ශ්රීමද්වාල්මීකීය රාමායණේ සුංදරකාංඩම් ।
අථ සප්තමස්සර්ගඃ ।
ස වේශ්මජාලං බලවාන් දදර්ශ ව්යාසක්තවෛඩූර්යසුවර්ණජාලම් ।
යථා මහත් ප්රාවෘෂි මේඝජාලං විද්යුත්පිනද්ධං සවිහංගජාලම් ॥ 1 ॥
නිවේශනානාං විවිධාශ්ච ශාලාඃ ප්රධානශංඛායුධචාපශාලාඃ ।
මනෝහරාශ්චාපි පුනර්විශාලාඃ දදර්ශ වේශ්මාද්රිෂු චංද්රශාලාඃ ॥ 2 ॥
ගෘහාණි නානාවසුරාජිතානි දේවාසුරෛශ්චාපි සුපූජිතානි ।
සර්වෛශ්ච දෝෂෛඃ පරිවර්ජිතානි කපිර්දදර්ශ ස්වබලාර්ජිතානි ॥ 3 ॥
තානි ප්රයත්නාභිසමාහිතානි මයේන සාක්ෂාදිව නිර්මිතානි ।
මහීතලේ සර්වගුණෝත්තරාණි දදර්ශ ලංකාධිපතේර්ගෘහාණි ॥ 4 ॥
තතෝ දදර්ශෝඡ්රචිතමේඝරූපං මනෝහරං කාංචනචාරුරූපම් ।
රක්ෂෝऽධිපස්යාත්මබලානුරූපං ගෘහෝත්තමං හ්යප්රතිරූපරූපම් ॥ 5 ॥
මහීතලේ ස්වර්ගමිව ප්රකීර්ණං ශ්රියා ජ්වලංතං බහුරත්නකීර්ණම් ।
නානාතරූණාං කුසුමාවකීර්ණං ගිරේරිවාග්රං රජසාවකීර්ණම් ॥ 6 ॥
නාරීප්රවේකෛරිව දීප්යමානං තටිද්භිරංභෝදවදර්ච්යමානම් ।
හංසප්රවේකෛරිව වාහ්යමානං ශ්රියා යුතං ඛේ සුකෘතාං විමානම් ॥ 7 ॥
යථා නගාග්රං බහුධාතුචිත්රං යථා නභශ්ච ග්රහචංද්රචිත්රම් ।
දදර්ශයුක්තීකෘතමේඝචිත්රං විමානරත්නං බහුරත්නචිත්රම් ॥ 8 ॥
මහී කෘතා පර්වතරාජිපූර්ණා ශෛලාඃ කෘතා වෘක්ෂවිතානපූර්ණාඃ ।
වෘක්ෂාඃ කෘතාඃ පුෂ්පවිතානපූර්ණාඃ පුෂ්පං කෘතං කේසරපත්රපූර්ණම් ॥ 9 ॥
කෘතානි වේශ්මානි ච පාංඩුරාණි තථා සුපුෂ්පාණ්යපි පුෂ්කරාණි ।
පුනශ්ච පද්මානි සකේසරාණි ධන්යානි චිත්රාණි තථා වනානි ॥ 10 ॥
පුෂ්පාහ්වයං නාමවිරාජමානං රත්නප්රභාභිශ්ච විවර්ධමානම් ।
වේශ්මෝත්තමානාමපි චෝච්යමානං මහාකපිස්තත්ර මහාවිමානම් ॥ 11 ॥
කෘතාශ්ච වෛඩූර්යමයා විහංගාඃ රූප්යප්රවාලෛශ්ච තථා විහංගාඃ ।
චිත්රාශ්ච නානාවසුභිර්භුජංගාඃ ජාත්යානුරූපාස්තුරගාඃ ශුභාංගාඃ ॥ 12 ॥
ප්රවාලජාංබූනදපුෂ්පපක්ෂාඃ සලීලමාවර්ජිතජිහ්මපක්ෂාඃ ।
කාමස්ය සාක්ෂාදිව භාංති පක්ෂාඃ කෘතා විහංගාඃ සුමුඛාඃ සුපක්ෂාඃ ॥ 13 ॥
නියුජ්යමානාස්තු ගජාඃ සුහස්තාඃ සකේසරාශ්චෝත්පලපත්රහස්තාඃ ।
බභූවදේවී ච කෘතා සුහස්තා ලක්ෂ්මී ස්තථා පද්මිනි පද්මහස්තා ॥ 14 ॥
ඉතීව තද්ගෘහමභිගම්ය ශෝභනං සවිස්මයෝ නගමිව චාරුශෝභනම් ।
පුනශ්ච තත්පරමසුගංධි සුංදරං හිමාත්යයේ නගමිව චාරුකංදරම් ॥ 15 ॥
තතඃ ස තාං කපිරභිපත්ය පූජිතාං චරන් පුරීං දශමුඛබාහුපාලිතාම් ।
අදෘශ්ය තාං ජනකසුතාං සුපූජිතාං සුදුඃඛිතඃ පතිගුණවේගවර්ජිතාම් ॥ 16 ॥
තතස්තදා බහුවිධභාවිතාත්මනඃ කෘතාත්මනෝ ජනකසුතාං සුවර්ත්මනඃ ।
අපශ්යතෝऽභවදතිදුඃඛිතං මනඃ සුචක්ෂුෂඃ ප්රවිචරතෝ මහාත්මනඃ ॥ 17 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ සප්තමස්සර්ගඃ ॥
