ශ්රීමද්වාල්මීකීය රාමායණේ සුංදරකාංඩම් ।
අථ ඒකත්රිංශස්සර්ගඃ ।
ඒවං බහුවිධාං චිංතාං චිංතයිත්වා මහාකපිඃ ।
සංශ්රවේ මධුරං වාක්යං වෛදේහ්යා ව්යාජහාර හ ॥ 1 ॥
රාජා දශරථෝ නාම රථකුංජරවාජිමාන් ।
පුණ්යශීලෝ මහාකීර්තිරික්ෂ්වාකූණාං මහායශාඃ ॥ 2 ॥
රාජර්ෂීණාං ගුණශ්රේෂ්ඨස්තපසා චර්ෂිභි ස්සමඃ ।
චක්රවර්තිකුලේ ජාතඃ පුරංදරසමෝ බලේ ॥ 3 ॥
අහිංසාරතිරක්ෂුද්රෝ ඝෘණී සත්යපරාක්රමඃ ।
මුඛ්යශ්චේක්ෂ්වාකුවංශස්ය ලක්ෂ්මීවාන් ලක්ෂ්මිවර්ධනඃ ॥ 4 ॥
පාර්ථිවව්යංජනෛර්යුක්තඃ පෘථුශ්රීඃ පාර්ථිවර්ෂභඃ ।
පෘථිව්යාං චතුරංතායාං විශ්රුතස්සුඛදස්සුඛී ॥ 5 ॥
තස්ය පුත්රඃ ප්රියෝ ජ්යේෂ්ඨස්තාරාධිපනිභානනඃ ।
රාමෝ නාම විශේෂජ්ඤඃ ශ්රේෂ්ඨ ස්සර්වධනුෂ්මතාම් ॥ 6 ॥
රක්ෂිතා ස්වස්ය ධර්මස්ය ස්වජනස්ය ච රක්ෂිතා ।
රක්ෂිතා ජීවලෝකස්ය ධර්මස්ය ච පරංතපඃ ॥ 7 ॥
තස්ය සත්යාභිසංධස්ය වෘද්ධස්ය වචනාත්පිතුඃ ।
සභාර්යස්සහ ච භ්රාත්රා වීරඃ ප්රව්රාජිතෝ වනම් ॥ 8 ॥
තේන තත්ර මහාරණ්යේ මෘගයාං පරිධාවතා ।
රාක්ෂසා නිහතාශ්ශූරා බහවඃ කාමරූපිණඃ ॥ 9 ॥
ජනස්ථානවධං ශ්රුත්වා හතෞ ච ඛරදූෂණෞ ।
තතස්ත්වමර්ෂාපහෘතා ජානකී රාවණේන තු ॥ 10 ॥
වංචයිත්වා වනේ රාමං මෘගරූපේණ මායයා ।
ස මාර්ගමාණස්තාං දේවීං රාමස්සීතාමනිංදිතාම් ॥ 11 ॥
ආසසාද වනේ මිත්රං සුග්රීවං නාම වානරම් ।
තත ස්ස වාලිනං හත්වා රාමඃ පරපුරංජයඃ ॥ 12 ॥
ප්රායච්ඡත්කපිරාජ්යං තත්සුග්රීවාය මහාබලඃ ।
සුග්රීවේණාපි සංදිෂ්ටා හරයඃ කාමරූපිණඃ ॥ 13 ॥
දික්ෂු සර්වාසු තාං දේවීං විචින්වංති සහස්රශඃ ।
අහං සංපාතිවචනාච්ඡතයෝජනමායතම් ॥ 14 ॥
අස්යා හේතෝර්විශාලාක්ෂ්යාඃ සාගරං වේගවාන්ප්ලුතඃ ।
යථාරූපාං යථාවර්ණාං යථාලක්ෂ්මීවතීං ච නිශ්චිතාම් ॥ 15 ॥
අශ්රෞෂං රාඝවස්යාහං සේයමාසාදිතා මයා ।
විරරාමෛවමුක්ත්වාසෞ වාචං වානරපුංගවඃ ॥ 16 ॥
ජානකී චාපි තච්ඡ්රුත්වා පරං විස්මයමාගතා ।
තතස්සා වක්රකේශාංතා සුකේශී කේශසංවෘතම් ॥ 17 ॥
උන්නම්ය වදනං භීරුශ්ශිංශුපාවෘක්ෂමෛක්ෂත ।
නිශම්ය සීතා වචනං කපේශ්ච දිශශ්ච සර්වාඃ ප්රදිශශ්ච වීක්ෂ්ය ।
ස්වයං ප්රහර්ෂං පරමං ජගාම සර්වාත්මනා රාමමනුස්මරංතී ॥ 18 ॥
සා තිර්යගූර්ධ්වං ච තථාප්යධස්තාන්නිරීක්ෂමාණා තමචිංත්යබුද්ධිම් ।
දදර්ශ පිංගාධිපතේරමාත්යං වාතාත්මජං සූර්යමිවෝදයස්ථම් ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකත්රිංශස්සර්ගඃ ॥
