ශ්රීමද්වාල්මීකීය රාමායණේ අරණ්යකාංඩම් ।
අථ ත්රයෝදශස්සර්ගඃ ।
රාම ප්රීතෝऽස්මි භද්රං තේ පරිතුෂ්ටෝऽස්මි ලක්ෂ්මණ ।
අභිවාදයිතුං යන්මාං ප්රාප්තෞ ස්ථ ස්සහ සීතයා ॥ 1 ॥
අධ්වශ්රමේණ වාං ඛේදෝ බාධතේ ප්රචුරශ්රමඃ ।
ව්යක්තමුත්කංඨතේ වාපි මෛථිලී ජනකාත්මජා ॥ 2 ॥
ඒෂා හි සුකුමාරී ච දුඃඛෛශ්ච න විමානිතා ।
ප්රාජ්යදෝෂං වනං ප්රාප්තා භර්තෘස්නේහප්රචෝදිතා ॥ 3 ॥
යථෛෂා රමතේ රාම ඉහ සීතා තථා කුරු ।
දුෂ්කරං කෘතවත්යේෂා වනේ ත්වාමනුගච්ඡතී ॥ 4 ॥
ඒෂා හි ප්රකෘතිඃ ස්ත්රීණාමාසෘෂ්ටේ රඝුනංදන ।
සමස්ථමනුරජ්යාංති විෂමස්ථං ත්යජංති ච ॥ 5 ॥
ශතහ්රදානාං ලෝලත්වං ශස්ත්රාණාං තීක්ෂ්ණතාං තථා ।
ගරූඩානිලයෝශ්ශෛඝ්ර්යමනුගච්ඡංති යෝෂිතඃ ॥ 6 ॥
ඉයං තු භවතෝ භාර්යා දෝෂෛරේතෛර්විවර්ජිතා ।
ශ්ලාඝ්යා ච ව්යපදේශ්යා ච යථා දේවී හ්යරුංධතී ॥ 7 ॥
අලංකෘතෝऽයං දේශශ්ච යත්ර සෞමිත්රිණා සහ ।
වෛදේහ්යා චානයා රාම වත්ස්යසි ත්වමරිංදම ॥ 8 ॥
ඒවමුක්තස්සමුනිනා රාඝවස්සංයතාංජලිඃ ।
උවාච ප්රශ්රිතං වාක්යමෘෂිං දීප්තමිවානලම් ॥ 9 ॥
ධන්යෝऽස්ම්යනුගෘහීතෝऽස්මි යස්ය මේ මුනිපුංගවඃ ।
ගුණෛස්සභ්රාතෘභාර්යස්ය වරදඃ පරිතුෂ්යති ॥ 10 ॥
කිංතු ව්යාදිශ මේ දේශං සෝදකං බහුකානනම් ।
යත්රාශ්රමපදං කෘත්වා වසේයං නිරතස්සුඛම් ॥ 11 ॥
තතෝऽබ්රවීන්මුනිශ්රේෂ්ඨශ්ශ්රුත්වා රාමස්ය තද්වචඃ ।
ධ්යාත්වා මුහූර්තං ධර්මාත්මා ධීරෝ ධීරතරං වචඃ ॥ 12 ॥
ඉතෝ ද්වියෝජනේ තාත බහුමූලඵලෝදකඃ ।
දේශෝ බහුමෘගශ්ශ්රීමාන්පංචවට්යභිවිශ්රුතඃ ॥ 13 ॥
තත්ර ගත්වාऽऽශ්රමපදං කෘත්වා සෞමිත්රිණා සහ ।
රමස්ව ත්වං පිතුර්වාක්යං තථෝක්තමනුපාලයන් ॥ 14 ॥
කාලෝऽයං ගතභූයිෂ්ඨෝ යඃ කාල ස්තව රාඝව ।
සමයෝ යෝ නරේංද්රේණ කෘතෝ දශරථේන තේ ॥ 15 ॥
තීර්ණප්රතිජ්ඤඃ කාකුත්ස්ථ සුඛං රාජ්යේ නිවත්ස්යසි ।
ධන්යස්තේ ජනකෝ රාම ස රාජා රඝුනංදන ॥ 16 ॥
යස්ත්වයා ජ්යේෂ්ඨපුත්රේණ යයාතිරිව තාරිතඃ ।
විදිතෝ හ්යේෂ වෘත්තාංතෝ මම සර්වස්තවානඝ ॥ 17 ॥
තපසශ්ච ප්රභාවේණ ස්නේහාද්දශරථස්ය ච ।
හෘදයස්ථශ්ච තේ ඡංදෝ විජ්ඤාතස්තපසා මයා ॥ 18 ॥
ඉහාවාසං ප්රතිජ්ඤාය මයා සහ තපෝවනේ ।
අතශ්ච ත්වාමහං බ්රූමි ගච්ඡ පංචවටීමිති ॥ 19 ॥
ස හි රම්යෝ වනෝද්දේශෝ මෛථිලී තත්ර රංස්යතේ ।
ස දේශශ්ශ්ලාඝනීයශ්ච නාතිදූරේ ච රාඝව ॥ 20 ॥
ගෝදාවර්යාස්සමීපේ ච මෛථිලී තත්ර රංස්යතේ ।
ප්රාජ්යමූලඵලශ්චෛව නානාද්විජගණායුතඃ ॥ 21 ॥
විවික්තශ්ච මහාබාහෝ පුණ්යෝරම්යස්තථෛව ච ।
භවානපි සදාරශ්ච ශක්තශ්ච පරිරක්ෂණේ ।
අපි චාත්ර වසන්රාම තාපසාන්පාලයිෂ්යසි ॥ 22 ॥
ඒතදාලක්ෂ්යතේ වීර මධූකානාං මහද්වනම් ।
උත්තරේණාස්ය ගංතව්යං න්යග්රෝධමභිගච්ඡතා ॥ 23 ॥
තතඃ ස්ථලමුපාරුහ්ය පර්වතස්යාවිදූරතඃ ।
ඛ්යාතඃ පංචවටීත්යේව නිත්යපුෂ්පිතකානනඃ ॥ 24 ॥
අගස්ත්යේනෛවමුක්තස්තු රාමස්සෞමිත්රිණා සහ ।
සත්කෘත්යාමංත්රයාමාස තමෘෂිං සත්යවාදිනම් ॥ 25 ॥
තෞ තු තේනාභ්යනුජ්ඤාතෞ කෘතපාදාභිවංදනෞ ।
තදාශ්රමාත්පංචවටීං ජග්මතුස්සීතයා සහ ॥ 26 ॥
ගෘහීතචාපෞ තු නරාධිපාත්මජෞ විෂක්තතූණෞ සමරේෂ්වකාතරෞ ।
යථෝපදිෂ්ටේන පථා මහර්ෂිණා ප්රජග්මතුඃ පංචවටීං සමාහිතෞ ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ ත්රයෝදශස්සර්ගඃ ॥
