ശ്രീമദ്വാല്മീകീയ രാമായണേ ബാലകാംഡമ് ।
അഥ ഏകോനവിംശസ്സര്ഗഃ ।
തച്ഛ്രുത്വാ രാജസിംഹസ്യ വാക്യമദ്ഭുതവിസ്തരമ് ।
ഹൃഷ്ടരോമാ മഹാതേജാ വിശ്വാമിത്രോഽഭ്യഭാഷത ॥ 1 ॥
സദൃശം രാജശാര്ദൂല തവൈതദ്ഭുവി നാന്യഥാ ।
മഹാവംശപ്രസൂതസ്യ വസിഷ്ഠവ്യപദേശിനഃ ॥ 2 ॥
യത്തു മേ ഹൃദ്ഗതം വാക്യം തസ്യ കാര്യസ്യ നിശ്ചയമ് ।
കുരൂഷ്വ രാജശാര്ദൂല ഭവ സത്യപ്രതിശ്രവഃ ॥ 3 ॥
അഹംനിയമമാതിഷ്ഠേ സിധ്യര്ഥം പുരുഷര്ഷഭ ।
തസ്യ വിഘ്നകരൌ ദ്വൌ തു രാക്ഷസൌ കാമരൂപിണൌ ॥ 4 ॥
വ്രതേ മേ ബഹുശശ്ചീര്ണേ സമാപ്ത്യാം രാക്ഷസാവിമൌ ।
മാരീചശ്ച സുബാഹുശ്ച വീര്യവംതൌ സുശിക്ഷിതൌ ॥ 5 ॥
സമാംസരുധിരൌഘേണ വേദിം താമഭ്യവര്ഷതാമ് ।
അവധൂതേ തഥാഭൂതേ തസ്മിന്നിയമനിശ്ചയേ ॥ 6 ॥
കൃതശ്രമോ നിരുത്സാഹസ്തസ്മാദ്ദേശാദപാക്രമേ ।
ന ച മേ ക്രോധമുത്സ്രഷ്ടും ബുദ്ധിര്ഭവതി പാര്ഥിവ ॥ 7 ॥
തഥാ ഭൂതാ ഹി സാ ചര്യാ ന ശാപസ്തത്ര മുച്യതേ ।
സ്വപുത്രം രാജശാര്ദൂല രാമം സത്യപരാക്രമമ് ॥ 8 ॥
കാകപക്ഷധരം ശൂരം ജ്യേഷ്ഠം മേ ദാതുമര്ഹസി ।
ശക്തോ ഹ്യേഷ മയാ ഗുപ്തോ ദിവ്യേന സ്വേന തേജസാ ॥ 9 ॥
രാക്ഷസാ യേ വികര്താരസ്തേഷാമപി വിനാശനേ ।
ശ്രേയശ്ചാസ്മൈ പ്രദാസ്യാമി ബഹുരൂപം ന സംശയഃ ॥ 10 ॥
ത്രയാണാമപി ലോകാനാം യേന ഖ്യാതിം ഗമിഷ്യതി ।
ന ച തൌ രാമമാസാദ്യ ശക്തൌ സ്ഥാതും കഥംചന ॥ 11 ॥
ന ച തൌ രാഘവാദന്യോ ഹംതുമുത്സഹതേ പുമാന് ।
വീര്യോത്സിക്തൌ ഹി തൌ പാപൌ കാലപാശവശം ഗതൌ ॥ 12 ॥
രാമസ്യ രാജശാര്ദൂല ന പര്യാപ്തൌ മഹാത്മനഃ ।
ന ച പുത്രകൃതസ്നേഹം കര്തുമര്ഹസി പാര്ഥിവ ॥ 13 ॥
അഹം തേ പ്രതിജാനാമി ഹതൌ തൌ വിദ്ധി രാക്ഷസൌ ।
അഹം വേദ്മി മഹാത്മാനം രാമം സത്യപരാക്രമമ് ॥ 14 ॥
വസിഷ്ഠോഽപി മഹാതേജാ യേ ചേമേ തപസി സ്ഥിതാഃ ।
യദി തേ ധര്മലാഭം ച യശശ്ച പരമം ഭുവി ॥ 15 ॥
സ്ഥിതമിച്ഛസി രാജേംദ്ര രാമം മേ ദാതുമര്ഹസി ।
യദിഹ്യനുജ്ഞാം കാകുത്സ്ഥ ദദതേ തവ മംത്രിണഃ ॥ 16 ॥
വസിഷ്ഠപ്രമുഖാഃ സർവേ തതോ രാമം വിസര്ജയ ।
അഭിപ്രേതമസംസക്തമാത്മജം ദാതുമര്ഹസി ॥ 17 ॥
ദശരാത്രം ഹി യജ്ഞസ്യ രാമം രാജീവലോചനമ് ।
നാത്യേതി കാലോ യജ്ഞസ്യ യഥാഽയം മമ രാഘവ ॥ 18 ॥
തഥാ കുരുഷ്വ ഭദ്രം തേ മാ ച ശോകേ മനഃ കൃഥാഃ ।
ഇത്യേവമുക്ത്വാ ധര്മാത്മാ ധര്മാര്ഥസഹിതം വചഃ ॥ 19 ॥
വിരരാമ മഹാതേജാ വിശ്വാമിത്രോ മഹാമുനിഃ ।
സ തന്നിശമ്യ രാജേംദ്രോ വിശ്വാമിത്രവചശ്ശുഭമ് ॥ 20 ॥
ശോകമഭ്യഗമത്തീവ്രം വ്യഷീദത ഭയാന്വിതഃ ।
ഇതി ഹൃദയമനോവിദാരണം മുനിവചനം തദതീവ ശുശ്രുവാന് ।
നരപതിരഭവന്മഹാംസ്തദാ വ്യഥിതമനാഃ പ്രചചാല ചാസനാത് ॥ 21 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഏകോനവിംശസ്സര്ഗഃ ॥
