ශ්රීමද්වාල්මීකීය රාමායණේ අයෝධ්යාකාංඩම් ।
අථ සප්තත්රිංශස්සර්ගඃ ।
මහාමාත්රවචඃ ශ්රුත්වා රාමෝ දශරථං තදා ।
අභ්යභාෂත වාක්යං තු විනයජ්ඤෝ විනීතවත් ॥ 1 ॥
ත්යක්තභෝගස්ය මේ රාජන් වනේ වන්යේන ජීවතඃ ।
කිං කාර්යමනුයාත්රේණ ත්යක්තසංගස්ය සර්වතඃ ॥ 2 ॥
යෝ හි දත්ත්වා ද්විපශ්රේෂ්ඨං කක්ෂ්යායාං කුරුතේ මනඃ ।
රජ්ජුස්නේහේන කිං තස්ය ත්යජතඃ කුංජරෝත්තමම් ॥ 3 ॥
තථා මම සතාං ශ්රේෂ්ඨ කිං ධ්වජින්යා ජගත්පතේ ।
සර්වාණ්යේවානුජානාමි චීරාණ්යේවාऽනයංතු මේ ॥ 4 ॥
ඛනිත්රපිටකේ චෝභේ සමානයත ගච්ඡතඃ ।
චතුර්දශ වනේ වාසං වර්ෂාණි වසතෝ මම ॥ 5 ॥
අථ චීරාණි කෛකේයී ස්වයමාහෘත්ය රාඝවම් ।
උවාච පරිධත්ස්වේති ජනෞඝේ නිරපත්රපා ॥ 6 ॥
ස චීරේ පුරුෂව්යාඝ්රඃ කෛකේය්යා ප්රතිගෘහ්ය තේ ।
සූක්ෂ්මවස්ත්රමවක්ෂිප්ය මුනිවස්ත්රාණ්යවස්ත හ ॥ 7 ॥
ලක්ෂ්මණශ්චාපි තත්රෛව විහාය වසනේ ශුභේ ।
තාපසාච්ඡාදනේ චෛව ජග්රාහ පිතුරග්රතඃ ॥ 8 ॥
අථාऽත්මපරිධානාර්ථං සීතා කෞශේයවාසිනී ।
සමීක්ෂ්ය චීරං සංත්රස්තා පෘෂතී වාගුරාමිව ॥ 9 ॥
සා ව්යපත්රපමාණේව ප්රගෘහ්ය ච සුදුර්මනාඃ ।
කෛකේයී කුශචීරේ තේ ජානකී ශුභලක්ෂණා ॥ 10 ॥
අශ්රුසංපූර්ණ නේත්රා ච ධර්මජ්ඤා ධර්මදර්ශිනී ।
ගංධර්වරාජප්රතිමං භර්තාරමිදමබ්රවීත් ॥ 11 ॥
කථං නු චීරං බධ්නංති මුනයෝ වනවාසිනඃ ।
ඉති හ්යකුශලා සීතා සා මුමෝහ මුහුර්මුහුඃ ॥ 12 ॥
කෘත්වා කංඨේ ච සා චීරමේකමාදාය පාණිනා ।
තස්ථෞ හ්යකුශලා තත්ර ව්රීඩිතා ජනකාත්මජා ॥ 13 ॥
තස්යාස්තත්ක්ෂිප්රමාගම්ය රාමෝ ධර්මභෘතාං වරඃ ।
චීරං බබංධ සීතායාඃ කෞශේයස්යෝපරි ස්වයම් ॥ 14 ॥
රාමං ප්රේක්ෂ්ය තු සීතායා බධ්නංතං චීරමුත්තමම් ।
අංතඃපුරගතා නාර්යෝ මුමුචුර්වාරි නේත්රජම් ॥ 15 ॥
ඌචුශ්ච පරමායස්තා රාමං ජ්වලිතතේජසම් ।
වත්ස නෛවං නියුක්තේයං වනවාසේ මනස්විනී ॥ 16 ॥
පිතුර්වාක්යානුරෝධේන ගතස්ය විජනං වනම් ।
තාවද්දර්ශනමස්යා නඃ සඵලං භවතු ප්රභෝ ॥ 17 ॥
ලක්ෂ්මණේන සහායේන වනං ගච්ඡස්ව පුත්රක ।
නේයමර්හති කල්යාණී වස්තුං තාපසවද්වනේ ॥ 18 ॥
කුරු නෝ යාචනාං පුත්ර සීතා තිෂ්ඨතු භාමිනී ।
ධර්මනිත්යස්ස්වයං ස්ථාතුං න හීදානීං ත්වමිච්ඡසි ॥ 19 ॥
තාසාමේවංවිධා වාච ශෘණ්වන් දශරථාත්මජඃ ।
බබංධෛව තදා චීරං සීතයා තුල්යශීලයා ॥ 20 ॥
චීරේ ගෘහීතේ තු තයා සමීක්ෂ්ය නෘපතේර්ගුරුඃ ।
නිවාර්ය සීතාං කෛකේයීං වසිෂ්ඨෝ වාක්යමබ්රවීත් ॥ 21 ॥
අතිප්රවෘත්තේ දුර්මේධේ කෛකේයි කුලපාංසනි ।
වංචයිත්වා ච රාජානං න ප්රමාණේऽවතිෂ්ඨසේ ॥ 22 ॥
න ගංතව්යං වනං දේව්යා සීතයා ශීලවර්ජිතේ ।
අනුෂ්ඨාස්යති රාමස්ය සීතා ප්රකෘතමාසනම් ॥ 23 ॥
ආත්මා හි දාරාස්සර්වේෂාං දාරසංග්රහවර්තිනාම් ।
ආත්මේයමිති රාමස්ය පාලයිෂ්යති මේදිනීම් ॥ 24 ॥
අථ යාස්යති වෛදේහී වනං රාමේණ සංගතා ।
වයමප්යනුයාස්යාමඃ පුරං චේදං ගමිෂ්යති ॥ 25 ॥
අංතපාලාශ්ච යාස්යංති සදාරෝ යත්ර රාඝවඃ ।
සහෝපජීව්යං රාෂ්ට්රං ච පුරං ච සපරිච්ඡදම් ॥ 26 ॥
භරතශ්ච සශත්රුඝ්නශ්චීරවාසා වනේචරඃ ।
වනේ වසංතං කාකුත්ස්ථ මනුවත්ස්යති පූර්වජම් ॥ 27 ॥
තත ශ්ශූන්යාං ගතජනාං වසුධාං පාදපෛ ස්සහ ।
ත්වමේකා ශාධි දුර්වෘත්තා ප්රජානාමහිතේ ස්ථිතා ॥ 28 ॥
න හි තද්භවිතා රාෂ්ට්රං යත්ර රාමෝ න භූපතිඃ ।
තද්වනං භවිතා රාෂ්ට්රං යත්ර රාමෝ නිවත්ස්යති ॥ 29 ॥
න හ්යදත්තාං මහීං පිත්රා භරතඃ ශාස්තුමර්හති ।
ත්වයි වා පුත්රවද්වස්තුං යදි ජාතෝ මහීපතේඃ ॥ 30 ॥
යද්යපි ත්වං ක්ෂිතිතලාද්ගගනං චෝත්පතිෂ්යසි ।
පිතෘර්වංශචරිත්රජ්ඤඃ සෝऽන්යථා න කරිෂ්යති ॥ 31 ॥
තත්ත්වයා පුත්රගර්ධින්යා පුත්රස්ය කෘතමප්රියම් ।
ලෝකේ හි ස න විද්යේත යෝ න රාමමනුව්රතඃ ॥ 32 ॥
ද්රක්ෂ්යස්යද්යෛව කෛකේයී පශුව්යාලමෘගද්විජාන් ।
ගච්ඡතස්සහ රාමේණ පාදපාංශ්ච තදුන්මුඛාන් ॥ 33 ॥
අථෝත්තමාන්යාභරණානි දේවි දේහි ස්නුෂායෛ ව්යපනීය චීරම් ।
න චීරමස්යාඃ ප්රවිධීයතේති න්යවාරයත්තද්වසනං වසිෂ්ටඃ ॥ 34 ॥
ඒකස්ය රාමස්ය වනේ නිවාස ස්ත්වයා වෘතඃකේකයරාජපුත්රී ।
විභූෂිතේයං ප්රතිකර්මනිත්යා වසත්වරණ්යේ සහ රාඝවේණ ॥ 35 ॥
යානෛශ්ච මුඛ්යෛඃ පරිචාරකෛශ්ච සුසංවෘතා ගච්ඡතු රාජපුත්රී ।
වස්ත්රෛශ්ච සර්වෛස්සහිතෛර්විධානෛ ර්නේයං වෘතා තේ වරසංප්රදානේ ॥ 36 ॥
තස්මිංස්තථා ජල්පති විප්රමුඛ්යේ ගුරෞ නෘපස්යාප්රතිමප්රභාවේ ।
නෛව ස්ම සීතා විනිවෘත්තභාවා ප්රියස්ය භර්තුඃ ප්රතිකාරකාමා ॥ 37 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ සප්තත්රිංශස්සර්ගඃ ॥
