ශ්රීමද්වාල්මීකීය රාමායණේ කිෂ්කිංධාකාංඩම් ।
අථ ත්රිෂෂ්ටිතමස්සර්ගඃ ।
ඒතෛරන්යෛශ්ච බහුභිර්වාක්යෛර්වාක්යවිශාරදඃ ।
මාං ප්රශස්යාභ්යනුජ්ඤාප්ය ප්රවිෂ්ටස්ස ස්වමාලයම් ॥ 1 ॥
කංදරාත්තු විසර්පිත්වා පර්වතස්ය ශනෛශ්ශනෛඃ ।
අහං විංධ්යං සමාරුහ්ය භවතඃ ප්රතිපාලයේ ॥ 2 ॥
අද්ය ත්වේතස්ය කාලස්ය සාග්රං වර්ෂශතං ගතම් ।
දේශකාලප්රතීක්ෂෝऽස්මි හෘදි කෘත්වා මුනේර්වචඃ ॥ 3 ॥
මහාප්රස්ථානමාසාද්ය ස්වර්ගතේ තු නිශාකරේ ।
මාං නිර්දහති සංතාපෝ විතර්කෛර්බහුභිර්වෘතම් ॥ 4 ॥
උත්ථිතාං මරණේ බුද්ධිං මුනිවාක්යෛර්නිවර්තයේ ।
බුද්ධිර්යා තේන මේ දත්තා ප්රාණානාං රක්ෂණාය තු ॥ 5 ॥
සා මේऽපනයතේ දුඃඛං දීප්තේවාග්නිශිඛා තමඃ ।
බුද්ධ්යතා ච මයා වීර්යං රාවණස්ය දුරාත්මනඃ ॥ 6 ॥
පුත්රස්සංතර්ජිතෝ වාග්භිර්න ත්රාතා මෛථිලී කථම් ।
තස්යා විලපිතං ශ්රුත්වා තෞ ච සීතාවිනාකෘතෞ ॥ 7 ॥
න මේ දශරථස්නේහාත්පුත්රේණෝත්පාදිතං ප්රියම් ।
තස්ය ත්වේවං බ්රුවාණස්ය සංපාතේර්වානරෛස්සහ ॥ 8 ॥
උත්පේතතුස්තදා පක්ෂෞ සමක්ෂං වනචාරිණාම් ।
ස දෘෂ්ට්වා ස්වාං තනුං පක්ෂෛරුද්ගතෛරරුණච්ඡදෛඃ ॥ 9 ॥
ප්රහර්ෂමතුලං ලේභේ වානරාංශ්චේදමබ්රවීත් ।
ඍෂේර්නිශාකරස්යෛව ප්රභාවාදමිතාත්මනඃ ॥ 10 ॥
ආදිත්යරශ්මිනිර්දග්ධෞ පක්ෂෞ මේ පුනරුපස්ථිතෞ ।
යෞවනේ වර්තමානස්ය මමාසීද්යඃ පරාක්රමඃ ॥ 11 ॥
තමේවාද්යාවගච්ඡාමි බලං පෞරුෂමේව ච ।
සර්වථා ක්රියතාං යත්න ස්සීතාමධිගමිෂ්යථ ॥ 12 ॥
පක්ෂලාභෝ මමායං වස්සිද්ධිප්රත්යයකාරකඃ ।
ඉත්යුක්ත්වා ස තාන්හරීන් සර්වාන්සංපාතිඃ පතගෝත්තමඃ ॥ 13 ॥
උත්පපාත ගිරේශ්ශෘංගාජ්ජිජ්ඤාසුඃ ඛගමෝ ගතිම් ।
තස්ය තද්වචනං ශ්රුත්වා ප්රතිසංහෘෂ්ටමානසාඃ ॥ 14 ॥
බභූවුර්හරිශාර්දූලා වික්රමාභ්යුදයෝන්මුඛාඃ ।
අථ පවනසමානවික්රමාඃ ප්ලවගවරාඃ ප්රතිලබ්ධපෞරුෂාඃ ।
අභිජිදභිමුඛා දිශං යයු ර්ජනකසුතාපරිමාර්ගණෝන්මුඛාඃ ॥ 15 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ ත්රිෂෂ්ටිතමස්සර්ගඃ ॥
