ශ්රීමද්වාල්මීකීය රාමායණේ කිෂ්කිංධාකාංඩම් ।
අථ පංචපංචාශස්සර්ගඃ ।
ශ්රුත්වා හනුමතෝ වාක්යං ප්රශ්රිතං ධර්මසංහිතම් ।
ස්වාමිසත්කාරසංයුක්තමංගදෝ වාක්යමබ්රවීත් ॥ 1 ॥
ස්ථෛර්යමාත්මමනශ්ශෞචමානෘශංස්යමථාऽර්ජවම් ।
වික්රමශ්චෛව ධෛර්යං ච සුග්රීවේ නෝපපද්යතේ ॥ 2 ॥
භ්රාතුර්ජ්යේෂ්ඨස්ය යෝ භාර්යාං ජීවතෝ මහිෂීං ප්රියාම් ।
ධර්මේණ මාතරං යස්තු ස්වීකරෝති ජුගුප්සිතඃ ॥ 3 ॥
කථං ස ධර්මං ජානීතේ යේන භ්රාත්රා මහාත්මනා ।
යුද්ධායාභිනියුක්තේන බිලස්ය පිහිතං මුඛම් ॥ 4 ॥
සත්යාත්පාණිගෘහීතශ්ච කෘතකර්මා මහායශාඃ ।
විස්මෘතෝ රාඝවෝ යේන ස කස්ය තු කෘතං ස්මරේත් ॥ 5 ॥
ලක්ෂ්මණස්ය භයාද්යේන නාධර්මභයභීරුණා ।
ආදිෂ්ටා මාර්ගිතුං සීතාං ධර්මමස්මින්කථං භවේත් ॥ 6 ॥
තස්මින්පාපේ කෘතඝ්නේ තු ස්මෘතිහීනේ චලාත්මනි ।
ආර්යඃ කෝ විශ්වසේජ්ජාතු තත්කුලීනෝ ජිජීවිෂුඃ ॥ 7 ॥
රාජ්යේ පුත්රඃ ප්රතිෂ්ඨාප්යස්සගුණෝ විගුණෝऽපි වා ।
කථං ශත්රුකුලීනං මාං සුග්රීවෝ ජීවයිෂ්යති ॥ 8 ॥
භින්නමංත්රෝऽපරාද්ධශ්ච හීනශක්තිඃ කථං හ්යහම් ।
කිෂ්කිංධාං ප්රාප්ය ජීවේයමනාථ ඉව දුර්බලඃ ॥ 9 ॥
පාංශුදංඩේන හි මාං බංධනේ නෝපපාදයේත් ।
ශඨඃ ක්රූරෝ නෘශංසශ්ච සුග්රීවෝ රාජ්යකාරණාත් ॥ 10 ॥
බංධනාද්වාऽවසාදාන්මේ ශ්රේයඃ ප්රායෝපවේශනම් ।
අනුජානීත මාං සර්වේ ගෘහං ගච්ඡංතු වානරාඃ ॥ 11 ॥
අහං වඃ ප්රතිජානාමි නාගමිෂ්යාම්යහං පුරීම් ।
ඉහෛව ප්රායමාසිෂ්යේ ශ්රේයෝ මරණමේව මේ ॥ 12 ॥
අභිවාදනපූර්වං හි රාඝවෞ බලශාලිනෞ ।
අභිවාදනපූර්වං තු රාජා කුශලමේව ච ॥ 13 ॥
වාච්යස්තාතෝ යවීයාන්මේ සුග්රීවෝ වානරේශ්වරඃ ।
ආරෝග්යපූර්වං කුශලං වාච්යා මාතා රුමා ච මේ ॥ 14 ॥
මාතරං චෛව මේ තාරාමාශ්වාසයිතුමර්හථ ।
ප්රකෘත්යා ප්රියපුත්රා සා සානුක්රෝශා තපස්විනී ॥ 15 ॥
විනෂ්ටමිහ මාං ශ්රුත්වා ව්යක්තං හාස්යති ජීවිතම් ।
ඒතාවදුක්ත්වා වචනං වෘද්ධාංස්තානභිවාද්ය ච ॥ 16 ॥
විවේශ චාංගදෝ භූමෞ රුදංදර්භේෂු දුර්මනාඃ ।
තස්ය සංවිශතස්තත්ර රුදංතෝ වානරර්ෂභාඃ ॥ 17 ॥
නයනේභ්යඃ ප්රමුමුචුරුෂ්ණං වෛ වාරි දුඃඛිතාඃ ।
සුග්රීවං චෛව නිංදංතඃ ප්රශංසංතශ්ච වාලිනම් ॥ 18 ॥
පරිවාර්යාංගදං සර්වේ ව්යවසන්ප්රායමාසිතුම් ।
මතං තද්වාලිපුත්රස්ය විජ්ඤාය ප්ලවගර්ෂභාඃ ॥ 19 ॥
උපස්පෘශ්යෝදකං තත්ර ප්රාඞ්මුඛාස්සමුපාවිශන් ।
දක්ෂිණාග්රේෂු දර්භේෂු උදක්තීරං සමාශ්රිතාඃ ॥ 20 ॥
මුමූර්ෂවෝ හරිශ්රේෂ්ඨා ඒතත් ක්ෂමමිති ස්ම හ ।
රාමස්ය වනවාසං ච ක්ෂයං දශරථස්ය ච ॥ 21 ॥
ජනස්ථානවධං චෛව වධං චෛව ජටායුෂඃ ।
හරණං චෛව වෛදේහ්යා වාලිනශ්ච වධං රණේ ॥ 22 ॥
රාමකෝපං ච වදතාං හරීණාං භයමාගතම් ।
ස සංවිශද්භිබහුභිර්මහීධරෝ මහාද්රිකූටප්රතිමෛඃ ප්ලවංගමෛඃ ।
බභූව සන්නාදිතනිර්දරාංතරෝ භෘශං නදද්භිර්ජලදෛරිවෝල්බණෛඃ ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ පංචපංචාශස්සර්ගඃ ॥
