ශ්රීමද්වාල්මීකීය රාමායණේ සුංදරකාංඩම් ।
අථ පංචවිංශස්සර්ගඃ ।
අථ තාසාං වදංතීනාං පරුෂං දාරුණං බහු ।
රාක්ෂසීනාමාසෞම්යානාං රුරෝද ජනකාත්මජා ॥ 1 ॥
ඒවමුක්තා තු වෛදේහී රාක්ෂසීභිර්මනස්විනී ।
උවාච පරමත්රස්තා භාෂ්පග්ද්ගදයා ගිරා ॥ 2 ॥
න මානුෂී රාක්ෂසස්ය භාර්යා භවිතුමර්හති ।
කාමං ඛාදත මාං සර්වා න කරිෂ්යාමි වෝ වචඃ ॥ 3 ॥
සා රාක්ෂසීමධ්යගතා සීතා සුරසුතෝපමා ।
න ශර්ම ලේභේ දුඃඛාර්තා රාවණේන ච තර්ජිතා ॥ 4 ॥
වේපතේ ස්මාධිකං සීතා විශංතී වාංගමාත්මනඃ ।
වනේ යූථපරිභ්රෂ්ටා මෘගී කෝකෛරිවාර්දිතා ॥ 5 ॥
සා ත්වශෝකස්ය විපුලාං ශාඛාමාලංබ්ය පුෂ්පිතාම් ।
චිංතයාමාස ශෝකේන භර්තාරං භග්නමානසා ॥ 6 ॥
සා ස්නාපයංතී විපුලෞ ස්තනෞ නේත්රජලස්රවෛඃ ।
චිංතයංතී න ශෝකස්ය තදාංතමධිගච්ඡති ॥ 7 ॥
සා වේපමානා පතිතා ප්රවාතේ කදලී යථා ।
රාක්ෂසීනාං භයත්රස්තා විවර්ණවදනාභවත් ॥ 8 ॥
තස්යාඃ සා දීර්ඝවිපුලා වේපංත්යා සීතයා තදා ।
දදෘශේ කංපිනී වේණී ව්යාලීව පරිසර්පතී ॥ 9 ॥
සා නිඃශ්වසංතී දුඃඛාර්තා ශෝකෝපහතචේතනා ।
ආර්තා ව්යසෘජදශ්රූණි මෛථිලී විලලාප ච ॥ 10 ॥
හා රාමේති ච දුඃඛාර්තා හා පුනර්ලක්ෂ්මණේති ච ।
හා ශ්වශ්රු මම කෞසල්යේ හා සුමිත්රේති භාමිනී ॥ 11 ॥
ලෝකප්රවාදඃ සත්යෝऽයං පංඩිතෛඃ සමුදාහෘතඃ ।
අකාලේ දුර්ලභෝ මෘත්යුඃ ස්ත්රියා වා පුරුෂස්ය වා ॥ 12 ॥
යදහමේවං ක්රූරාභී රාක්ෂසීභිරිහාර්දිතා ।
ජීවාමි හීනා රාමේණ මුහූර්තමපි දුඃඛිතා ॥ 13 ॥
ඒෂාල්පපුණ්යා කෘපණා විනශිෂ්යාම්යනාථවත් ।
සමුද්රමධ්යේ නෞඃ පූර්ණා වායුවේගෛරිවාහතා ॥ 14 ॥
භර්තාරං තමපශ්යංතී රාක්ෂසීවශමාගතා ।
සීදාමි ඛලු ශෝකේන කූලං තෝයහතං යථා ॥ 15 ॥
තං පද්මදලපත්රාක්ෂං සිංහවික්රාංතගාමිනම් ।
ධන්යාඃ පශ්යංති මේ නාථං කෘතජ්ඤං ප්රියවාදිනම් ॥ 16 ॥
සර්වථා තේන හීනායා රාමේණ විදිතාත්මනා ।
තීක්ෂ්ණං විෂමිවාස්වාද්ය දුර්ලභං මම ජීවිතම් ॥ 17 ॥
කීදෘශං තු මහාපාපං මයා ජන්මාංතරේ කෘතම් ।
යනේදං ප්රාප්යතේ දුඃඛං මයා ඝෝරං සුදාරුණම් ॥ 18 ॥
ජීවිතං ත්යක්තුමිච්ඡාමි ශෝකේන මහතා වෘතා ।
රාක්ෂසීභිශ්ච රක්ෂංත්යා රාමෝ නාසාද්යතේ මයා ॥ 19 ॥
ධිගස්තු ඛලු මානුෂ්යං ධිගස්තු පරවශ්යතාම් ।
න ශක්යං යත්පරිත්යක්තුමාත්මච්ඡංදේන ජීවිතම් ॥ 20 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ පංචවිංශස්සර්ගඃ ॥
