ශ්රීමද්වාල්මීකීය රාමායණේ යුද්ධකාංඩම් ।
අථ තෘතීයස්සර්ගඃ ।
සුග්රීවස්යවචශ්ශ්රුත්වාහේතුමත්පරමාර්ථවත් ।
ප්රතිජග්රාහකාකුත්ස්ථෝහනූමංතමථාබ්රවීත් ॥ 1 ॥
තපසාසේතුබංධේනසාගරෝච්ඡෝෂණේනච ।
සර්වථාසුසමර්ථෝऽස්මිසාගරස්යාස්යලංඝනේ ॥ 2 ॥
කතිදුර්ගාණිදුර්ගායාලංකායාබ්රූහිතානිමේ ।
ජ්ඤාතුමිච්ඡාමිතත්සර්වංදර්ශනාදිවවානර ॥ 3 ॥
බලස්යපරිමාණංචද්වාරදුර්ගක්රියාමපි ।
ගුප්තිකර්මචලංකායාරක්ෂසාංසදනානිච ॥ 4 ॥
යථාසුඛංයථාවච්ඡලංකායාමසිදෘෂ්ටවාන් ।
සර්වමාචක්ෂ්වතත්ත්වේනසර්වථාකුශලෝහ්යසි ॥ 5 ॥
ශ්රුත්වාරාමස්යවචනංහනුමාන්මාරුතාත්මජඃ ।
වාක්යංවාක්යවිදාංශ්රේෂ්ඨෝරාමංපුනරථාබ්රවීත් ॥ 6 ॥
ශ්රූයතාංසර්වමාඛ්යාස්යේදුර්ගකර්මවිධානතඃ ।
ගුප්තාපුරීයථාලංකාරක්ෂිතාචයථාබලෛඃ ॥ 7 ॥
රාක්ෂසාශ්චයථාස්නිග්ධාරාවණස්යචතේජසා ।
පරාංසමෘද්ධිංලංකායාස්සාගරස්යචභීමතාම් ॥ 8 ॥
විභාගංචබලෞඝස්යනිර්දේශංවාහනස්යච ।
ඒවමුක්ත්වාකපිශ්රේෂ්ඨඃකථයාමාසතත්ත්වවිතඃ ॥ 9 ॥
හෘෂ්ටප්රමුදිතාලංකාමත්තද්විපසමාකුලා ।
මහතීරථසංපූර්ණාරක්ෂෝගණසමාකුලා ॥ 10 ॥
දෘඪබද්ධකවාටානිමහාපරිඝවංතිච ।
ද්වාරාණිවිපුලාන්යස්යාශ්චත්වාරිසුමහාංතිච ॥ 11 ॥
තත්රේෂූපලයංත්රාණිබලවංතිමහාංතිච ।
ආගතංපරසෛන්යංතෛස්තත්රප්රතිනිවාර්යතේ ॥ 12 ॥
ද්වාරේෂුසංස්කෘතාභීමාඃකාලායසමයාශ්ශිතාඃ ।
ශතශෝරචිතාවීරෛශ්ශතඝ්නයෝරක්ෂසාංගණෛ ॥ 13 ॥
සෞවර්ණස්තුමහාංස්තස්යාඃප්රාකාරෝදුෂ්ප්රධර්ෂණඃ ।
මණීවිද්රුමවෛදූර්යමුක්තාවිරචිතාංතරඃ ॥ 14 ॥
සර්වතශ්චමහාභීමාශ්ශීතතෝයවහාශ්ශුභාඃ ।
අගාධාග්රාහවත්යශ්චපරිඛාමීනසේවිතා ॥ 15 ॥
ද්වාරේෂුතාසාංචත්වාරස්සංක්රමාඃපරමායතාඃ ।
යංත්රෛරුපේතාබහුභිර්මහද්භිර්ගෘහපංක්තිභිඃ ॥ 16 ॥
ත්රායංතේසංක්රමාස්තත්රපරසෛන්යාගතේසති ।
යංත්රෛස්තෛරවකීර්යංතේපරිඛාසුසමංතතඃ ॥ 17 ॥
ඒකස්ත්වකංප්යෝබලවාන්සංක්රමස්සුමහාදෘඪඃ ।
කාංචනෛ ර්බහුභිස්ස්තංභෛර්වේදිකාභිශ්චශෝභිතඃ ॥ 18 ॥
ස්වයංප්රකෘතිමාපන්නෝයුයුත්සූරාම රාවණඃ ।
උත්ථිතශ්චාප්රමත්තශ්චබලානාමනුදර්ශනේ ॥ 19 ॥
ලංකාපුනර්නිරාලංබාදේවදුර්ගාභයාවහා ।
නාදේයංපාර්වතංවාන්යංකෘත්රිමංචචතුර්විධම් ॥ 20 ॥
ස්ථිතාපාරේසමුද්රස්යදූරපාරස්යරාඝව ।
නෞපථෝපිශ්චනාස්ත්යත්රනිරාදේශශ්චසර්වශඃ ॥ 21 ॥
ශෛලාග්රේරචිතාදුර්ගාසාපුරෛර්දේවපුරෝපමා ।
වාජිවාරණාසංපූර්ණාලංකාපරමදුර්ජයා ॥ 22 ॥
පරිඛාශ්චශතඝ්නයශ්චයංත්රාණිවිවිධානිච ।
ශෝභයංතිපුරීංලංකාංරාවණස්යදුරාත්මනඃ ॥ 23 ॥
අයුතංරක්ෂසාමත්රපූර්වද්වාරංසමාශ්රිතම් ।
ශූලහස්තාදුරාධර්ෂාස්සර්වේඛංගාග්රයෝධිනඃ ॥ 24 ॥
නියුතංරක්ෂසාමත්රදක්ෂිණද්වාරමාශ්රිතම් ।
චතුරංගේණසෛන්යේනයෝධාස්තත්රාප්යනුත්තමාඃ ॥ 25 ॥
ප්රයුතංරක්ෂසාමත්රපශ්චිමද්වාරමාශ්රිතම් ।
චර්මඛංගධරාස්සර්වේතථාසර්වාස්ත්රකෝවිදාඃ ॥ 26 ॥
න්යර්බුදංරක්ෂසාමත්රාප්යුත්තරද්වාරමාශ්රිතම් ।
රථිනශ්චාශ්වවාහාශ්චකුලපුත්ත්රාස්සුපූජිතාඃ ॥ 27 ॥
ශතශෝऽථසහස්රාණිමධ්යමංස්කංධමාශ්රිතාඃ ।
යාතුධානාදුරාධර්ෂාස්සාග්රකෝටිශ්චරක්ෂසාම් ॥ 28 ॥
තේමයාසංක්රමාභග්නාඃපරිඛාශ්චාවපූරිතාඃ ।
දග්ධාචනගරීලංකාප්රාකාරාශ්චාවසාදිතාඃ ॥ 29 ॥
බලෛකදේශඃක්ෂපිතෝරාක්ෂසානාංමහාත්මනාම් ।
යේනකේනතුමාර්ගේණතරාමවරුණාලයම් ।
හතේතිනගරීලංකාවානරෛරවධාර්යතාම් ॥ 30 ॥
අංගදෝද්විවිදෝමෛංදෝජාංබවාන්පනසෝऽනලඃ ।
නීලස්සේනාපතිශ්චේවබලශේෂේණකිංතව ॥ 31 ॥
ප්ලවමානාහිගත්වාතාංරාවණස්යමහාපුරීම් ॥ 32 ॥
සපර්වතවනාංභිත්ත්වාසඛාතාංචසප්රතෝරණාම් ।
සප්රාකාරාංසභවනාමානයිෂ්යංතිරාඝව ॥ 33 ॥
ඒවමාජ්ඤාපයක්ෂිප්රංබලානාංසර්වසංග්රහම් ।
මුහූර්තේනතුයුක්තේනප්රස්ථානමභිරෝචය ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ යුද්ධකාංඩේ තෘතීයස්සර්ගඃ ॥
