ශ්රීමද්වාල්මීකීය රාමායණේ සුංදරකාංඩම් ।
අථ ඒකෂෂ්ටිතමස්සර්ගඃ ।
තතෝ ජාංබවතෝ වාක්යමගෘහ්ණංත වනෞකසඃ ।
අංගදප්රමුඛා වීරා හනුමාංශ්ච මහාකපිඃ ॥ 1 ॥
ප්රීතිමංතස්තතඃ සර්වේ වායුපුත්රපරස්පරාඃ ।
මහේංද්රාද්රිං පරිත්යජ්ය පුප්ලුවුඃ ප්ලවගර්ෂභාඃ ॥ 2 ॥
මේරුමංදරසංකාශා මත්තා ඉව මහාගජාඃ ।
ඡාදයංත ඉවාකාශං මහාකායා මහාබලාඃ ॥ 3 ॥
සභාජ්යමානං භූතෛස්තමාත්මවංතං මහාබලම් ।
හනූමංතං මහාවේගං වහංත ඉව දෘෂ්ටිභිඃ ॥ 4 ॥
රාඝවේ චාර්ථනිර්වවෘත්තිං කර්තුං ච පරමං යශඃ ।
සමාධාය සමෘද්ධාර්ථාඃ සර්වේසිද්ධිභිරුන්නතා ॥ 5 ॥
ප්රියාඛ්යානෝන්මුඛාඃ සර්වේ සර්වේ යුද්ධාභිනංදිනඃ ।
සර්වේ රාමප්රතීකාරේ නිශ්චිතාර්ථා මනස්ස්විනඃ ॥ 6 ॥
ප්ලවමානාඃ ඛමාප්ලුත්ය තතස්තේ කානනෞකසඃ ।
නංදනෝපමයාසේදුර්වනං ද්රුමලතායුතම් ॥ 7 ॥
යත්තන්මධුවනං නාම සුග්රීවස්යාභිරක්ෂිතම් ।
අධෘෂ්යං සර්වභූතානාං සර්වභූතමනෝහරම් ॥ 8 ॥
යද්රක්ෂති මහාවීර්ය ස්සදා දධිමුඛඃ කපිඃ ।
මාතුලඃ කපිමුඛ්යස්ය සුග්රීවස්ය මහාත්මනඃ ॥ 9 ॥
තේ තද්වනමුපාගම්ය බභූවුඃ පරමෝත්කටාඃ ।
වානරා වානරේංද්රස්ය මනඃ කාංතතමං මහත් ॥ 10 ॥
තතස්තේ වානරා හෘෂ්ටා දෘෂ්ටවා මධුවනං මහත් ।
කුමාරමභ්යයාචංත මධූනි මධුපිංගලාඃ ॥ 11 ॥
තතඃ කුමාරස්තාන් වෘද්ධාන් ජාංබවත්ප්රමුඛාන් කපීන් ।
අනුමාන්ය දදෞ තේෂාං විසර්ගං මධුභික්ෂණේ ॥ 12 ॥
තතශ්චානුමතා ස්සර්වේ සංප්රහෘෂ්ටා වනෞකසඃ ।
මුදිතාඃ ප්රේරිතාශ්චාපි ප්රනෘත්යංතෝऽභවංස්තදා ॥ 13 ॥
ගායංති කේචිත්ප්රණමංති කේචින්නෘත්යංති කේචිත්ප්රහසංති කේචිත් ।
පතංති කේචිද්විචරංති කේචිත්ල්පවංති කේචිත්ප්රලපංති කේචිත් ॥ 14 ॥
පරස්පරං කේචිදුපාශ්රයංතේ පරස්පරං කේචිදුපාක්රමංතේ ।
පරස්පරං කේචිදුපබ්රුවංතේ පරස්පරං කේචිදුපාරමංතේ ॥ 15 ॥
ද්රුමාද්ද්රුමං කේචිදභිද්රවංතේ ක්ෂිතෞ නගාග්රාන්නිපතංති කේචිත් ।
මහීතලාත්කේචිදුදීර්ණවේගා මහාද්රුමාග්රාණ්යභිසංපතංති ॥ 16 ॥
ගායංතමන්යඃ ප්රහසන්නුපෛති හසංතමන්යඃ ප්රරුදන්නුපෛති ।
රුදංතමන්යඃ ප්රණුදන්නුපෛති නුදංතමන්යඃ ප්රණදන්නුපෛති ॥ 17 ॥
සමාකුලං තත්කපිසෛන්යමාසීන්මධුප්රසානෝත්කටසත්ත්වචේෂ්ටම් ।
න චාත්ර කශ්චින්න බභූව මත්තෝ න චාත්ර කශ්චින්න බභූව තෘප්තඃ ॥ 18 ॥
තතෝ වනං තත්පරිභක්ෂ්යමාණං ද්රුමාංශ්ච විධ්වංසිතපත්රපුෂ්පාන් ।
සමීක්ෂ්ය කෝපාද්ධධිවක්රනාමා නිවාරයාමාස කපිඃ කපීංස්තාන් ॥ 19 ॥
ස තෛඃ ප්රවෘද්ධෛඃ පරිභර්ත්ස්යමානෝ වනස්ය ගෝප්තා හරිවීරවෘද්ධඃ ।
චකාර භූයෝ මතිමුග්රතේජා වනස්ය රක්ෂාං ප්රති වානරේභ්යඃ ॥ 20 ॥
උවාච කාංශ්චිත්පරුෂාණි ධෘෂ්ටමසක්තමන්යාංශ්ච තලෛර්ජඝාන ।
සමේත්ය කෛශ්චිත්කලහං චකාර තථෛව සාම්නෝපජගාම කාංශ්චිත් ॥ 21 ॥
ස තෛර්මදාත්සංපරිවාර්ය වාක්යෛර්භලාච්ඡ තේන ප්රතිවාර්යමාණෛඃ ।
ප්රධර්ෂිතස්ත්යක්තභයෛ ස්සමේත්ය ප්රකෘෂ්යතේ චාප්යනවේක්ෂ්ය දෝෂම් ॥ 22 ॥
නඛෛස්තුදංතෝ දශනෛර්දශංත ස්තලෛශ්ච පාදෛශ්ච සමාපයංතඃ ।
මදාත්කපිං තං කපය ස්සමග්රා මහාවනං නිර්විෂයං ච චක්රුඃ ॥ 23 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ඒකෂෂ්ටිතමස්සර්ගඃ ॥
