ශ්රීමද්වාල්මීකීය රාමායණේ අයෝධ්යාකාංඩම් ।
අථ චතුර්ථස්සර්ගඃ ।
ගතේෂ්වථ නෘපෝ භූයඃ පෞරේෂු සහ මංත්රිභිඃ ।
මංත්රයිත්වා තතශ්චක්රේ නිශ්චයජ්ඤස්සනිශ්චයම් ॥ 1 ॥
ශ්ව ඒව පුෂ්යෝ භවිතාශ්වෝऽභිෂේච්යස්තු මේ සුතඃ ।
රාමෝ රාජීවතාම්රාක්ෂෝ යෞවරාජ්ය ඉති ප්රභුඃ ॥ 2 ॥
ගතේෂ්වථ නෘපෝ භූයඃ පෞරේෂු සහ මංත්රිභිඃ ।
මංත්රයිත්වා තතශ්චක්රේ නිශ්චයජ්ඤස්සනිශ්චයම් ॥ 3 ॥
ශ්ව ඒව පුෂ්යෝ භවිතාශ්වෝऽභිෂේච්යස්තු මේ සුතඃ ।
රාමෝ රාජීවතාම්රාක්ෂෝ යෞවරාජ්ය ඉති ප්රභුඃ ॥ 4 ॥
අථාऽංතර්ගෘහමාවිශ්ය රාජා දශරථස්තදා ।
සූතමාමංත්රයාමාස රාමං පුනරිහානය ॥ 5 ॥
ප්රතිගෘහ්ය ස තද්වාක්යං සූතඃ පුනරුපායයෞ ।
රාමස්ය භවනං ශීඝ්රං රාමමානයිතුං පුනඃ ॥ 6 ॥
ද්වාර්ස්ථෛරාවේදිතං තස්ය රාමායාऽऽගමනං පුනඃ ।
ශ්රුත්වෛව චාපි රාමස්තං ප්රාප්තං ශංකාන්විතෝऽභවත් ॥ 7 ॥
ප්රවේශ්ය චෛනං ත්වරිතං රාමෝ වචනමබ්රවීත් ।
යදාගමනකෘත්යං තේ භූයස්තද්බ්රූහ්යශේෂතඃ ॥ 8 ॥
තමුවාච තත ස්සූතෝ රාජා ත්වාං ද්රෂ්ටුමිච්ඡති ।
ශ්රුත්වා ප්රමාණමත්ර ත්වං ගමනායේතරාය වා ॥ 9 ॥
ඉති සූතවච ශ්ශ්රුත්වා රාමෝऽථ ත්වරයාऽන්විතඃ ।
ප්රයයෞ රාජභවනං පුනර්ද්රෂ්ටුං නරේශ්වරම් ॥ 10 ॥
තං ශ්රුත්වා සමනුප්රාප්තං රාමං දශරථෝ නෘපඃ ।
ප්රවේශයාමාස ගෘහං විවක්ෂුඃ ප්රියමුත්තමම් ॥ 11 ॥
ප්රවිශන්නේව ච ශ්රීමාන්රාඝවෝ භවනං පිතුඃ ।
දදර්ශ පිතරං දූරාත්ප්රණිපත්ය කෘතාංජලිඃ ॥ 12 ॥
ප්රණමංතං සමුත්ථාප්ය තං පරිෂ්වජ්ය භූමිපඃ ।
ප්රදිශ්ය චාස්මෛ රුචිරමාසනං පුනරබ්රවීත් ॥ 13 ॥
රාම වෘද්ධෝऽස්මි දීර්ඝායුර්භුක්තා භෝගා මයේප්සිතාඃ ।
අන්නවද්භිඃ ක්රතුශතෛ ස්තථේෂ්ටං භූරිදක්ෂිණෛඃ ॥ 14 ॥
ජාතමිෂ්ටමපත්යං මේ ත්වමද්යානුපමං භුවි ।
දත්තමිෂ්ටමධීතං ච මයා පුරුෂසත්තම ॥ 15 ॥
අනුභූතානි චේෂ්ටානි මයා වීර සුඛාන්යපි ।
දේවර්ෂිපිතෘවිප්රාණාමනෘණෝऽස්මි තථාऽත්මනඃ ॥ 16 ॥
න කිංචින්මම කර්තව්යං තවාන්යත්රාභිෂේචනාත් ।
අතෝ යත්ත්වාමහං බ්රූයාං තන්මේ ත්වං කර්තුමර්හසි ॥ 17 ॥
අද්ය ප්රකෘතයස්සර්වාස්ත්වාමිච්ඡංති නරාධිපම් ।
අතස්ත්වාං යුවරාජානමභිෂේක්ෂ්යාමි පුත්රක ॥ 18 ॥
අපි චාද්යාऽශුභාන්රාම ස්වප්නේ පශ්යාමි දාරුණාන් ।
සනිර්ඝාතා දිවෝල්කා ච පතතීහ මහාස්වනා ॥ 19 ॥
අවෂ්ටබ්ධං ච මේ රාම නක්ෂත්රං දාරුණෛර්ග්රහෛඃ ।
ආවේදයංති දෛවජ්ඤාඃ සූර්යාංගාරකරාහුභිඃ ॥ 20 ॥
ප්රායේණ හි නිමිත්තානාමීදෘශානාං සමුද්භවේ ।
රාජා හි මෘත්යුමාප්නෝති ඝෝරාං වාऽऽපදමෘච්ඡති ॥ 21 ॥
තද්යාවදේව මේ චේතෝ න විමුහ්යති රාඝව ।
තාවදේවාභිෂිංචස්ව චලා හි ප්රාණිනාං මතිඃ ॥ 22 ॥
අද්ය චංද්රෝऽභ්යුපගතඃ පුෂ්යාත්පූර්වං පුනර්වසූ ।
ශ්වඃ පුෂ්යයෝගං නියතං වක්ෂ්යංතේ දෛවචිංතකාඃ ॥ 23 ॥
තතඃ පුෂ්යේऽභිෂිංචස්ව මනස්ත්වරයතීව මාම් ।
ශ්වස්ත්වාऽහමභිෂේක්ෂ්යාමි යෞවරාජ්යේ පරංතප ॥ 24 ॥
තස්මාත්ත්වයාऽද්ය ප්රභෘති නිශේයං නියතාත්මනා ।
සහ වධ්වෝපවස්තව්යා දර්භප්රස්තරශායිනා ॥ 25 ॥
සුහෘදශ්චාප්රමත්තාස්ත්වාං රක්ෂංත්වද්ය සමංතතඃ ।
භවංති බහු විඝ්නානි කාර්යාණ්යේවංවිධානි හි ॥ 26 ॥
විප්රෝෂිතශ්ච භරතෝ යාවදේව පුරාදිතඃ ।
තාවදේවාභිෂේකස්තේ ප්රාප්තකාලෝ මතෝ මම ॥ 27 ॥
කාමං ඛලු සතාං වෘත්තේ භ්රාතා තේ භරතස්ස්ථිතඃ ।
ජ්යේෂ්ඨානුවර්තී ධර්මාත්මා සානුක්රෝශෝ ජිතේංද්රියඃ ॥ 28 ॥
කිංතු චිත්තං මනුෂ්යාණාමනිත්යමිති මේ මතිඃ ।
සතාං ච ධර්මනිත්යානාං කෘතශෝභි ච රාඝව ॥ 29 ॥
ඉත්යුක්ත ස්සෝऽභ්යනුජ්ඤාත ශ්ශ්වෝභාවින්යභිෂේචනේ ।
ව්රජේති රාමඃ පිතරමභිවාද්යාභ්යයාද්ගෘහම් ॥ 30 ॥
ප්රවිශ්ය චාත්මනෝ වේශ්මරාජ්ඤෝද්දිෂ්ටේऽභිෂේචනේ ।
තත්ක්ෂණේන විනිර්ගම්ය මාතුරංතපුරං යයෞ ॥ 31 ॥
තත්ර තාං ප්රවණාමේව මාතරං ක්ෂෞමවාසිනීම් ।
වාග්යතාං දේවතාගාරේ දදර්ශාऽऽයාචතීං ශ්රියම් ॥ 32 ॥
ප්රාගේව චාගතා තත්ර සුමිත්රා ලක්ෂ්මණ ස්තථා ।
සීතා චානායිතා ශ්රුත්වා ප්රියං රාමාභිෂේචනම් ॥ 33 ॥
තස්මින් කාලේ හි කෞශල්යා තස්ථාවාමීලිතේක්ෂණා ।
සුමිත්රයාऽන්වාස්යමානා සීතයා ලක්ෂ්මණේන ච ॥ 34 ॥
ශ්රුත්වා පුෂ්යේණ පුත්රස්ය යෞවරාජ්යාऽභිෂේචනම් ।
ප්රාණායාමේන පුරුෂං ධ්යායමානා ජනාර්දනම් ॥ 35 ॥
තථා සනියමාමේව සෝऽභිගම්යාභිවාද්ය ච ।
උවාච වචනං රාමෝ හර්ෂයංස්තාමනිංදිතාම් ॥ 36 ॥
අංබ පිත්රා නියුක්තෝऽස්මි ප්රජාපාලනකර්මණි ।
භවිතා ශ්වෝऽභිෂේකෝ මේ යථා මේ ශාසනං පිතුඃ ॥ 37 ॥
සීතයාප්යුපවස්තව්යා රජනීයං මයා සහ ।
ඒවමෘත්විගුපාධ්යායෛ ස්සහ මාමුක්තවාන්පිතා ॥ 38 ॥
යානි යාන්යත්ර යෝග්යානි ශ්වෝභාවින්යභිෂේචනේ ।
තානි මේ මංගලාන්යද්ය වෛදේහ්යාශ්චෛව කාරය ॥ 39 ॥
ඒතච්ඡ්රුත්වා තු කෞශල්යා චිරකාලාභිකාංක්ෂිතම් ।
හර්ෂබාෂ්පකලං වාක්යමිදං රාමමභාෂත ॥ 40 ॥
වත්ස රාම චිරං ජීව හතාස්තේ පරිපංථිනඃ ।
ජ්ඤාතීන්මේ ත්වං ශ්රියා යුක්ත ස්සුමිත්රායාශ්ච නංදය ॥ 41 ॥
කල්යාණේ බත නක්ෂත්රේ මයි ජාතෝऽසි පුත්රක ।
යේන ත්වයා දශරථෝ ගුණෛරාරාධිතඃ පිතා ॥ 42 ॥
අමෝඝං බත මේ ක්ෂාංතං පුරුෂේ පුෂ්කරේක්ෂණේ ।
යේයමික්ෂ්වාකුරාජ්යශ්රීඃ පුත්ර ත්වාං සංශ්රයිෂ්යති ॥ 43 ॥
ඉත්යේවමුක්තෝ මාත්රේදං රාමෝ භ්රාතරමබ්රවීත් ।
ප්රාංජලිං ප්රහ්වමාසීනමභිවීක්ෂ්ය ස්මයන්නිව ॥ 44 ॥
ලක්ෂ්මණේමාං මයා සාර්ධං ප්රශාධි ත්වං වසුංධරාම් ।
ද්විතීයං මේऽංතරාත්මානං ත්වාමියං ශ්රීරුපස්ථිතා ॥ 45 ॥
සෞමිත්රේ භුංක්ෂ්ව භෝගාංත්ස්වමිෂ්ටාන්රාජ්යඵලානි ච ।
ජීවිතං ච හි රාජ්යං ච ත්වදර්ථමභිකාමයේ ॥ 46 ॥
ඉත්යුක්ත්වා ලක්ෂ්මණං රාමෝ මාතරාවභිවාද්ය ච ।
අභ්යනුජ්ඤාප්ය සීතාං ච ජගාම ස්වං නිවේශනම් ॥ 47 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ චතුර්ථස්සර්ගඃ ॥
