ශ්රීමද්වාල්මීකීය රාමායණේ අයෝධ්යාකාංඩම් ।
අථ අෂ්ටාධිකශතතමස්සර්ගඃ ।
ආශ්වාසයංතං භරතං ජාබාලිර්බ්රාහ්මණෝත්තමඃ ।
උවාච රාමං ධර්මජ්ඤං ධර්මාපේතමිදං වචඃ ॥ 1 ॥
සාධු රාඝව මාऽභූත්තේ බුධ්දිරේවං නිරර්ථිකා ।
ප්රාකෘතස්ය නරස්යේව හ්යාර්යබුද්ධේර්මනස්විනඃ ॥ 2 ॥
කඃ කස්ය පුරුෂෝ බංධුඃ කිමාප්යං කස්ය කේනචිත් ।
යදේකෝ ජායතේ ජංතුරේක ඒව විනශ්යති ॥ 3 ॥
තස්මාන්මාතා පිතා චේති රාම සජ්ජේත යෝ නරඃ ।
උන්මත්ත ඉව ස ජ්ඤේයෝ නාස්ති කශ්චිද්ධි කස්යචිත් ॥ 4 ॥
යථා ග්රාමාංතරං ගච්ඡන්නරඃ කශ්චිත්ක්වචිද්වසේත් ।
උත්සෘජ්ය ච තමාවාසං ප්රතිෂ්ඨේතාපරේऽහනි ॥ 5 ॥
ඒවමේව මනුෂ්යාණාං පිතා මාතා ගෘහං වසු ।
අවාසමාත්රං කාකුත්ස්ථ සජ්ජංතේ නාත්ර සජ්ජනාඃ ॥ 6 ॥
පිත්ර්යං රාජ්යං පරිත්යජ්ය ස නාර්හසි නරෝත්තම ।
ආස්ථාතුං කාපථං දුඃඛං විෂමං බහුකංටකම් ॥ 7 ॥
සමෘද්ධායාමයෝධ්යායාමාත්මානමභිෂේචය ।
ඒකවේණීධරා හි ත්වාං නගරී සංප්රතීක්ෂතේ ॥ 8 ॥
රාජභෝගානනුභවන්මහාර්හාන්පාර්ථිවාත්මජ ।
විහර ත්වමයෝධ්යායාං යථා ශක්රස්ත්රිවිෂ්ටපේ ॥ 9 ॥
න තේ කශ්චිද්ධශරථ ස්ත්වං ච තස්ය න කශ්චන ।
අන්යෝ රාජා ත්වමන්ය ස්තස්මාත්කුරු යදුච්යතේ ॥ 10 ॥
බීජමාත්රං පිතා ජංතෝ ශ්ශුක්ලං රුධිරමේව ච ।
සංයුක්තමෘතුමන්මාත්රා පුරුෂස්යේහ ජන්ම තත් ॥ 11 ॥
ගත ස්ස නෘපතිස්තත්ර ගංතව්යං යත්ර තේන වෛ ।
ප්රවෘතතිරේෂා මර්ත්යානාං ත්වං තු මිථ්යා විහන්යසේ ॥ 12 ॥
අර්ථධර්මපරා යේ යේ තාංස්තාංඡෝචාමි නේතරාන් ।
තේ හි දුඃඛමිහ ප්රාප්ය විනාශං ප්රේත්ය භේජිරේ ॥ 13 ॥
අෂ්ටකා පිතෘදෛවත්යමිත්යයං ප්රසෘතෝ ජනඃ ।
අන්නස්යෝපද්රවං පශ්ය මෘතෝ හි කිමශිෂ්යති ॥ 14 ॥
යදි භුක්තමිහාන්යේන දේහමන්යස්ය ගච්ඡති ।
දද්යාත්ප්රවසත ශ්ශ්රාද්ධං න තත්පථ්යශනං භවේත් ॥ 15 ॥
දානසංවනනා හ්යේතේ ග්රංථා මේධාවිභිඃ කෘතාඃ ।
යජස්ව දේහි දීක්ෂස්ව තපස්තප්යස්ව සංත්යජ ॥ 16 ॥
ස නාස්ති පරමිත්යේව කුරු බුද්ධිං මහාමතේ ।
ප්රත්යක්ෂං යත්තදාතිෂ්ඨ පරෝක්ෂං පෘෂ්ඨතඃ කුරු ॥ 17 ॥
සතාං බුද්ධිං පුරස්කෘත්ය සර්වලෝකනිදර්ශිනීම් ।
රාජ්යං ත්වං ප්රතිගෘහ්ණීෂ්ව භරතේන ප්රසාදිතඃ ॥ 18 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ අෂ්ටාධිකශතතමස්සර්ගඃ ॥
