ශ්රීමද්වාල්මීකීය රාමායණේ අයෝධ්යාකාංඩම් ।
අථ චතුශ්චත්වාරිංශස්සර්ගඃ ।
විලපංතී තථා තාං තු කෞසල්යාං ප්රමදෝත්තමාම් ।
ඉදං ධර්මේ ස්ථිතා ධර්ම්යං සුමිත්රා වාක්යමබ්රවීත් ॥ 1 ॥
තවාර්යේ සද්ගුණෛර්යුක්තඃ පුත්ර ස්ස පුරුෂෝත්තමඃ ।
කිං තේ විලපිතේනෛවං කෘපණං රුදිතේන වා ॥ 2 ॥
යස්තවාර්යේ ගතඃ පුත්රස්ත්යක්ත්වා රාජ්යං මහාබලඃ ।
සාධු කුර්වන් මහාත්මානං පිතරං සත්යවාදිනම් ॥ 3 ॥
ශිෂ්ටෛරාචරිතේ සම්යක්ඡශ්වත්ප්රේත්යඵලෝදයේ ।
රාමෝ ධර්මේ ස්ථිත ශ්රේෂ්ඨෝ න ස ශෝච්යඃ කදාචන ॥ 4 ॥
වර්තතේ චෝත්තමාං වෘත්තිං ලක්ෂ්මණෝऽස්මින් සදානඝඃ ।
දයාවාන් සර්වභූතේෂු ලාභස්තස්ය මහාත්මනඃ ॥ 5 ॥
අරණ්යවාසේ යද්දුඃඛං ජානතී වෛ සුඛෝචිතා ।
අනුගච්ඡති වෛදේහී ධර්මාත්මානං තවාත්මජම් ॥ 6 ॥
කීර්තිභූතාං පතාකාං යෝ ලෝකේ භ්රමයති ප්රභුඃ ।
ධර්මසත්යව්රතධනඃ කිං න ප්රාප්තස්තවාත්මජඃ ॥ 7 ॥
ව්යක්තං රාමස්ය විජ්ඤාය ශෞචං මාහාත්ම්යමුත්තමම් ।
න ගාත්රමංශුභි ස්සූර්ය ස්සංතාපයිතුමර්හති ॥ 8 ॥
ශිවස්සර්වේෂු කාලේෂු කානනේභ්යෝ විනිස්සෘතඃ ।
රාඝවං යුක්තශීතෝෂ්ණස්සේවිෂ්යති සුඛෝऽනිලඃ ॥ 9 ॥
ශයානමනඝං රාත්රෞ පිතේවාභිපරිෂ්වජන් ।
රශ්මිභි ස්සංස්පෘශන් ශීතෛශ්චංද්රමාහ්ලාදයිෂ්යති ॥ 10 ॥
දදෞ චාස්ත්රාණි දිව්යානි යස්මෛ බ්රහ්මා මහෞජසේ ।
දානවේංද්රං හතං දෘෂ්ට්වා තිමිධ්වජසුතං රණේ ॥ 11 ॥
ස ශූරඃ පුරුෂව්යාඝ්රඃ ස්වබාහුබලමාශ්රිතඃ ।
අසංත්රස්තෝऽප්යරණස්ථෝ වේශ්මනීව නිවත්ස්යති ॥ 12 ॥
යස්යේෂුපථමාසාද්ය විනාශං යාංති ශත්රවඃ ।
කථං න පෘථිවී තස්ය ශාසනේ ස්ථාතුමර්හති ॥ 13 ॥
යා ශ්රී ශ්ශෞර්යං ච රාමස්ය යා ච කල්යාණසත්වතා ।
නිවෘත්තාරණ්යවාස ස්ස ක්ෂිප්රං රාජ්යමවාප්ස්යති ॥ 14 ॥
සූර්යස්යාපි භවේත්සූර්යෝ හ්යග්නේරග්නි ප්රභෝඃ ප්රභුඃ ।
ශ්රියඃ ශ්රීශ්ච භවේදග්ර්යා කීර්තිඃ කීර්ත්යාඃ ක්ෂමාක්ෂමා ॥ 15 ॥
දෛවතං දෛවතානාං ච භූතානාං භූතසත්තමඃ ।
තස්ය කේ හ්යගුණා දේවි වනේ වාප්යථවා පුරේ ॥ 16 ॥
පෘථිව්යා සහ වෛදේහ්යා ශ්රියා ච පුරුෂර්ෂභඃ ।
ක්ෂිප්රං තිසෘභිරේතාභි ස්සහ රාමෝऽභිෂේක්ෂ්යතේ ॥ 17 ॥
දුඃඛජං විසෘජංත්යස්රං නිෂ්ක්රාමංතමුදීක්ෂ්ය යම් ।
අයෝධ්යායාං ජනාස්සර්වේ ශෝකවේගසමාහතාඃ ॥ 18 ॥
කුශචීරධරං දේවං ගච්ඡංතමපරාජිතම් ।
සීතේවානුගතා ලක්ෂ්මී ස්තස්ය කිං නාම දුර්ලභම් ॥ 19 ॥
ධනුර්ග්රහවරෝ යස්ය බාණඛඩ්ගාස්ත්රභෘත්ස්වයම් ।
ලක්ෂ්මණෝ ව්රජති හ්යග්රේ තස්ය කිං නාම දුර්ලභම් ॥ 20 ॥
නිවෘත්තවනවාසං තං ද්රෂ්ටාසි පුනරාගතම් ।
ජහිශෝකං ච මෝහං ච දේවි සත්යං බ්රවීමි තේ ॥ 21 ॥
ශිරසා චරණාවේතෞ වංදමානමනිංදිතේ පුනර්ද්රක්ෂ්යසි කල්යාණි පුත්රං චංද්රමිවෝදිතම් ॥ 22 ॥
පුනඃ ප්රවිෂ්ටං දෘෂ්ට්වා තමභිෂික්තං මහාශ්රියම් ।
සමුත්ස්රක්ෂ්යසි නේත්රාභ්යාං ක්ෂිප්රමානංදජං පයඃ ॥ 23 ॥
මා ශෝකෝ දේවි දුඃඛං වා න රාමේ දෘශ්යතේऽශිවම් ।
ක්ෂිප්රං ද්රක්ෂ්යසි පුත්රං ත්වං සසීතං සහලක්ෂ්මණම් ॥ 24 ॥
ත්වයා ශේෂෝ ජනශ්චෛව සමාශ්වාස්යෝ යදාऽනඝේ ।
කිමිදානීමිදං දේවි කරෝෂි හෘදි වික්ලබම් ॥ 25 ॥
නාර්හා ත්වං ශෝචිතුං දේවි යස්යාස්තේ රාඝවස්සුතඃ ।
න හි රාමාත්පරෝ ලෝකේ විද්යතේ සත්පථේ ස්ථිතඃ ॥ 26 ॥
අභිවාදයමානං තං දෘෂ්ට්වා සසුහෘදං සුතම් ।
මුදාऽශ්රෘ මෝක්ෂ්යසේ ක්ෂිප්රං මේඝලේඛේව වාර්ෂිකී ॥ 27 ॥
පුත්රස්තේ වරදඃ ක්ෂිප්රමයෝධ්යාං පුනරාගතඃ ।
පාණිභ්යාං මෘදුපීනාභ්යාං චරණෞ පීඩයිෂ්යති ॥ 28 ॥
අභිවාද්ය නමස්යංතං ශූරං සසුහෘදං සුතම් ।
මුදාऽස්රෛඃ ප්රෝක්ෂ්යසි පුනර්මේඝරාජිරිවාචලම් ॥ 29 ॥
ආශ්වාසයංතී විවිධෛශ්ච වාක්යෛ ර්වාක්යෝපචාරේ කුශලාऽනවද්යා ।
රාමස්ය තාං මාතරමේවමුක්ත්වා දේවී සුමිත්රා විරරාම රාමා ॥ 30 ॥
නිශම්ය තල්ලක්ෂ්මණමාතෘවාක්යං රාමස්ය මාතුර්නරදේවපත්න්යාඃ ।
සද්යශ්ශරීරේ විනනාශ ශෝකඃ ශරද්ගතෝ මේඝ ඉවාල්පතෝයඃ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ චතුශ්චත්වාරිංශස්සර්ගඃ ॥
