ශ්රීමද්වාල්මීකීය රාමායණේ අරණ්යකාංඩම් ।
අථ චතුර්ථස්සර්ගඃ ।
හ්රියමාණෞ තු තෞ දෘෂ්ට්වා වෛදේහී රාමලක්ෂ්මණෞ ।
උච්චෛස්ස්වරේණ චුක්රෝශ ප්රගෘහ්ය සුමහාජාභුජෞ ॥ 1 ॥
ඒෂ දාශරථී රාමඃ සත්යවාන් ශීලවාන් ශුචිඃ ।
රක්ෂසා රෞද්රරූපේණ හ්රියතේ සහලක්ෂ්මණඃ ॥ 2 ॥
මාමෘකා භක්ෂයිෂ්යංති ශාර්දූලාද්වීපිනස්තථා ।
මාං හරෝත්සෘජ කාකුත්ස්ථෞ නමස්තේ රාක්ෂසෝත්තම ॥ 3 ॥
තස්යාස්තද්වචනං ශ්රුත්වා වෛදේහ්යා රාමලක්ෂ්මණෞ ।
වේගං ප්රචක්රතුර්වීරෞ වධේ තස්ය දුරාත්මනඃ ॥ 4 ॥
තස්ය රෞද්රස්ය සෞමිත්රිඃ සව්යං බාහුං බභංජ හ ।
රාමස්තු දක්ෂිණං බාහුං තරසා තස්ය රක්ෂසඃ ॥ 5 ॥
ස භග්නබාහුස්සවිග්නෝ නිපපාතාශු රාක්ෂසඃ ।
ධරණ්යාං මේඝසංකාශෝ වජ්රභින්න ඉවාචලඃ ॥ 6 ॥
මුෂ්ටිභිර්ජානුභිඃ පද්භිඃ සූදයංතෞ තු රාක්ෂසම් ।
උද්යම්යෝද්යම්ය චාප්යේනං ස්ථංඩිලේ නිෂ්පිපේෂතුඃ ॥ 7 ॥
ස විද්ධෝ බහුභිර්බාණෛඃ ඛංගාභ්යාං ච පරික්ෂතඃ ।
නිෂ්පිෂ්ටෝ බහුධා භූමෞ න මමාර ස රාක්ෂසඃ ॥ 8 ॥
තං ප්රේක්ෂ්ය රාමඃ සුභෘශමවධ්යමචලෝපමම් ।
භයේෂ්වභයදශ්ශ්රීමානිදං වචනමබ්රවීත් ॥ 9 ॥
තපසා පුරුෂව්යාඝ්ර රාක්ෂසෝऽයං න ශක්යතේ ।
ශස්ත්රේණ යුධි නිර්ජේතුං රාක්ෂසං නිඛනාවහේ ॥ 10 ॥
කුංජරස්යේව රෞද්රස්ය රාක්ෂසස්යාස්ය ලක්ෂ්මණ ।
වනේऽස්මින් සුමහච්ඡ්වභ්රං ඛන්යතාං රෞද්රවර්චසඃ ॥ 11 ॥
ඉත්යුක්ත්වා ලක්ෂ්මණං රාමඃ ප්රදරඃ ඛන්යතාමිති ।
තස්ථෞ විරාධමාක්රම්ය කංඨේ පාදේන වීර්යවාන් ॥ 12 ॥
තච්ඡ්රුත්වා රාඝවේණෝක්තං රාක්ෂසඃ ප්රශ්රිතං වචඃ ।
ඉදං ප්රෝවාච කාකුත්ථ්සං විරාධඃ පුරුෂර්ෂභම් ॥ 13 ॥
හතෝऽස්මි පුරුෂව්යාඝ්ර ශක්රතුල්යබලේන වෛ ।
මයා තු පූර්වං ත්වං මෝහාන්න ජ්ඤාතඃ පුරුෂර්ෂභ ॥ 14 ॥
කෞසල්යාසුප්රජා රාම තාතස්ත්වං විදිතෝ මයා ।
වෛදේහී ච මහාභාගා ලක්ෂ්මණශ්ච මහායශාඃ ॥ 15 ॥
අභිශාපාදහං ඝෝරාං ප්රවිෂ්ටෝ රාක්ෂසීං තනුම් ।
තුංබුරුර්නාම ගංධර්වඃ ශප්තෝ වෛශ්රවණේන හ ॥ 16 ॥
ප්රසාද්යමානශ්ච මයා සෝऽබ්රවීන්මාං මහායශාඃ ।
යදා දාශරථී රාමස්ත්වාං වධිෂ්යති සංයුගේ ।
තදා ප්රකෘතිමාපන්නෝ භවාන්ස්වර්ගං ගමිෂ්යති ॥ 17 ॥
අනුපස්ථීයමානෝ මාං ස ක්රුද්ධෝ ව්යාජහාර හ ।
ඉති වෛශ්රවණෝ රාජා රංභාසක්තමුවාච හ ॥ 18 ॥
තව ප්රසාදාන්මුක්තෝऽහමිහශාපාත්සුදාරුණාත් ।
භුවනං ස්වං ගමිෂ්යාමි ස්වස්ති වෝऽස්තු පරංතප ॥ 19 ॥
ඉතෝ වසති ධර්මාත්මා ශරභංගඃ ප්රතාපවාන් ॥ 20 ॥
අධ්යර්ධයෝජනේ තාත මහර්ෂිස්සූර්යසන්නිභඃ ।
තං ක්ෂිප්රමධිගච්ඡ ත්වං ස තේ ශ්රේයෝऽභිධාස්යති ॥ 21 ॥
අවටේ චාපි මාං රාම ප්රක්ෂිප්ය කුශලී ව්රජ ।
රක්ෂසාං ගතසත්ත්වානාමේෂ ධර්මස්සසනාතනඃ ।
අවටේ යේ නිධීයංතේ තේෂාං ලෝකාස්සනාතනාඃ ॥ 22 ॥
ඒවමුක්ත්වා තු කාකුත්ථ්සං විරාධශ්ශරපීඩිතඃ ।
බභූව ස්වර්ගසංප්රාප්තෝ න්යස්තදේහෝ මහාබලඃ ॥ 23 ॥
තච්ඡ්රුත්වා රාඝවෝ වාක්යං ලක්ෂ්මණං ව්යාදිදේශ හ ।
කුංජරස්යේව රෞද්රස්ය රාක්ෂසස්යාස්ය ලක්ෂ්මණ ॥ 24 ॥
වනේऽස්මින් සුමහච්ඡ්වභ්රං ඛන්යතාං රෞදකර්මණඃ ।
ඉත්යුක්ත්වා ලක්ෂ්මණං රාමඃ ප්රදරඃ ඛන්යතාමිති ।
තස්ථෞ විරාධමාක්රම්ය කංඨේ පාදේන වීර්යවාන් ॥ 25 ॥
තතඃ ඛනිත්රමාදාය ලක්ෂ්මණශ්ශ්වභ්රමුත්තමම් ।
අඛනත්පාර්ශ්වතස්තස්ය විරාධස්ය මහාත්මනඃ ॥ 26 ॥
තං මුක්තකංඨංනික්ෂිප්ය ශංකුකර්ණං මහාස්වනම් ।
විරාධං ප්රාක්ෂිපච්ඡ්වභ්රේ නදංතං භෛරවස්වනම් ॥ 27 ॥
තමාහවේ දාරුණමාශුවික්රමෞ ස්ථිරාවුභෞ සංයති රාමලක්ෂ්මණෞ ।
මුදාන්විතෞ චික්ෂිපතුර්භයාවහං නදංතමුත්ක්ෂිප්ය බිලේ තු රාක්ෂසම් ॥ 28 ॥
අවධ්යතාං ප්රේක්ෂ්ය මහාසුරස්ය තෞ ශිතේන ශස්ත්රේණ තදා නරර්ෂභෞ ।
සමර්ථ්ය චාත්යර්ථවිශාරදාවුභෞ බිලේ විරාධස්ය වධං ප්රචක්රතුඃ ॥ 29 ॥
ස්වයං විරාධේන හි මෘත්යුරාත්මනඃ ප්රසහ්ය රාමේණ යථාර්ථමීප්සිතඃ ।
නිවේදිතඃ කානනචාරිණා ස්වයං න මේ වධඃ ශස්ත්රකෘතෝ භවේදිති ॥ 30 ॥
තදේව රාමේණ නිශම්ය භාෂිතං කෘතා මතිස්තස්ය බිලප්රවේශනේ ।
බිලං ච රාමේණාතිබලේන රක්ෂසා ප්රවේශ්යමානේන වනං විනාදිතම් ॥ 31 ॥
ප්රහෘෂ්ටරූපාවිව රාමලක්ෂ්මණෞ විරාධමුර්ව්යා ප්රදරේ නිහත්ය තෞ ।
නනංදතුර්වීතභයෞ මහාවනේ ශිලාභිරංතර්දධතුශ්ච රාක්ෂසම් ॥ 32 ॥
තතස්තු තෞ කාංචනචිත්රකාර්මුකෞ නිහත්ය රක්ෂඃ පරිගෘහ්ය මෛථිලීම් ।
විජහ්රතු ස්තෞ මුදිතෞ මහාවනේ දිවි ස්ථිතෞ චංද්රදිවාකරාවිව ॥ 33 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ චතුර්ථස්සර්ගඃ ॥
