ශ්රීමද්වාල්මීකීය රාමායණේ කිෂ්කිංධාකාංඩම් ।
අථ චතුස්ත්රිංශස්සර්ගඃ ।
තමප්රතිහතං ක්රුද්ධං ප්රවිෂ්ටං පුරුෂර්ෂභම් ।
සුග්රීවෝ ලක්ෂ්මණං දෘෂ්ට්වා බභූව ව්යථිතේංද්රියඃ ॥ 1 ॥
ක්රුද්ධං නිශ්ශ්වසමානං තං ප්රදීප්තමිව තේජසා ।
භ්රාතුර්ව්යසනසංතප්තං දෘෂ්ට්වා දශරථාත්මජම් ॥ 2 ॥
උත්පපාත හරිශ්රේෂ්ඨෝ හිත්වා සෞවර්ණමාසනම් ।
මහාන්මහේංද්රස්ය යථා ස්වලංකෘත ඉව ධ්වජඃ ॥ 3 ॥
උත්පතංතමනූත්පේතූ රුමාප්රභෘතයඃ ස්ත්රියඃ ।
සුග්රීවං ගගනේ පූර්ණචංද්රං තාරාගණා ඉව ॥ 4 ॥
සංරක්තනයනඃ ශ්රීමාන්විචචාල කෘතාංජලිඃ ।
බභූවාවස්ථිතස්තත්ර කල්පවෘක්ෂෝ මහානිව ॥ 5 ॥
රුමාද්විතීයං සුග්රීවං නාරීමධ්යගතං ස්ථිතම් ।
අබ්රවීල්ලක්ෂ්මණඃ ක්රුද්ධස්සතාරං ශශිනං යථා ॥ 6 ॥
සත්ත්වාභිජනසංපන්නස්සානුක්රෝශෝ ජිතේංද්රියඃ ।
කෘතජ්ඤස්සත්යවාදී ච රාජා ලෝකේ මහීයතේ ॥ 7 ॥
යස්තු රාජා ස්ථිතෝऽධර්මේ මිත්රාණාමුපකාරිණාම් ।
මිථ්යා ප්රතිජ්ඤාං කුරුතේ කෝ නෘශංසතරස්තතඃ ॥ 8 ॥
ශතමශ්වානෘතේ හංති සහස්රං තු ගවානෘතේ ।
ආත්මානං ස්වජනං හංති පුරුෂඃ පුරුෂානෘතේ ॥ 9 ॥
පූර්වං කෘතාර්ථෝ මිත්රාණාං න තත්ප්රතිකරෝති යඃ ।
කෘතඝ්නස්සර්වභූතානාං ස වධ්යඃ ප්ලවගේශ්වර ॥ 10 ॥
ගීතෝऽයං බ්රහ්මණා ශ්ලෝක ස්සර්වලෝකනමස්කෘතඃ ।
දෘෂ්ට්වා කෘතඝ්නං ක්රුද්ධේන තන්නිබෝධ ප්ලවංගම ॥ 11 ॥
බ්රහ්මඝ්නේ ච සුරාපේ ච චෝරේ භග්නව්රතේ තථා ।
නිෂ්කෘතිර්විහිතා සද්භිඃ කෘතඝ්නේ නාස්ති නිෂ්කෘතිඃ ॥ 12 ॥
අනාර්යස්ත්වං කෘතඝ්නශ්ච මිථ්යාවාදී ච වානර ।
පූර්වං කෘතාර්ථෝ රාමස්ය න තත්ප්රතිකරෝෂි යත් ॥ 13 ॥
නනු නාම කෘතාර්ථේන ත්වයා රාමස්ය වානර ।
සීතායා මාර්ගණේ යත්නඃ කර්තව්යඃ කෘතමිච්ඡතා ॥ 14 ॥
ස ත්වං ග්රාම්යේෂු භෝගේෂු සක්තෝ මිථ්යාප්රතිශ්රවඃ ।
න ත්වාං රාමෝ විජානීතේ සර්පං මංඩූකරාවිණම් ॥ 15 ॥
මහාභාගේන රාමේණ පාපඃ කරුණවේදිනා ।
හරීණාං ප්රාපිතෝ රාජ්යං ත්වං දුරාත්මා මහාත්මනා ॥ 16 ॥
කෘතං චේන්නාභිජානීෂේ රාමස්යාක්ලිෂ්ටකර්මණඃ ।
සද්යස්ත්වං නිශිතෛර්භාවාර්හතෝ ද්රක්ෂ්යසි වාලිනම් ॥ 17 ॥
න ච සංකුචිතඃ පංථා යේන වාලී හතෝ ගතඃ ।
සමයේ තිෂ්ඨ සුග්රීව මා වාලිපථමන්වගාඃ ॥ 18 ॥
න නූනමික්ෂ්වාකුවරස්ය කාර්මුක ච්යුතාන් ශරාන්පශ්යසි වජ්ර සන්නිභාන් ।
තත ස්සුඛං නාම නිෂේවසේ සුඛී ।
න රාමකාර්යං මනසාऽප්යවේක්ෂසේ ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ චතුස්ත්රිංශස්සර්ගඃ ॥
