ශ්රීමද්වාල්මීකීය රාමායණේ සුංදරකාංඩම් ।
අථ පංචෂෂ්ටිතමස්සර්ගඃ ।
තතඃ ප්රස්රවණං ශෛලං තේ ගත්වා චිත්රකානනම් ।
ප්රණම්ය ශිරසා රාමං ලක්ෂ්මණං ච මහාබලම් ॥ 1 ॥
යුවරාජං පුරස්කෘත්ය සුග්රීවමභිවාද්ය ච ।
ප්රවෘත්තිමථ සීතායාඃ ප්රවක්තුමුපචක්රමුඃ ॥ 2 ॥
රාවණාංතඃ පුරේ රෝධං රාක්ෂසීභිශ්ච තර්ජනම් ।
රාමේ සමනුරාගං ච යශ්චායං සමයඃ කෘතඃ ॥ 3 ॥
ඒතදාඛ්යාංති තේ සර්වේ හරයෝ රාමසන්නිධෞ ।
වෛදේහීමක්ෂතාං ශ්රුත්වා රාමස්තූත්තරමබ්රවීත් ॥ 4 ॥
ක්ව සීතා වර්තතේ දේවී කථං ච මයි වර්තතේ ।
ඒතන්මේ සර්වමාඛ්යාත වෛදේහීං ප්රති වානරාඃ ॥ 5 ॥
රාමස්ය ගදිතං ශ්රුත්වා හරයෝ රාමසන්නිධෞ ।
චෝදයංති හනූමංතං සීතාවෘත්තාංතකෝවිදම් ॥ 6 ॥
ශ්රුත්වා තු වචනං තේෂාං හනුමාන්මාරුතාත්මජඃ ।
ප්රණම්ය ශිරසා දේව්යෛ සීතායෛ තාං දිශං ප්රති ॥ 7 ॥
උවාච වාක්යං වාක්යජ්ඤස්සීතායා දර්ශනං යථා ।
සමුද්රං ලංඝයිත්වාහං ශතයෝජනමායතම් ॥ 8 ॥
අගච්ඡං ජානකීං සීතාං මාර්ගමාණෝ දිදෘක්ෂයා ।
තත්ර ලංකේති නගරී රාවණස්ය දුරාත්මනඃ ॥ 9 ॥
දක්ෂිණස්ය සමුද්රස්ය තීරේ වසති දක්ෂිණේ ।
තත්ර දෘෂ්ටා මයා සීතා රාවණාංතඃ පුරේ සතී ॥ 10 ॥
සන්න්යස්ය ත්වයි ජීවංතී රාමා රාම මනෝරථම් ।
දෘෂ්ටා මේ රාක්ෂසීමධ්යේ තර්ජ්යමානා මුහුර්මුහුඃ ॥ 11 ॥
රාක්ෂසීභිර්විරූපාභී රක්ෂිතා ප්රමදාවනේ ।
දුඃඛ මාසාද්යතේ දේවී තථාऽදුඃඛෝචිතා සතී ॥ 12 ॥
රාවණාංතඃ පුරේ රුද්ධා රාක්ෂසීභි ස්සුරක්ෂිතා ।
ඒකවේණීධරා දීනා ත්වයි චිංතාපරායණා ॥ 13 ॥
අධඃශය්යා විවර්ණාංගී පද්මිනීව හිමාගමේ ।
රාවණාද්විනිවෘත්තාර්ථා මර්තව්යකෘතනිශ්චයා ॥ 14 ॥
දේවී කථංචිත්කාකුත්ස්ථ ත්වන්මනා මාර්ගිතා මයා ।
ඉක්ෂ්වාකුවංශවිඛ්යාතිං ශනෛඃ කීර්තයතානඝ ॥ 15 ॥
සා මයා නරශාර්දූල විශ්වාසමුපපාදිතා ।
තත ස්සංභාෂිතා දේවී සර්වමර්ථං ච දර්ශිතා ॥ 16 ॥
රාමසුග්රීවසඛ්යං ච ශ්රුත්වා ප්රීතිමුපාගතා ।
නියත ස්සමුදාචාරෝ භක්තිශ්චාස්යාස්තථා ත්වයි ॥ 17 ॥
ඒවං මයා මහාභාගා දෘෂ්ටා ජනකනංදිනී ।
උග්රේණ තපසා යුක්තා ත්වද්භක්ත්යා පුරුෂර්ෂභ ॥ 18 ॥
අභිජ්ඤානං ච මේ දත්තං යථා වෘත්තං තවාංතිකේ ।
චිත්රකූටේ මහාප්රාජ්ඤ වායසං ප්රති රාඝව ॥ 19 ॥
විජ්ඤාප්යශ්ච නරව්යාඝ්රෝ රාමෝ වායුසුත ත්වයා ।
අඛිලේනේහ යද්ධෘෂ්ටමිති මාමාහ ජානකී ॥ 20 ॥
අයං චාස්මෛ ප්රදාතව්යෝ යත්නාත්සුපරිරක්ෂිතඃ ।
බ්රුවතා වචනාන්යේවං සුග්රීවස්යෝපශෘණ්වතඃ ॥ 21 ॥
ඒෂ චූඩාමණිශ්ශ්රීමාන් මයා සුපරිරක්ෂිතඃ ।
මනශ්ශිලායාස්තිලකෝ ගංඩපාර්ශ්වේ නිවේශිතඃ ॥ 22 ॥
ත්වයා ප්රණෂ්ඨේ තිලකේ තං කිල ස්මර්තුමර්හසි ।
ඒෂ නිර්යාතිතශ්ශ්රීමාන්මයා තේ වාරි සංභවඃ ।
ඒතං දෘෂ්ට්වා ප්රහෘෂ්යාමි ව්යසනේ ත්වාමිවානඝ ॥ 23 ॥
ජීවිතං ධාරයිෂ්යාමි මාසං දශරථාත්මජ ॥ 24 ॥
ඌර්ධ්වං මාසාන්න ජීවේයං රක්ෂසාං වශමාගතා ।
ඉති මාමබ්රවීත්සීතා කෘශාංගී ධර්මචාරිණී ॥ 25 ॥
රාවණාංතඃ පුරේ රුද්ධා මෘගීවෝත්ඵුල්ලලෝචනා ।
ඒතදේව මයාඛ්යාතං සර්වං රාඝව යද්යථා ॥ 26 ॥
සර්වථා සාගරජලේ සංතාරඃ ප්රවිධීයතාම් ।
තෞ ජාතාශ්වාසෞ රාජපුත්රෞ විදිත්වා තච්චාභිජ්ඤානං රාඝවාය ප්රදාය ।
දේව්යා චාඛ්යාතං සර්වමේවානුපූර්ව්යාද්වාචා සංපූර්ණං වායුපුත්ත්ර ශ්ශශංස ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ පංචෂෂ්ටිතමස්සර්ගඃ ॥
