ශ්රීමද්වාල්මීකීය රාමායණේ සුංදරකාංඩම් ।
අථ සප්තවිංශස්සර්ගඃ ।
ඉත්යුක්තාස්සීතයා ඝෝරං රාක්ෂස්යඃ ක්රෝධමූර්ඡිතාඃ ।
කාශ්චිජ්ජග්මුස්තදාඛ්යාතුං රාවණස්ය තරස්විනඃ ॥ 1 ॥
තතඃ සීතාමුපාගම්ය රාක්ෂස්යෝ ඝෝරදර්ශනාඃ ।
පුනඃ පරුෂමේකාර්ථමනර්ථාර්ථමථාබ්රුවන් ॥ 2 ॥
අද්යේදානීං තවානාර්යේ සීතේ පාපවිනිශ්චයේ ।
රාක්ෂස්යෝ භක්ෂයිෂ්යංති මාංසමේතද්යථාසුඛම් ॥ 3 ॥
සීතාං තාභිරනාර්යාභිර්දෘෂ්ටවා සංතර්ජිතාං තදා ।
රාක්ෂසී ත්රිජටා වෘද්ධා ශයානා වාක්යමබ්රවීත් ॥ 4 ॥
ආත්මානං ඛාදතානාර්යා න සීතාං භක්ෂයිෂ්යථ ।
ජනකස්ය සුතාමිෂ්ටාං ස්නුෂාං දශරථස්ය ච ॥ 5 ॥
ස්වප්නෝ හ්යද්ය මයා දෘෂ්ටෝ දාරුණෝ රෝමහර්ෂණඃ ।
රාක්ෂසානාමභාවාය භර්තුරස්යා භවාය ච ॥ 6 ॥
ඒවමුක්තාස්ත්රිජටයා රාක්ෂස්යඃ ක්රෝධමූර්ඡිතාඃ ।
සර්වා ඒවාබ්රුවන්භීතාස්ත්රිජටාං තාමිදං වචඃ ॥ 7 ॥
කථයස්ව ත්වයා දෘෂ්ටඃ ස්වප්නෝऽයං කීදෘශෝ නිශි ।
තාසාං ශ්රුත්වා තු වචනං රාක්ෂසීනාං මුඛාච්යුතම් ॥ 8 ॥
උවච වචනං කාලේ ත්රිජටා ස්වප්නසංශ්රිතම් ।
ගජදංතමයීං දිව්යාං ශිබිකාමංතරික්ෂගාම් ॥ 9 ॥
යුක්තාං හංසසහස්රේණ ස්වයමාස්ථාය රාඝවඃ ।
ශුක්ලමාල්යාංබරධරෝ ලක්ෂ්මණේන සහාගතඃ ॥ 10 ॥
ස්වප්නේ චාද්ය මයා දෘෂ්ටා සීතා ශුක්ලාංබරාවෘතා ।
සාගරේණ පරික්ෂිප්තං ශ්වේතං පර්වතමාස්ථිතා ॥ 11 ॥
රාමේණ සංගතා සීතා භාස්කරේණ ප්රභා යථා ।
රාඝවශ්ච මයා දෘෂ්ටශ්චතුර්දෂ්ට්රං මහාගජම් ॥ 12 ॥
ආරූඪ ශ්ශෛලසංකාශං චචාර සහලක්ෂ්මණඃ ।
තතස්තෞ නරශාර්දූලෞ දීප්යමානෞ ස්වතේජසා ॥ 13 ॥
ශුක්ලමාල්යාංබරධරෞ ජානකීං පර්යුපස්ථිතෞ ।
තතස්තස්ය නගස්යාග්රේ හ්යාකාශස්ථස්ය දංතිනඃ ॥ 14 ॥
භර්ත්රා පරිගෘහීතස්ය ජානකී ස්කංධමාශ්රිතා ।
භර්තුරංකාත්සමුත්පත්ය තතඃ කමලලෝචනා ॥ 15 ॥
චංද්රසූර්යෞ මයා දෘෂ්ටා පාණිනා පරිමාර්ජතී ।
තතස්තාභ්යාං කුමාරාභ්යාමාස්ථිතඃ ස ගජෝත්තමඃ ॥ 16 ॥
සීතයා ච විශාලාක්ෂ්යා ලංකායා උපරිස්ථිතඃ ।
පාංඩුරර්ෂභයුක්තේන රථේනාෂ්ටයුජා ස්වයම් ॥ 17 ॥
ඉහෝපයාතඃ කාකුත්ස්ථ ස්සීතයා සහ භාර්යයා ।
ලක්ෂ්මණේන සහ භ්රාත්රා සීතයා සහ වීර්යවාන් ॥ 18 ॥
ආරුහ්ය පුෂ්පකං දිව්යං විමානං සූර්යසන්නිභම් ।
උත්තරාං දිශමාලෝක්ය ජගාම පුරුෂෝත්තමඃ ॥ 19 ॥
ඒවං ස්වප්නේ මයා දෘෂ්ටෝ රාමෝ විෂ්ණුපරාක්රමඃ ।
ලක්ෂ්මණේන සහ භ්රාත්රා සීතයා සහ රාඝවඃ ॥ 20 ॥
න හි රාමෝ මහාතේජාශ්ශක්යෝ ජේතුං සුරාසුරෛඃ ।
රාක්ෂසෛර්වාපි චාන්යෛර්වා ස්වර්ගඃ පාපජනෛරිව ॥ 21 ॥
රාවණශ්ච මයා දෘෂ්ටඃ ක්ෂිතෞ තෛලසමුක්ෂිතඃ ।
රක්තවාසාඃ පිබන්මත්තඃ කරවීරකෘතස්රජඃ ॥ 22 ॥
විමානාත්පුෂ්පකාදද්ය රාවණඃ පතිතෝ භුවි ।
කෘෂ්යමාණඃ ස්ත්රියා දෘෂ්ටෝ මුංඩඃ කෘෂ්ණාංබරඃ පුනඃ ॥ 23 ॥
රථේන ඛරයුක්තේන රක්තමාල්යානුලේපනඃ ।
පිපංස්තෛලං හසන්නෘත්යන් භ්රාංතචිත්තාකුලේංද්රියඃ ॥ 24 ॥
ගර්දභේන යයෞ ශීඝ්රං දක්ෂිණාං දිශමාස්ථිතඃ ।
පුනරේව මයා දෘෂ්ටෝ රාවණෝ රාක්ෂසේශ්වරඃ ॥ 25 ॥
පතිතෝऽ වාක්චිරා රා භූමෞ ගර්දභාද්භයමෝහිතඃ ।
සහසෝත්ථාය සංභ්රාංතෝ භයාර්තෝ මදවිහ්වලඃ ॥ 26 ॥
උන්මත්ත ඉව දිග්වාසා දුර්වාක්යං ප්රලපන්බහු ।
දුර්ගංධං දුස්සහං ඝෝරං තිමිරං නරකෝපමම් ॥ 27 ॥
මලපංකං ප්රවිශ්යාශු මග්නස්තත්ර ස රාවණඃ ।
කංඨේ බද්ධ්වා දශග්රීවං ප්රමදා රක්තවාසිනී ॥ 28 ॥
කාලී කර්දමලිප්තාංගී දිශං යාම්යාං ප්රකර්ෂති ।
ඒවං තත්ර මයා දෘෂ්ටඃ කුංභකර්ණෝ නිශාචරඃ ॥ 29 ॥
රාවණස්ය සුතාස්සර්වේ දෘෂ්ටාස්තෛලසමුක්ෂිතාඃ ।
වරාහේණ දශග්රීවශ්ශිංශුමාරේණ චේංද්රජිත් ॥ 30 ॥
උෂ්ට්රේණ කුංභකර්ණශ්ච ප්රයාතා දක්ෂිණාං දිශම් ।
ඒකස්තත්ර මයා දෘෂ්ටඃ ශ්වේතච්ඡත්රෝ විභීෂණඃ ॥ 31 ॥
ශුක්ලමාල්යාංබරධරඃ ශුක්ලගංධානුලේපනඃ ।
ශංඛදුංධුභිනිර්ඝෝෂෛර්නෘත්තගීතෛරලංකෘතඃ ॥ 32 ॥
ආරුහ්ය ශෛලසංකාශං මේඝස්තනිතනිස්ස්වනම් ।
චතුර්දංතං ගජං දිව්යමාස්තේ තත්ර විභීෂණඃ ॥ 33 ॥
චතුර්භිස්සචිවෛඃ සාර්ථං වෛහායසමුපස්ථිතඃ ।
සමාජශ්ච මයා දෘෂ්ටෝ ගීතවාදිත්රනිඃස්වනඃ ॥ 34 ॥
පිබතාං රක්තමාල්යානාං රක්ෂසාං රක්තවාසසාම් ।
ලංකා චේයං පුරී රම්යා සවාජිරථකුංජරාඃ ॥ 35 ॥
සාගරේ පතිතා දෘෂ්ටා භග්නගෝපුරතෝරණා ।
ලංකා දෘෂ්ටා මයා ස්වප්නේ රාවණේනාභිරක්ෂිතා ॥ 36 ॥
දග්ධා රාමස්ය දූතේන වානරේණ තරස්විනා ।
පීත්වා තෛලං ප්රනෘත්තාශ්ච ප්රහසංත්යෝ මහාස්වනාඃ ॥ 37 ॥
ලංකායාං භස්මරූක්ෂායාං සර්වා රාක්ෂසස්ත්රියඃ ।
කුංභකර්ණාදයශ්චේමේ සර්වේ රාක්ෂසපුංගවාඃ ॥ 38 ॥
රක්තං නිවසනං ගෘහ්ය ප්රවිෂ්ටා ගෝමයහ්රදේ ।
අපගච්ඡත නශ්යධ්වං සීතාමාප්නෝති රාඝවඃ ॥ 39 ॥
ඝාතයේත්පරමාමර්ෂී යුෂ්මාන්සාර්ථං හි රාක්ෂසෛඃ ।
ප්රියාං බහුමතාං භාර්යාං වනවාසමනුව්රතාම් ॥ 40 ॥
භර්ත්සිතාං තර්ජිතාං වාපි නානුමංස්යති රාඝවඃ ।
තදලං ක්රූරවාක්යෛශ්ච සාංත්වමේවාභිධීයතාම් ॥ 41 ॥
අභියාචාම වෛදේහීමේතද්ධි මම රෝචතේ ।
යස්යාමේවංවිධඃ ස්වප්නෝ දුඃඛිතායාං ප්රදෘශ්යතේ ॥ 42 ॥
සා දුඃඛෛර්විවිධෛර්මුක්තා ප්රියං ප්රාප්නෝත්යනුත්තමම් ।
භර්ත්සිතාමපි යාචධ්වං රාක්ෂස්යඃ කිං විවක්ෂයා ॥ 43 ॥
රාඝවාද්ධි භයං ඝෝරං රාක්ෂසානාමුපස්ථිතම් ।
ප්රණිපාතප්රසන්නා හි මෛථිලී ජනකාත්මජා ॥ 44 ॥
අලමේෂා පරිත්රාතුං රාක්ෂස්යෝ මහතෝ භයාත් ।
අපි චාස්යා විශාලාක්ෂ්යා න කිංචිදුපලක්ෂයේ ॥ 45 ॥
විරූපමපි චාංගේෂු සුසූක්ෂ්මමපි ලක්ෂණම් ।
ඡායාවෛගුණ්යමාත්රං තු ශංකේ දුඃඛමුපස්ථිතම් ॥ 46 ॥
අදුඃඛාර්හාමිමාං දේවීං වෛහායසමුපස්ථිතාම් ।
අර්ථසිද්ධිං තු වෛදේහ්යාඃ පශ්යාම්යහමුපස්ථිතාම් ॥ 47 ॥
රාක්ෂසේංද්රවිනාශං ච විජයං රාඝවස්ය ච ।
නිමිත්තභූතමේතත්තු ශ්රෝතුමස්යා මහත්ප්රියම් ॥ 48 ॥
දෘශ්යතේ ච ස්ඵුරච්චක්ෂුඃ පද්මපත්රමිවායතම් ।
ඊෂච්ඡ හෘෂිතෝ වාස්යා දක්ෂිණායා හ්යදක්ෂිණඃ ॥ 49 ॥
අකස්මාදේව වෛදේහ්යා බාහුරේකඃ ප්රකංපතේ ।
කරේණුහස්තප්රතිම ස්සව්යශ්චෝරුරනුත්තමඃ ॥ 50 ॥
වේපමානඃ සූචයති රාඝවං පුරතඃ ස්ථිතම් ।
පක්ෂී ච ශාඛානිලයං ප්රවිෂ්ටඃ පුනඃ පුනශ්චෝත්තමසාංත්වවාදී ।
සුස්වාගතාං වාචමුදීරයානඃ පුනඃ පුනශ්චෝදයතීව හෘෂ්ටඃ ॥ 51 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ සප්තවිංශස්සර්ගඃ ॥
