ශ්රීමද්වාල්මීකීය රාමායණේ බාලකාංඩම් ।
අථ චතුඃපංචාශස්සර්ගඃ ।
කාමධේනුං වසිෂ්ඨෝऽපි යදා න ත්යජ්යතේ මුනිඃ ।
තදාස්ය ශබලාං රාම විශ්වාමිත්රෝऽන්වකර්ෂත ॥ 1 ॥
නීයමානා තු ශබලා රාම රාජ්ඤා මහාත්මනා ।
දුඃඛිතා චිංතයාමාස රුදංතී ශෝකකර්ශිතා ॥ 2 ॥
පරිත්යක්තා වසිෂ්ඨේන කිමහං සුමහාත්මනා ।
යාහං රාජභටෛර්දීනා හ්රියේය භෘශදුඃඛිතා ॥ 3 ॥
කිං මයාऽපකෘතං තස්ය මහර්ෂේර්භාවිතාත්මනඃ ।
යන්මාමනාගසං භක්තාමිෂ්ටාං ත්යජති ධාර්මිකඃ ॥ 4 ॥
ඉති සා චිංතයිත්වා තු විනිශ්ශ්වස්ය පුනඃපුනඃ ।
නිර්ධූය තාංස්තදා භෘත්යාන් ශතශශ්ශත්රුසූදන ।
ජගාමානිලවේගේන පාදමූලං මහාත්මනඃ ॥ 5 ॥
ශබලා සා රුදංතී ච ක්රෝශංතී චේදමබ්රවීත් ।
වසිෂ්ඨස්යාග්රතස්ස්ථිත්වා මේඝදුංදුභිරාවිණී ॥ 6 ॥
භගවන් කිං පරිත්යක්තා ත්වයාऽහං බ්රහ්මණස්සුත ।
යස්මාද්රාජභෘතා මාං හි නයංතේ ත්වත්සකාශතඃ ॥ 7 ॥
ඒවමුක්තස්තු බ්රහ්මර්ෂිරිදං වචනමබ්රවීත් ।
ශෝකසංතප්තහෘදයාං ස්වසාරමිව දුඃඛිතාම් ॥ 8 ॥
න ත්වාං ත්යජාමි ශබලේ නාපි මේऽපකෘතං ත්වයා ।
ඒෂ ත්වාං නයතේ රාජා බලෝන්මත්තෝ මහාබලඃ ॥ 9 ॥
න හි තුල්යං බලං මහ්යං රාජා ත්වද්ය විශේෂතඃ ।
බලී රාජා ක්ෂත්රියශ්ච පෘථිව්යාඃ පතිරේව ච ॥ 10 ॥
ඉයමක්ෂෞහිණී පූර්ණා සවාජිරථසංකුලා ।
හස්තිධ්වජසමාකීර්ණා තේනාසෞ බලවත්තරඃ ॥ 11 ॥
ඒවමුක්තා වසිෂ්ඨේන ප්රත්යුවාච විනීතවත් ।
වචනං වචනජ්ඤා සා බ්රහ්මර්ෂිමමිතප්රභම් ॥ 12 ॥
න බලං ක්ෂත්රියස්යාහුර්බ්රාහ්මණෝ බලවත්තරඃ ।
බ්රහ්මන් බ්රහ්මබලං දිව්යං ක්ෂත්රාත්තු බලවත්තරම් ॥ 13 ॥
අප්රමේයබලං තුභ්යං න ත්වයා බලවත්තරඃ ।
විශ්වාමිත්රෝ මහාවීර්යස්තේජ ස්තව දුරාසදම් ॥ 14 ॥
නියුංක්ෂ්ව මාං මහාභාග ත්වද්බ්රහ්මබලසංභෘතාම් ।
තස්ය දර්පබලං යත්තන්නාශයාමි දුරාත්මනඃ ॥ 15 ॥
ඉත්යුක්තස්තු තයා රාම වසිෂ්ඨ ස්සුමහායශාඃ ।
සෘජස්වේති තදෝවාච බලං පරබලාර්දනම් ॥ 16 ॥
තස්ය තද්වචනං ශ්රුත්වා සුරභිස්සාऽසෘජත්තදා ॥ 17 ॥
තස්යා හුංභාරවෝත්සෘෂ්ටාඃ පප්ලවාශ්ශතශෝ නෘප ।
නාශයංති බලං සර්වං විශ්වාමිත්රස්ය පශ්යතඃ ॥ 18 ॥
බලං භග්නං තතෝ දෘෂ්ට්වා රථේනාක්රම්ය කෞශිකඃ ।
ස රාජා පරමක්රුද්ධෝ රෝෂවිස්ඵාරිතේක්ෂණඃ ।
පප්ලවාන්නාශයාමාස ශස්ත්රෛරුච්චාවචෛරපි ॥ 19 ॥
විශ්වාමිත්රාර්දිතාන් දෘෂ්ට්වා පප්ලවාංඡතශස්තදා ।
භූය ඒවාසෘජත්කෝපාච්ඡකාන් යවනමිශ්රිතාන් ॥ 20 ॥
තෛරාසීත් සංවෘතා භූමි ශ්ශකෛර්යවනමිශ්රිතෛඃ ।
ප්රභාවද්භිර්මහාවීර්යෛර්හේමකිංජල්කසන්නිභෛඃ ॥ 21 ॥
දීර්ඝාසිපට්ටිශධරෛඃමවර්ණාංබරාවෘතෛඃ ।
නිර්දග්ධං තද්බලං සර්වං ප්රදීප්තෛරිව පාවකෛඃ ॥ 22 ॥
තතෝऽස්ත්රාණි මහාතේජා විශ්වාමිත්රෝ මුමෝච හ ।
තෛස්තෛර්යවනකාංභෝජාඃ පප්ලවාශ්චාකුලීකෘතාඃ ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ චතුඃපංචාශස්සර්ගඃ ॥
