ශ්රීමද්වාල්මීකීය රාමායණේ සුංදරකාංඩම් ।
අථ ෂට්ෂෂ්ටිතමස්සර්ගඃ ।
ඒවමුක්තෝ හනුමතා රාමෝ දශරථාත්මජඃ ।
තං මණිං හෘදයේ කෘත්වා ප්රරුරෝද සලක්ෂ්මණඃ ॥ 1 ॥
තං තු දෘෂ්ට්වා මණිශ්රේෂ්ඨං රාඝව ශ්ශෝකකර්ශිතඃ ।
නේත්රාභ්යාමශ්රුපූර්ණාභ්යාං සුග්රීවමිදමබ්රවීත් ॥ 2 ॥
යථෛව ධේනු ස්ස්රවති ස්නේහාද්වත්සස්ය වත්සලා ।
තථා මමාපි හෘදයං මණිරත්නස්ය දර්ශනාත් ॥ 3 ॥
මණිරත්නමිදං දත්තං වෛදේහ්යාශ්ශ්වශුරේණ මේ ।
වධූකාලේ යථාබද්ධමධිකං මූර්ධ්නි ශෝභතේ ॥ 4 ॥
අයං හි ජලසංභූතෝ මණිස්සජ්ජනපූජිතඃ ।
යජ්ඤේ පරමතුෂ්ටේන දත්තශ්ශක්රේණ ධීමතා ॥ 5 ॥
ඉමං දෘෂ්ට්වා මණිශ්රේෂ්ඨං යථා තාතස්ය දර්ශනම් ।
අද්යාස්ම්යවගතස්සෞම්ය වෛදේහස්ය තථා විභෝඃ ॥ 6 ॥
අයං හි ශෝභතේ තස්යාඃ ප්රියායා මූර්ධ්නි මේ මණිඃ ।
අස්යාද්ය දර්ශනේ නාහං ප්රාප්තාං තාමිව චිංතයේ ॥ 7 ॥
කිමාහ සීතා වෛදේහී බ්රූහි සෞම්ය පුනඃ පුනඃ ।
පිපාසුමිව තෝයේන සිංචංතී වාක්යවාරිණා ॥ 8 ॥
ඉතස්තු කිං දුඃඛතරං යදිමං වාරිසංභවම් ।
මණිං පශ්යාමි සෞමිත්රේ වෛදේහීමාගතාං විනා ॥ 9 ॥
චිරං ජීවති වෛදේහී යදි මාසං ධරිෂ්යති ।
ක්ෂණං සෞම්ය න ජීවේයං විනා තාමසිතේක්ෂණාම් ॥ 10 ॥
නය මාමපි තං දේශං යත්ර දෘෂ්ටා මම ප්රියා ।
න තිෂ්ඨේයං ක්ෂණමපි ප්රවෘත්තිමුපලභ්ය ච ॥ 11 ॥
කථං සා මම සුශ්රෝණී භීරුභීරු ස්සතී සදා ।
භයාවහානාං ඝෝරාණාං මධ්යේ තිෂ්ඨති රක්ෂසාම් ॥ 12 ॥
ශාරද ස්තිමිරෝන්මුක්තෝ නූනං චංද්රං ඉවාංබුධෛඃ ।
ආවෘතං වදනං තස්යා න විරාජති රාක්ෂසෛඃ ॥ 13 ॥
කිමාහ සීතා හනුමංස්තත්ත්වතඃ කථයාද්ය මේ ।
ඒතේන ඛලු ජීවිෂ්යේ භේෂජේනාතුරෝ යථා ॥ 14 ॥
මධුරා මධුරාලාපා කිමාහ මම භාමිනී ।
මද්විහීනා වරාරෝහා හනුමන් කථයස්ව මේ ॥ 15 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ෂට්ෂෂ්ටිතමස්සර්ගඃ ॥
