ශ්රීමද්වාල්මීකීය රාමායණේ අයෝධ්යාකාංඩම් ।
අථ නවාධිකශතතමස්සර්ගඃ ।
ජාබාලේස්තු වචශ්ශ්රුත්වා රාම ස්සත්යාත්මනාං වරඃ ।
උවාච පරයා භක්ත්යා ස්වබුද්ධ්යා චාවිපන්නයා ॥ 1 ॥
භවාන්මේ ප්රියකාමාර්ථං වචනං යදිහෝක්තවාන් ।
අකාර්යං කාර්යසංකාශමපථ්යං පථ්යසම්මතම් ॥ 2 ॥
නිර්මර්යාදස්තු පුරුෂඃ පාපාචාරසමන්විතඃ ।
මානං න ලභතේ සත්සු භින්නචාරිත්රදර්ශනඃ ॥ 3 ॥
කුලීනමකුලීනං වා වීරං පුරුෂමානිනම් ।
චාරිත්රමේව ව්යාඛ්යාති ශුචිං වා යදි වාऽශුචිම් ॥ 4 ॥
අනාර්යස්ත්වාර්යසංකාශ ශ්ශෞචාද්දීනස්තාථාऽශුචිඃ ।
ලක්ෂණ්යවදලක්ෂණ්යෝ දුශ්ශීලශ්ශීලවානිව ॥ 5 ॥
අධර්මං ධර්මවේශේණ යදීමං ලෝකසංකුරම් ।
අභිපත්ස්යේ ශුභං හිත්වා ක්රියාවිධිවිවර්ජිතම් ॥ 6 ॥
කශ්චේතයානඃ පුරුෂඃ කාර්යාකාර්යවිචක්ෂණඃ ।
බහුමංස්යති මාං ලෝකේ දුර්වෘත්තං ලෝකදූෂණම් ॥ 7 ॥
කස්ය දාස්යාම්යහං වෘත්තං කේන වා ස්වර්ගමාප්නුයාම් ।
ආනයා වර්තමානෝ හි වෘත්ත්යා හීනප්රතිජ්ඤයා ॥ 8 ॥
කාමවෘත්තස්ත්වයං ලෝකඃ කෘත්ස්න ස්සමුපවර්තතේ ।
යද්වෘත්තා ස්සංති රාජානස්තද්වෘත්තා ස්සංති හි ප්රජාඃ ॥ 9 ॥
සත්යමේවානෘශංසං ච රාජවෘත්තං සනාතනම් ।
තස්මාත්සත්යාත්මකං රාජ්යං සත්යේ ලෝකඃ ප්රතිෂ්ඨිතඃ ॥ 10 ॥
ඍෂයශ්චෛව දේවාශ්ච සත්යමේව හි මේනිරේ ।
සත්යවාදී හි ලෝකේऽස්මින්පරමං ගච්ඡති ක්ෂයම් ॥ 11 ॥
උද්විජංතේ යථා සර්පාන්නරාදනෘතවාදිනඃ ।
ධර්ම ස්සත්යං පරෝ ලෝකේ මූලං ස්වර්ගස්ය චෝච්යතේ ॥ 12 ॥
සත්යමේවේශ්වරෝ ලෝකේ සත්යං පද්මාශ්රිතා සදා ।
සත්යමූලානි සර්වාණි සත්යාන්නාස්ති පරං පදම් ॥ 13 ॥
දත්තමිෂ්ටං හුතං චෛව තප්තානි ච තපාංසි ච ।
වේදා ස්සත්යප්රතිෂ්ඨානා ස්තස්මාත්සත්යපරෝ භවේත් ॥ 14 ॥
ඒකඃ පාලයතේ ලෝකමේකඃ පාලයතේ කුලම් ।
මජ්ජත්යේකෝ හි නිරය ඒක ස්ස්වර්ගේ මහීයතේ ॥ 15 ॥
සෝऽහං පිතුර්නියෝගං තු කිමර්ථං නානුපාලයේ ।
සත්යප්රතිශ්රව ස්සත්යං සත්යේන සමයීකෘතඃ ॥ 16 ॥
නෛව ලෝභාන්න මෝහාද්වා න හ්යජ්ඤානාත්තමෝऽන්විතඃ ।
සේතුං සත්යස්ය භේත්ස්යාමි ගුරෝ ස්සත්යප්රතිශ්රවඃ ॥ 17 ॥
අසත්යසංධස්ය සතශ්චලස්යාස්ථිරචේතසඃ ।
නෛව දේවා න පිතරඃ ප්රතීච්ඡංතීති නඃ ශ්රුතම් ॥ 18 ॥
ප්රත්යගාත්මමිමං ධර්මං සත්යං පශ්යාම්යහං ස්වයම් ।
භාර ස්සත්පුරුෂාචීර්ණස්තදර්ථමභිමන්යතේ ॥ 19 ॥
ක්ෂාත්රං ධර්මමහංත්යක්ෂ්යේ හ්යධර්මං ධර්මසංහිතම් ।
ක්ෂුද්රෛර්නෘශංසෛර්ලුබ්ධෛශ්ච සේවිතං පාපකර්මභිඃ ॥ 20 ॥
කායේන කුරුතේ පාපං මනසා සංප්රධාර්ය තත් ।
අනෘතං ජිහ්වයා චාහ ත්රිවිධං කර්මපාතකම් ॥ 21 ॥
භූමිඃ කීර්තිර්යශෝ ලක්ෂ්මීඃ පුරුෂං ප්රාර්ථයංති හි ।
සත්යං සමනුවර්තනේ සත්යමේව භජේත තතඃ ॥ 22 ॥
ශ්රේෂ්ඨං හ්යනාර්යමේව ස්යාද්යද්භවානවධාර්ය මාම් ।
ආහ යුක්ති කරෛර්වාක්යෛරිදං භද්රං කුරුෂ්ව හ ॥ 23 ॥
කථං හ්යහං ප්රතිජ්ඤාය වනවාසමිමං ගුරෝඃ ।
භරතස්ය කරිෂ්යාමි වචෝ හිත්වා ගුරෝර්වචඃ ॥ 24 ॥
ස්ථිරා මයා ප්රතිජ්ඤාතා ප්රතිජ්ඤා ගුරුසන්නිධෞ ।
ප්රහෘෂ්යමාණා සා දේවී කෛකේයී චාභවත්තදා ॥ 25 ॥
වනවාසං වසන්නේව ශුචිර්නියතභෝජනඃ ।
මූලපුෂ්පඵලෛඃ පුණ්යෛඃ පිත්රූන් දේවාංශ්ච තර්පයන් ॥ 26 ॥
සංතුෂ්ටපංචවර්ගෝऽහං ලෝකයාත්රාං ප්රවර්තයේ ।
අකුහ ශ්ශ්රද්ධධානස්සන්කාර්යාකාර්යවිචක්ෂණඃ ॥ 27 ॥
වනවාසං වසන්නේවං ශුචිර්නියතභෝජනඃ ।
මූලෛඃ පුෂ්පෛඃ ඵලෛඃ පුණ්යෛඃ පිත්රූන් දේවාංශ්ච තර්පයන් ॥ 28 ॥
සංතුෂ්ටපංචවර්ගෝऽහං ලෝකයාත්රාං ප්රවර්තයේ ।
අකුහ ශ්ශ්රද්ධධානස්සන්කාර්යාකාර්යවිචක්ෂණඃ ॥ 29 ॥
කර්මභූමිමාං ප්රාප්ය කර්තව්යං කර්ම යච්ඡුභම් ।
අග්නිර්වායුශ්ච සෝමශ්ච කර්මණාං ඵලභාගිනඃ ॥ 30 ॥
ශතං ක්රතූනාමාහෘත්ය දේවරාට් ත්රිදිවං ගතඃ ।
තපාංස්යුග්රාණි චාස්ථාය දිවං යාතා මහර්ෂයඃ ॥ 31 ॥
අමෘෂ්යමාණඃ පුනරුග්රතේජාඃ නිශම්ය තං නාස්තිකවාක්යහේතුම් ।
අථාබ්රවීත්තං නෘපතේස්තනූජෝ විගර්හමාණෝ වචනානි තස්ය ॥ 32 ॥
සත්යං ච ධර්මං ච පරාක්රමං ච භූතානුකංපාං ප්රියවාදිතාං ච ।
ද්විජාතිදේවාතිධිපූජනං ච පංථානමාහුස්ත්රිදිවස්ය සංතඃ ॥ 33 ॥
තේනෛවමාජ්ඤාය යථාවදර්ථමේකෝදයං සංප්රතිපද්ය විප්රාඃ ।
ධර්මං චරංත ස්සකලං යථාවත්කාංක්ෂංති ලෝකාගමමප්රමත්තාඃ ॥ 34 ॥
නිංදාම්යහං කර්ම කෘතං පිතුස්තද්යස්ත්වාමගෘහ්ණාද්විෂමස්ථබුද්ධිම් ।
බුද්ධ්යාऽනයෛවංවිධයා චරංතං සුනාස්තිකං ධර්මපථාදපේතම් ॥ 35 ॥
යථා හි චෝරඃ ස තථා හි බුද්ධස්තථාගතං නාස්තිකමත්ර විද්ධි ।
තස්මාද්ධි යඃ ශංක්යතමඃ ප්රජානාං න නාස්තිකේනාභිමුඛෝ බුධඃ ස්යාත් ॥ 36 ॥
ත්වත්තෝ ජනාඃ පූර්වතරේ ද්විජාච්ශ්ර ශුභානි කර්මාණි බහූනි චක්රුඃ ।
ජිත්වා සදේමං ච පරං ච ලෝකං තස්මාව්දිජා ස්වස්ති හුතං කෘතං ච ॥ 37 ॥
ධර්මේ රතාඃ සත්පුරුෂෛඃ සමේතාස්තේජස්විනෝ දානගුණප්රධානාඃ ।
අහිංසකා වීතමලාශ්ච ලෝකේ භවංති පූජ්යා මුනයඃ ප්රධානාඃ ॥ 38 ॥
ඉති බ්රුවංතං වචනං සරෝෂං රාමං මහාත්මානමදීනසත්ත්වම් ।
උවාච පථ්යං පුනරාස්තිකං ච සත්යං වචඃ සානුනයං ච විප්රඃ ॥ 39 ॥
න නාස්තිකානාං වචනං බ්රවීම්යහං න නාස්තිකෝऽහං න ච නාස්ති කිංචන ।
සමීක්ෂ්ය කාලං පුනරාස්තිකෝऽභවං භවේය කාලේ පුනරේව නාස්තිකඃ ॥ 40 ॥
න චාපි කාලෝऽය මුපාගතශ්ශනෛර්යථා මයා නාස්තිකවාගුදීරිතා ।
නිවර්තනාර්ථං තව රාම කාරණාත් ප්රසාදනාර්ථං ච මයෛතදීරිතම් ॥ 41 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ නවාධිකශතතමස්සර්ගඃ ॥
