බුද්ධිරවස්ථිතා ॥ 33 ॥
ඉංද්රියෛඃ කාමවෘත්තස්සන්කෘෂ්යසේ මනුජේශ්වර ।
හත්වා බාණේන කාකුත්ස්ථ මාමිහානපරාධිනම් ॥ 34 ॥
කිං වක්ෂ්යසි සතාං මධ්යේ කර්ම කෘත්වා ජුගුප්සිතම් ।
රාජහා බ්රහ්මහා ගෝඝ්නශ්චෝරඃ ප්රාණිවධේ රතඃ ॥ 35 ॥
නාස්තිකඃ පරිවේත්තා ච සර්වේ නිරයගාමිනඃ ।
සූචකශ්ච කදර්යශ්ච මිත්රඝ්නෝ ගුරුතල්පගඃ ॥ 36 ॥
ලෝකං පාපාත්මනාමේතේ ගච්ඡංතේ නාත්ර සංශයඃ ।
අධාර්යං චර්ම මේ සද්භී රෝමාණ්යස්ථි ච වර්ජිතම් ।
අභක්ෂ්යාණි ච මාංසානි ත්වද්විධෛර්ධර්මචාරිභිඃ ॥ 37 ॥
පංච පංච නඛා භක්ෂ්යා බ්රහ්මක්ෂත්රේණ රාඝව ॥ 38 ॥
ශල්යක ශ්ශ්වාවිධෝ ගෝධා ශශඃ කූර්මශ්ච පංචමඃ ।
චර්ම චාස්ථි ච මේ රාජන් නස්පෘශංති මනීෂිණඃ ॥ 39 ॥
අභක්ෂ්යාණි ච මාංසානි සෝऽහං පංචනඛෝ හතඃ ।
තාරයා වාක්යමුක්තෝऽහං සත්යං සර්වජ්ඤයා හිතම් ॥ 40 ॥
තදතික්රම්ය මෝහේන කාලස්ය වශමාගතඃ ।
ත්වයා නාථේන කාකුත්ස්ථ න සනාථා වසුංධරා ।
ප්රමදා ශීලසංපන්නා ධූර්තේන පතිනා යථා ॥ 41 ॥
ශඨෝ නෛකෘතිකඃ ක්ෂුද්රෝ මිථ්යාප්රශ්රිතමානසඃ ।
කථං දශරථේන ත්වං ජාතඃ පාපෝ මහාත්මනා ॥ 42 ॥
ඡින්නචාරිත්රකක්ෂ්යේණ සතාං ධර්මාතිවර්තිනා ।
ත්යක්තධර්මාංකුශේනාහං නිහතෝ රාමහස්තිනා ॥ 43 ॥
අශුභං චාප්යයුක්තං ච සතාං චෛව විගර්හිතම් ।
වක්ෂ්යසේ චේදෘශං කෘත්වා සද්භිස්සහ සමාගතඃ ॥ 44 ॥
උදාසීනේෂු යෝऽස්මාසු වික්රමऽස්තේ ප්රකාශිතඃ ।
අපකාරිෂු තේ රාජන්නහි පශ්යාමි වික්රමම් ॥ 45 ॥
දෘශ්යමානස්තු යුද්ධ්යේථා මයා යදි නෘපාත්මජ ।
අද්ය වෛවස්වතං දේවං පශ්යේස්ත්වං නිහතෝ මයා ॥ 46 ॥
ත්වයාऽදෘශ්යේන තු රණේ නිහතෝऽහං දුරාසදඃ ।
ප්රසුප්තඃ පන්නගේනේව නරඃ පානවශං ගතඃ ॥ 47 ॥
මාමේව යදි පූර්වං ත්වමේතදර්ථමචෝදයඃ ॥ 48 ॥
මෛථිලීමහමේකාහ්නා තව චානීතවාන්භවේත් ।
සුග්රීවප්රියකාමේන යදහං නිහතස්ත්වයා ।
කංඨේ බද්ධ්වා ප්රදද්යාං තේ නිහතං රාවණං රණේ ॥ 49 ॥
න්යස්තාං සාගරතෝයේ වා පාතාලේ වාපි මෛථිලීම් ।
ආනයේයං තවාදේශාච්ඡ්වේතාමශ්වතරීමිව ॥ 50 ॥
යුක්තං යත්ප්රාප්නුයාද්රාජ්යං සුග්රීවස්ස්වර්ගතේ මයි ।
අයුක්තං යදධර්මේණ ත්වයාऽහං නිහතෝ රණේ ॥ 51 ॥
කාමමේවං විධෝ ලෝකඃ කාලේන විනියුජ්යතේ ।
ක්ෂමං චේද්භවතා ප්රාප්තමුත්තරං සාධු චිංත්යතාම් ॥ 52 ॥
ඉත්යේවමුක්ත්වා පරිශුෂ්කවක්ත්රඃ ශරාභිඝාතාද්ව්යථිතෝ මහාත්මා ।
සමීක්ෂ්ය රාමං රවිසන්නිකාශං තූෂ්ණීං බභූවාමරරාජසූනුඃ ॥ 53 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ සප්තදශස්සර්ගඃ ॥
