ශ්රීමද්වාල්මීකීය රාමායණේ අරණ්යකාංඩම් ।
අථ ද්විතීයස්සර්ගඃ ।
කෘතාතිථ්යෝऽථ රාමස්තු සූර්යස්යෝදයනං ප්රති ।
ආම්නත්ऱ්ය ස මුනීන්සර්වාන්වනමේවාන්වගාහත ॥ 1 ॥
නානාමෘගගණාකීර්ණමෘක්ෂශාර්දූල සේවිතම් ।
ධ්වස්තවෘක්ෂලතාගුල්මං දුර්දර්ශසලිලාශයම් ॥ 2 ॥
නිෂ්කූජනානාශකුනිඣිල්ලිකාගණනාදිතම් ।
ලක්ෂ්මණානුගතෝ රාමෝ වනමධ්යං දදර්ශ හ ॥ 3 ॥
සීතයා සහ කාකුත්ස්ථස්තස්මිනඝෝරමෘගායුතේ ।
දදර්ශ ගිරිශෘංගාභං පුරුෂාදං මහාස්වනම් ॥ 4 ॥
ගංභීරාක්ෂං මහාවක්ත්රං විකටං විෂමෝදරම් ।
බීභත්සං විෂමං දීර්ඝං විකෘතං ඝෝරදර්ශනම් ॥ 5 ॥
වසානං චර්ම වෛයාඝ්රං වසාර්ද්රං රුධිරෝක්ෂිතම් ।
ත්රාසනං සර්වභූතානාං ව්යාදිතාස්යමිවාංතකම් ॥ 6 ॥
ත්රීන්සිම්හාන්ශ්චතුරෝ ව්යාඝ්රාංද්වෞ වෘකෞ පෘෂතාංදශ ।
සවිෂාණං වසාදිග්ධං ගජස්ය ච ශිරෝ මහත් ।
අවසජ්යායසේ ශූලේ විනදංතං මහාස්වනම් ॥ 7 ॥
ස රාමං ලක්ෂ්මණං චෛව සීතාං දෘෂ්ට්වා ච මෛථිලීම් ।
අභ්යධාවත්සුසංකෘද්ධඃ ප්රජාඃ කාල ඉවාංතකඃ ॥ 8 ॥
ස කෘත්වා භෛරවං නාදං චාලයන්නිව මේදිනීම් ।
අංකේනාදාය වෛදේහීමපක්රම්ය තතෝऽබ්රවීත් ॥ 9 ॥
යුවාං ජටාචීරධරෞ සභාර්යෞ ක්ෂීණජීවිතෞ ।
ප්රවිෂ්ටෞ දංඩකාරණ්යං ශරචාපාසිධාරිණෞ ॥ 10 ॥
කථං තාපසයෝර්වාං ච වාසඃ ප්රමදයා සහ ।
අධර්මචාරිණෞ පාපෞ කෞ යුවාං මුනිදූෂකෞ ॥ 11 ॥
අහං වනමිදං දුර්ගං විරාධෝ නාම රාක්ෂසඃ ।
චරාමි සායුධෝ නිත්යමෘෂිමාංසානි භක්ෂයන් ॥ 12 ॥
ඉයං නාරී වරාරෝහා මම භාර්යා භවිෂ්යති ।
යුවයෝඃ පාපයෝශ්චාහං පාස්යාමි රුධිරං මෘධේ ॥ 13 ॥
තස්යෛවං බ්රුවතෝ දුෂ්ටං විරාධස්ය දුරාත්මනඃ ।
ශ්රුත්වා සගර්විතං වාක්යං සංභ්රාංතා ජනකාත්මජා ॥ 14 ॥
සීතා ප්රවේපතෝද්වේගාත් ප්රාවාතේ කදලී යථා ॥ 15 ॥
තාං දෘෂ්ට්වා රාඝවඃ සීතාං විරාධාංකගතාං ශුභාම් ।
අබ්රවීල්ලක්ෂ්මණං වාක්යං මුඛේන පරිශුෂ්යතා ॥ 16 ॥
පශ්ය සෞම්ය නරේංද්රස්ය ජනකස්යාත්මසංභවාම් ।
මම භාර්යාං ශුභාචාරාං විරාධාංකේ ප්රවේශිතාම් ॥ 17 ॥
අත්යංතසුඛසංමවෘද්ධාං රාජපුත්රීං යශස්විනීම් ।
යදභිප්රේතමස්මාසු ප්රියං වරවෘතං ච යත් ॥ 18 ॥
කෛකේය්යාස්තු සුසංවෘත්තං ක්ෂිප්රමද්යෛව ලක්ෂ්මණ ।
යා න තුෂ්යති රාජ්යේන පුත්රාර්ථේ දීර්ඝදර්ශිනී ॥ 19 ॥
යයාහං සර්වභූතානාං ප්රියඃ ප්රස්ථාපිතෝ වනම් ।
අද්යේදානීං සකාමා සා යා මාතා මධ්යමා මම ॥ 20 ॥
පරස්පර්ශාත්තු වෛදේහ්යාඃ න දුඃඛතරමස්තිමේ ।
පිතුර්විනාශාත්සෞමිත්රේ ස්වරාජ්යහරණාත්තථා ॥ 21 ॥
ඉති බ්රුවති කාකුත්ස්ථේ බාෂ්පශෝකපරිප්ලුතේ ।
අබ්රවීල්ලක්ෂ්මණඃ ක්රුද්ධෝ රුද්ධෝ නාග ඉව ශ්වසන් ॥ 22 ॥
අනාථ ඉව භූතානාං නාථස්ත්වං වාසවෝපමඃ ।
මයා ප්රේෂ්යේණ කාකුත්ස්ථ කිමර්ථං පරිතප්යසේ ॥ 23 ॥
ශරේණ නිහතස්යාද්ය මයා ක්රුද්ධේන රක්ෂසඃ ।
විරාධස්ය ගතාසෝර්හි මහී පාස්යති ශෝණිතම් ॥ 24 ॥
රාජ්යකාමේ මම ක්රෝධෝ භරතේ යෝ බභූව හ ।
තං විරාධේ ප්රමෝක්ෂ්යාමි වජ්රී වජ්රමිවාචලේ ॥ 25 ॥
මම භුජබලවේගවේගිතඃ පතතු ශරෝऽස්ය මහාන්මහෝරසි ।
ව්යපනයතු තනෝශ්ච ජීවිතං පතතු තතස්සමහීං විඝූර්ණිතඃ ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ද්විතීයස්සර්ගඃ ॥
