ශ්රීමද්වාල්මීකීය රාමායණේ කිෂ්කිංධාකාංඩම් ।
අථ සප්තමස්සර්ගඃ ।
ඒවමුක්තස්තු සුග්රීවෝ රාමේණාර්තේන වානරඃ ।
අබ්රවීත්ප්රාංජලිර්වාක්යං සබාෂ්පං බාෂ්පගද්ගදඃ ॥ 1 ॥
න ජානේ නිලයං තස්ය සර්වථා පාපරක්ෂසඃ ।
සාමර්ථ්යං වික්රමං වාපි දෞෂ්කුලේයස්ය වා කුලම් ॥ 2 ॥
සත්යං තේ ප්රතිජානාමි ත්යජ ශෝකමරිංදම ।
කරිෂ්යාමි තථා යත්නං යථා ප්රාප්ස්යසි මෛථිලීම් ॥ 3 ॥
රාවණං සගණං හත්වා පරිතෝෂ්යාත්මපෞරුෂම් ।
තථාऽස්මි කර්තා න චිරාද්යථා ප්රීතෝ භවිෂ්යසි ॥ 4 ॥
අලං වෛක්ලබ්යමාලංබ්ය ධෛර්යමාත්මගතං ස්මර ।
ත්වද්විධානාං න සදෘශමීදෘශං බුද්ධිලාඝවම් ॥ 5 ॥
මයාऽපි ව්යසනං ප්රාප්තං භාර්යාවිරහජං මහත් ।
නාහමේවං හි ශෝචාමි න ච ධෛර්යං පරිත්යජේ ॥ 6 ॥
නාහං තාමනුශෝචාමි ප්රාකෘතෝ වානරෝऽපි සන් ।
මහාත්මා ච විනීතශ්ච කිං පුනර්ධෘතිමාන්භවාන් ॥ 7 ॥
බාෂ්පමාපතිතං ධෛර්යාන්නිග්රහීතුං ත්වමර්හසි ।
මර්යාදාං සත්ත්වයුක්තානාං ධෘතිං නෝත්ස්රෂ්ටුමර්හසි ॥ 8 ॥
ව්යසනේ වාऽර්ථකෘච්ඡ්රේ වා භයේ වා ජීවිතාංතකේ ।
විමෘශන්වෛ ස්වයා බුද්ධ්යා ධෘතිමාන්නාවසීදති ॥ 9 ॥
බාලිශස්තු නරෝ නිත්යං වෛක්ලබ්යං යෝऽනුවර්තතේ ।
ස මජ්ජත්යවශශ්ශෝකේ භාරාක්රාංතේව නෞර්ජලේ ॥ 10 ॥
ඒෂෝऽංජලිර්මයා බද්ධඃ ප්රණයාත්ත්වාං ප්රසාදයේ ।
පෞරුෂං ශ්රය ශෝකස්ය නාංතරං දාතුමර්හසි ॥ 11 ॥
යේ ශෝකමනුවර්තංතේ න තේෂාං විද්යතේ සුඛම් ।
තේජශ්ච ක්ෂීයතේ තේෂාං න ත්වං ශෝචිතුමර්හසි ॥ 12 ॥
ශෝකේනාභිප්රපන්නස්ය ජීවිතේ චාපි සංශයඃ ।
ස ශෝකං ත්යජ රාජේංද්ර ධෛර්යමාශ්රය කේවලම් ॥ 13 ॥
හිතං වයස්යභාවේන බ්රූමි නෝපදිශාමි තේ ।
වයස්යතාං පූජයන්මේ න ත්වං ශෝචිතුමර්හසි ॥ 14 ॥
මධුරං සාංත්විත ස්තේන සුග්රීවේණ ස රාඝවඃ ।
මුඛමශ්රුපරික්ලින්නං වස්ත්රාංතේන ප්රමාර්ජයත් ॥ 15 ॥
ප්රකෘතිස්ථස්තු කාකුත්ස්ථස්සුග්රීවවචනාත්ප්රභුඃ ।
සංපරිෂ්වජ්ය සුග්රීවමිදං වචනමබ්රවීත් ॥ 16 ॥
කර්තව්යං යද්වයස්යේන ස්නිග්ධේන ච හිතේන ච ।
අනුරූපං ච යුක්තං ච කෘතං සුග්රීව තත්ත්වයා ॥ 17 ॥
ඒෂ ච ප්රකෘතිස්ථෝऽහමනුනීතස්ත්වයා සඛේ ।
දුර්ලභෝ හීදෘශෝ බංධුරස්මින්කාලේ විශේෂතඃ ॥ 18 ॥
කිං තු යත්නස්ත්වයා කාර්යෝ මෛථිල්යාඃ පරිමාර්ගණේ ।
රාක්ෂසස්ය ච රෞද්රස්ය රාවණස්ය දුරාත්මනඃ ॥ 19 ॥
මයා ච යදනුෂ්ඨේයං විස්රබ්ධේන තදුච්යතාම් ।
වර්ෂාස්විව ච සුක්ෂේත්රේ සර්වං සංපද්යතේ තව ॥ 20 ॥
මයා ච යදිදං වාක්යමභිමානාත්සමීරිතම් ।
තත්ත්වයා හරිශාර්දූල තත්ත්වමිත්යුපධාර්යතාම් ॥ 21 ॥
අනෘතං නෝක්තපූර්වං මේ න ච වක්ෂ්යේ කදාචන ।
ඒතත්තේ ප්රතිජානාමි සත්යේනෛව ච තේ ශපාම්යහමම් ॥ 22 ॥
තතඃ ප්රහෘෂ්ටස්සුග්රීවෝ වානරෛස්සචිවෛස්සහ ।
රාඝවස්ය වචශ්ශ්රුත්වා ප්රතිජ්ඤාතං විශේෂතඃ ॥ 23 ॥
ඒවමේකාංතසංපෘක්තෞ තතස්තෞ නරවානරෞ ।
උභාවන්යෝන්යසදෘශං සුඛං දුඃඛමභාෂතාම් ॥ 24 ॥
මහානුභාවස්ය වචෝ නිශම්ය හරිර්නෘපාණාමෘෂභස්ය තස්ය ।
කෘතං ස මේනේ හරිවීරමුඛ්ය ස්තදා ස්වකාර්යං හෘදයේන විද්වාන් ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ සප්තමස්සර්ගඃ ॥
