ශ්රීමද්වාල්මීකීය රාමායණේ අරණ්යකාංඩම් ।
අථ ඒකෝනචත්වාරිංශස්සර්ගඃ ।
ඒවමස්මි තදා මුක්තඃ කථංචිත්තේන සංයුගේ ।
ඉදානීමපි යද්වෘත්තං තච්ඡෘණුෂ්ව නිරුත්තරම් ॥ 1 ॥
රාක්ෂසාභ්යාමහං ද්වාභ්යාමනිර්විණ්ණස්තථා කෘතඃ ।
සහිතෝ මෘගරූපාභ්යාං ප්රවිෂ්ටෝ දංඩකාවනම් ॥ 2 ॥
දීප්තජිහ්වෝ මහාකායස්තීක්ෂ්ණදංෂ්ට්රෝ මහාබලඃ ।
ව්යචරං දංඩකාරණ්යං මාංසභක්ෂෝ මහාමෘගඃ ॥ 3 ॥
අග්නිහෝත්රේෂු තීර්ථේෂු චෛත්යවෘක්ෂේෂු රාවණ ।
අත්යංතඝෝරෝ ව්යචරං තාපසාන්සංප්රධර්ෂයන් ॥ 4 ॥
නිහත්ය දංඩකාරණ්යේ තාපසාංධර්මචාරිණඃ ।
රුධිරාණි පිබංස්තේෂාං තථා මාංසානි භක්ෂයන් ॥ 5 ॥
ඍෂිමාංසාශනඃ ක්රූරස්ත්රාසයන්වනගෝචරාන් ।
තථා රුධිරමත්තෝऽහං විචරංධර්මදූෂකඃ ॥ 6 ॥
ආසාදයං තදා රාමං තාපසං ධර්මචාරිණම් ।
වෛදේහීං ච මහාභාගාං ලක්ෂ්මණං ච මහාරථම් ॥ 7 ॥
තාපසං නියතාහාරං සර්වභූතහිතේ රතම් ।
සෝऽහං වනගතං රාමං පරිභූය මහාබලම් ॥ 8 ॥
තාපසෝऽයමිති ජ්ඤාත්වා පූර්වවෛරමනුස්මරන් ।
අභ්යධාවං හි සංක්රුද්ධස්තීක්ෂ්ණ ශෘංගෝ මෘගාකෘතිඃ ॥ 9 ॥
ජිඝාංසුරකෘතප්රජ්ඤස්තං ප්රහාරමනුස්මරන් ।
තේන මුක්තාස්ත්රයෝ බාණාශ්ශිතාශ්ශත්රුනිබර්හණාඃ ॥ 10 ॥
විකෘෂ්ය බලවච්චාපං සුපර්ණානිලනිස්ස්වනාඃ ।
තේ බාණා වජ්රසංකාශාස්සුමුක්තා රක්තභෝජනාඃ ।
ආජග්මුස්සහිතාස්සර්වේ ත්රයස්සන්නතපර්වණඃ ॥ 11 ॥
පරාක්රමජ්ඤෝ රාමස්ය ශඨෝ දෘෂ්ටභයඃ පුරා ।
සමුද්භාංතස්තතෝමුක්තස්තාවුභෞ රාක්ෂසෞ හතෞ ॥ 12 ॥
ශරේණ මුක්තෝ රාමස්ය කථංචිත්ප්රාප්ය ජීවිතම් ।
ඉහ ප්රව්රාජිතෝ යුක්තස්තාපසෝऽහං සමාහිතඃ ॥ 13 ॥
වෘක්ෂේ වෘක්ෂේ ච පශ්යාමි චීරකෘෂ්ණාජිනාංබරම් ।
ගෘහීතධනුෂං රාමං පාශහස්තමිවාංතකම් ॥ 14 ॥
අපි රාමසහස්රාණි භීතඃ පශ්යාමි රාවණ ।
රාමභූතමිදං සර්වමරණ්යං ප්රතිභාති මේ ॥ 15 ॥
රාමමේව හි පශ්යාමි රහිතේ රාක්ෂසාධිප ।
දෘෂ්ට්වා ස්වප්නගතං රාමමුද්භ්රමාමි විචේතනඃ ॥ 16 ॥
රකාරාදීනි නාමානි රාමත්රස්තස්ය රාවණ ।
රත්නානි ච රථාශ්චෛව ත්රාසං සංජනයංති මේ ॥ 17 ॥
අහං තස්ය ප්රභාවජ්ඤෝ න යුද්ධං තේන තේ ක්ෂමම් ।
බලිං වා නමුචිං වාපි හන්යාද්ධි රඝුනංදනඃ ॥ 18 ॥
රණේ රාමේණ යුද්ධ්යස්ව ක්ෂමාං වා කුරු රාක්ෂස ।
න තේ රාමකථා කාර්යා යදි මාං ද්රෂ්ටුමිච්ඡසි ॥ 19 ॥
බහවස්සාධවෝ ලෝකේ යුක්තා ධර්මමනුෂ්ඨිතාඃ ।
පරේෂාමපරාධේන විනෂ්ඨාස්සපරිච්ඡදාඃ ॥ 20 ॥
සෝऽऽහං තවාපරාධේන විනශ්යේයං නිශාචර ।
කුරු යත්තේ ක්ෂමං තත්ත්වමහං ත්වා නානුයාමි හ ॥ 21 ॥
රාමශ්ච හි මහාතේජා මහාසත්ත්වෝ මහාබලඃ ॥ 22 ॥
අපි රාක්ෂසලෝකස්ය න භවේදංතකෝऽපි සඃ ।
යදි ශූර්පණඛාහේතෝර්ජනස්ථානගතඃ ඛරඃ ॥ 23 ॥
අතිවෘත්තෝ හතඃ පූර්වං රාමේණාක්ලිෂ්ටකර්මණා ।
අත්ර බ්රූහි යථාතත්ත්වං කෝ රාමස්ය ව්යතික්රමඃ ॥ 24 ॥
ඉදං වචෝ බංධුහිතාර්ථිනාමයා යථෝච්යමානං යදි නාභිපත්ස්යසේ ।
සබාංධවස්ත්යක්ෂ්යසි ජීවිතං රණේ හතෝऽऽද්ය රාමේණ ශරෛරජිහ්මගෛඃ ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ඒකෝනචත්වාරිංශස්සර්ගඃ ॥
