ශ්රීමද්වාල්මීකීය රාමායණේ අරණ්යකාංඩම් ।
අථ පංචවිංශස්සර්ගඃ ।
අවෂ්ටබ්ධධනුං රාමං ක්රුද්ධං ච රිපුඝාතිනම් ।
දදර්ශාऽශ්රමමාගම්ය ඛරස්සහ පුරස්සරෛඃ ॥ 1 ॥
තං දෘෂ්ට්වා සශරං චාපමුද්යම්ය ඛරනිස්ස්වනම් ।
රාමස්යාභිමුඛං සූතං චෝද්යතාමිත්යචෝදයත් ॥ 2 ॥
ස ඛරස්යාජ්ඤයා සූතස්තුරගාන් සමචෝදයත් ।
යත්ර රාමෝ මහාබාහුරේකෝ චුන්වන්ස්ථිතෝ ධනුඃ ॥ 3 ॥
තං තු නිෂ්පතිතං දෘෂ්ට්වා සර්වේ තේ රජනීචරාඃ ।
නර්දමානා මහානාදං සචිවාඃ පර්යවාරයන් ॥ 4 ॥
ස තේෂාං යාතුධානානාං මධ්යේ රථගතඃ ඛරඃ ।
බභූව මධ්යේ තාරාණාං ලෝහිතාංග ඉවෝදිතඃ ॥ 5 ॥
තතශ්ශරසහස්රේණ රාමමප්රතිමෞජසම් ।
අර්දයිත්වා මහානාදං නනාද සමරේ ඛරඃ ॥ 6 ॥
තතස්තං භීමධන්වානං ක්රුද්ධාඃ සර්වේ නිශාචරාඃ ।
රාමං නානාවිධෛඃ ශස්ස්රෛරභ්යවර්ෂංත දුර්ජයම් ॥ 7 ॥
මුද්ගරෛඃ පට්ටසෛශ්ශූලෛඃ ප්රාසෛඃ ඛංගෛ පරශ්වථෛඃ ।
රාක්ෂසාස්සමරේ රාමං නිජඝ්නූ රෝෂතත්පරාඃ ॥ 8 ॥
තේ වලාහසංකාශා මහානාදා මහෞජසඃ ।
අභ්යධාවංත කාකුත්ස්ථං රථෛර්වාජිභිරේව ච ॥ 9 ॥
ගජෛඃ පර්වතකූටාභෛ රාමං යුද්ධේ ජිඝාංසවඃ ।
තේ රාමේ ශරවර්ෂාණි ව්යසෘජන් රක්ෂසාං ගණාඃ ॥ 10 ॥
ශෛලේංද්රමිව ධාරාභිර්වර්ෂමාණා වලාහකාඃ ।
ස තෛඃ පරිවෘතෝ ඝෝරෛඃ රාඝවෝ රක්ෂසාං ගණෛඃ ॥ 11 ॥
තිථිෂ්වි මහාදේවෝ වෘත පරිෂදාංගණෛ තානි මුක්තානි ශස්ත්රාණි යාතුධානෛස්සරාඝවඃ ।
ප්රතිජග්රාහ විශිඛෛර්නද්යෝඝානිව සාගරඃ ॥ 12 ॥
ස තෛඃ ප්රහරණෛර්ඝෝරෛර්භින්නගාත්රෝ න විව්යථේ ।
රාමඃ ප්රදීප්තෛර්බහුභිර්වජ්රෛරිව මහාචලඃ ॥ 13 ॥
ස විද්ධඃ ක්ෂතජාදිග්ධඃ සර්වගාත්රේෂු රාඝවඃ ।
බභූව රාමඃ සංධ්යාභ්රෛර්දිවාකර ඉවාවෘතඃ ॥ 14 ॥
විෂේදුර්දේවගංධර්වාස්සිද්ධාශ්ච පරමර්ෂයඃ ।
ඒකං සහස්රෛර්භහුභිස්තදා දෘෂ්ට්වා සමාවෘතම් ॥ 15 ॥
තතෝ රාමස්සුසංකෘද්ධෝ මංඩලීකෘතකාර්මුකඃ ।
සසර්ජ විශිඛාන්බාණාංඡතශෝऽථ සහස්රශ ॥ 16 ॥
දුරාවාරාංදුර්විෂහාන්කාලදංඩෝපමාන් රණේ ।
මුමෝච ලීලයා රාමඃ කංකපත්රානජිහ්මගාන් ॥ 17 ॥
තේ ශරාශ්ශත්රුසෛන්යේෂු මුක්තා රාමේණ ලීලයා ।
අදදූ රක්ෂසාං ප්රාණාන්පාශාඃ කාලකෘතා ඉව ॥ 18 ॥
භිත්ත්වා රාක්ෂසදේහාං ස්තාංස්තේ ශරා රුධිරාප්ලුතාඃ ।
අංතරික්ෂගතා රේජුර්දීප්තාග්නිසමතේජසඃ ॥ 19 ॥
අසංඛ්යේයාස්තු රාමස්ය සායකාශ්චාපමංඩලාත් ।
විනිෂ්පේතුරතීවෝග්රා රක්ෂඃප්රාණාපහාරිණඃ ॥ 20 ॥
තෛර්ධනූංෂි ධ්වජාග්රාණි වර්මාණි ච ශිරාංසි ච ।
බාහූන්සහස්තාභරණානූරූන්කරිකරෝපමාන් ॥ 21 ॥
චිච්ඡේද රාමස්සමරේ ශතශෝऽථ සහස්රශඃ ।
හයාන්කාංචනසන්නාහාන්රථයුක්තාන්සසාරථීන් ॥ 22 ॥
ගජාංශ්ච සගජාරෝහාන්සහයාන්සාදිනස්තථා ।
පදාතීන්සමරේ හත්වා හ්යනයද්යමසාදනම් ॥ 23 ॥
තතෝ නාලීකනාරාචෛස්තීක්ෂ්ණාග්රෛශ්ච විකර්ණිභිඃ ।
භීමමාර්තස්වරං චක්රුර්භිද්යමානා නිශාචරාඃ ॥ 24 ॥
තත්සෛන්යං නිශිතෛර්බාණෛරර්දිතං මර්මභේදිභිඃ ।
රාමේණ න සුඛං ලේභේ ශුෂ්කං වනමිවාග්නිනා ॥ 25 ॥
කේචිද්භීමබලාශ්ශූරාශ්ශූලාන්ඛංගාන්පරශ්වධාන් ।
රාමස්යාභිමුඛං ගත්වා චික්ෂිපුඃ පරමායුධාන් ॥ 26 ॥
තානි බාණෛර්මහාබාහුශ්ශස්ත්රාණ්යාවාර්ය රාඝවඃ ।
ජහාර සමරේ ප්රාණාංශ්චිච්ඡේද ච ශිරෝධරාන් ॥ 27 ॥
තේ ඡින්නශිරසඃ පේතුශ්චින්නවර්මශරාසනාඃ ।
සුපර්ණවාතවික්ෂිප්තා ජගත්යාං පාදපා යථා ॥ 28 ॥
අවශිෂ්ටාශ්ච යේ තත්ර විෂණ්ණාශ්ච නිශාචරාඃ ।
ඛරමේවාභ්යධාවංත ශරණාර්ථං ශරාර්දිතාඃ ॥ 29 ॥
තාන්සර්වාන්පුනරාදාය සමාශ්වාස්ය ච දූෂණඃ ।
අභ්යධාවත කාකුත්ස්ථං ක්රුද්ධෝ රුද්රමිවාංතකඃ ॥ 30 ॥
නිවෘත්තාස්තු පුනස්සර්වේ දූෂණාශ්රයනිර්භයාඃ ।
රාමමේවාභ්යධාවංත සාලතාලශිලායුධාඃ ॥ 31 ॥
ශූලමුද්ගරහස්තාශ්ච චාපහස්තා මහාබලාඃ ।
සෘජංතශ්ශරවර්ෂාණි ශස්ත්රවර්ෂාණි සංයුගේ ॥ 32 ॥
ද්රුමවර්ෂාණි මුංචංතශ්ශිලාවර්ෂාණි රාක්ෂසාඃ ।
තද්බභූවාද්භුතං යුද්ධං තුමුලං රෝමහර්ෂණම් ।
රාමස්ය ච මහාඝෝරං පුනස්තේෂාං ච රක්ෂසාම් ॥ 33 ॥
තේ සමංතාදතික්රුද්ධා රාඝවං පුනරභ්යයුඃ ॥ 34 ॥
තෛශ්ච සර්වා දිශෝ දෘෂ්ට්වා ප්රදිශශ්ච සමාවෘතාඃ ।
රාක්ෂසෛරුද්යතප්රාසෛශ්ශරවර්ෂාභිවර්ෂිභිඃ ॥ 35 ॥
ස කෘත්වා භෛරවං නාදමස්ත්රං පරමභාස්වරම් ।
සංයෝජයත ගාංධර්වං රාක්ෂසේෂු මහාබලඃ ॥ 36 ॥
තතශ්ශරසහස්රාණි නිර්යයුශ්චාපමංඩලාත් ।
සර්වා දශ දිශෝ බාණෛරාවාර්යංත සමාගතෛඃ ॥ 37 ॥
නාදදානං ශරාන්ඝෝරාන්නමුංචංතං ශිලීමුඛාන් ।
විකර්ෂමාණං පශ්යංති රාක්ෂසාස්තේ ශරාර්දිතාඃ ॥ 38 ॥
ශරාංධකාරමාකාශමාවෘණෝත්සදිවාකරම් ।
බභූවාවස්ථිතෝ රාමඃ ප්රවමන්නිව තාංඡරාන් ॥ 39 ॥
යුගපත්පතමානෛශ්ච යුගපච්ච හතෛර්භෘශම් ।
යුගපත්පතිතෛශ්චෛව විකීර්ණා වසුධා භවත් ॥ 40 ॥
නිහතාඃ පතිතාඃ ක්ෂීණාශ්ඡින්නා භින්නා විදාරිතාඃ ।
තත්ර තත්ර ස්ම දෘශ්යංතේ රාක්ෂසාස්තේ සහස්රශඃ ॥ 41 ॥
සෝෂ්ණීෂෛරුත්තමාංගෛශ්ච සාංගදෛර්බාහුභිස්තථා ।
ඌරුභිර්ජානුභිශ්ඡින්නෛර්නානාරූපෛවිභූෂණෛඃ ॥ 42 ॥
හයෛශ්ච ද්විපමුඛ්යෛශ්ච රථෛර්භින්නෛරනේකශඃ ।
චාමරෛර්ව්යජනෛශ්ඡත්රෛර්ධ්වජෛර්නානාවිධෛරපි ॥ 43 ॥
රාමස්ය බාණාභිහතෛර්විචිත්රෛශ්ශූලපට්ටිසෛඃ ।
ඛංගෛ ඛංඩීකෘතෛඃ ප්රාසෛර්විකීර්ණෛශ්ච පරශ්වධෛඃ ॥ 44 ॥
චූර්ණිතාභිශ්ශිලාභිශ්ච ශරෛශ්චිත්රෛරනේකශඃ ।
විච්ඡින්නෛස්සමරේ භූමිර්විකීර්ණාऽභූද්භයංකරා ॥ 45 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ පංචවිංශස්සර්ගඃ ॥
