ශ්රීමද්වාල්මීකීය රාමායණේ අයෝධ්යාකාංඩම් ।
අථ දශමස්සර්ගඃ ।
විදර්ශිතා යදා දේවී කුබ්ජයා පාපයා භෘශම් ।
තදා ශේතේ ස්ම සා භූමෞ දිග්ධවිද්ධේව කින්නරී ॥ 1 ॥
නිශ්චිත්ය මනසා කෘත්යං සා සම්යගිති භාමිනී ।
මංථරායෛ ශනෛස්සර්වමාචචක්ෂේ විචක්ෂණා ॥ 2 ॥
සා දීනා නිශ්චයං කෘත්වා මංථරාවාක්යමෝහිතා ।
නාගකන්යේව නිශ්වස්ය දීර්ඝමුෂ්ණං ච භාමිනී ॥ 3 ॥
මුහූර්තං චිංතයාමාස මාර්ගමාත්මසුඛාවහම් ।
සා සුහෘච්චාර්ථකාමා ච තං නිශම්ය සුනිශ්චයම් ॥ 4 ॥
බභූව පරමප්රීතා සිධ්දිං ප්රාප්යේව මංථරා ।
අථ සා රුෂිතා දේවී සම්යක්කෘත්වා විනිශ්චයම් ॥ 5 ॥
සංවිවේශාබලා භූමෞ නිවේශ්ය භෘකුටීං මුඛේ ।
තතශ්චිත්රාණි මාල්යානි දිව්යාන්යාභරණානි ච ॥ 6 ॥
අපවිද්ධානි කෛකේය්යා තානි භූමිං ප්රපේදිරේ ।
තයා තාන්යපවිද්ධානි මාල්යාන්යාභරණානි ච ॥ 7 ॥
අශෝභයංත වසුධාං නක්ෂත්රාණි යථා නභඃ ।
ක්රෝධාගාරේ නිපතිතා සා බභෞ මලිනාංබරා ॥ 8 ॥
ඒකවේණීං දෘඪං බද්වා ගතසත්ත්වේව කින්නරී ।
ආජ්ඤාප්ය ච මහාරාජෝ රාඝවස්යාභිෂේචනම් ॥ 9 ॥
උපස්ථානමනුජ්ඤාප්ය ප්රවිවේශ නිවේශනම් ।
අද්ය රාමාභිෂේකෝ වෛ ප්රසිද්ධ ඉති ජජ්ඤිවාන් ॥ 10 ॥
ප්රියාර්හාං ප්රියමාඛ්යාතුං විවේශාංතඃපුරං වශී ।
ස කෛකේය්යා ගෘහං ශ්රේෂ්ඨං ප්රවිවේශ මහායශාඃ ॥ 11 ॥
පාංඩුරාභ්රමිවාකාශං රාහුයුක්තං නිශාකරඃ ।
ශුකබර්හිණසංඝුෂ්ටං ක්රෞංචහංසරුතායුතම් ॥ 12 ॥
වාදිත්රරවසංඝුෂ්ටං කුබ්ජා වාමනිකායුතම් ।
ලතාගෘහෛශ්චිත්රගෘහෛශ්චංපකාශෝකශෝභිතෛඃ ॥ 13 ॥
දාංතරාජතසෞවර්ණවේදිකාභි ස්සමායුතම් ।
නිත්යපුෂ්පඵලෛර්වෘක්ෂෛර්වාපීභිශ්චෝපශෝභිතම් ॥ 14 ॥
දාංතරජතසෞවර්ණෛස්සංවෘතං පරමාසනෛඃ ।
විවිධෛරන්නපානෛශ්ච භක්ෂ්යෛශ්ච විවිධෛරපි ॥ 15 ॥
උපපන්නං මහාර්හෛශ්ච භූෂිතෛස්ත්රිදිවෝපමම් ।
තත්ප්රවිශ්ය මහාරාජස්ස්වමංතඃ පුරමෘද්ධිමත් ॥ 16 ॥
න දදර්ශ ප්රියාං රාජා කෛකේයීං ශයනෝත්තමේ ।
කාමබලසංයුක්තෝ රත්යර්ථං මනුජාධිපඃ ॥ 17 ॥
අපශ්යංදයිතාං භාර්යාං පප්රච්ඡ විෂසාද ච ।
න හි තස්ය පුරා දේවී තාං වේලාමත්යවර්තත ॥ 18 ॥
න ච රාජා ගෘහං ශූන්යං ප්රවිවේශ කදාචන ।
තතෝ ගෘහගතෝ රාජා කෛකේයීං පර්යපෘච්ඡත ॥ 19 ॥
යථා පූර්වමවිජ්ඤාය ස්වාර්ථලිප්සුමපංඩිතාම් ।
ප්රතීහාරී ත්වථෝවාච සංත්රස්තා සුකෘතාංජලිඃ ॥ 20 ॥
දේව දේවී භෘශං කෘද්ධා ක්රෝධාගාරමභිදෘතා ।
ප්රතීහාර්යා වචශ්ශෘත්වා රාජා පරමදුර්මනාඃ ॥ 21 ॥
විෂසාද පුනර්භූයෝ ලුලිතව්යාකුලේංද්රියඃ ।
තත්ර තාං පතිතාං භූමෞ ශයානාමතථෝචිතාම් ॥ 22 ॥
ප්රතප්ත ඉව දුඃඛේන සෝऽපශ්යජ්ජගතීපතිඃ ।
ස වෘද්ධස්තරුණීං භාර්යාං ප්රාණේභ්යෝපි ගරීයසීම් ॥ 23 ॥
අපාපඃ පාපසංකල්පාං දදර්ශ ධරණීතලේ ।
ලතාමිව විනිෂ්කෘත්තාං පතිතාං දේවතාමිව ॥ 24 ॥
කින්නරීමිව නිර්ධූතාං ච්යුතාමප්සරසං යථා ।
මායාමිව පරිභ්රෂ්ටාං හරිණීමිව සංයතාම් ॥ 25 ॥
කරේණුමිව දිග්ධේන විද්ධාං මෘගයුනා වනේ ।
මහාගජ ඉවාරණ්යේ ස්නේහාත්පරිමමර්ශ තාම් ॥ 26 ॥
පරිමෘශ්ය ච පාණිභ්යාමභිසංත්රස්තචේතනඃ ।
කාමී කමලපත්රාක්ෂීමුවාච වනිතාමිදම් ॥ 27 ॥
න තේऽහමභිජානාමි ක්රෝධමාත්මනි සංශ්රිතම් ।
දේවි කේනාභිශප්තාऽසි කේන වාऽසි විමානිතා ॥ 28 ॥
යදිදං මම දුඃඛාය ශේෂේ කල්යාණි පාංසුෂු ।
භූමෞ ශේෂේ කිමර්ථං ත්වං මයි කල්යාණචේතසි ॥ 29 ॥
භූතෝපහතචිත්තේව මම චිත්තප්රමාථිනී ।
සංති මේ කුශලා වෛද්යාස්ත්වභිතුෂ්ටාශ්ච සර්වශඃ ॥ 30 ॥
සුඛිතාං ත්වාං කරිෂ්යංති ව්යාධිමාචක්ෂ්ව භාමිනී ।
කස්ය වා තේ ප්රියං කාර්යං කේන වා විප්රියං කෘතම් ॥ 31 ॥
කඃ ප්රියං ලභතාමද්ය කෝ වා සුමහදප්රියම් ।
මා රෝදීර්මා ච කාර්ෂීස්ත්වං දේවි සංපරිශෝෂණම් ॥ 32 ॥
අවධ්යෝ වධ්යතාං කෝ වා කෝ වා වධ්යෝ විමුච්යතාම් ।
දරිද්රඃ කෝ භවත්වාඪ්යෝ ද්රව්යවාන්වාऽප්යකිංචනඃ ॥ 33 ॥
අහං චෛව මදීයාශ්ච සර්වේ තව වශානුගාඃ ।
න තේ කිංචිදභිප්රායං ව්යාහංතුමහමුත්සහේ ॥ 34 ॥
ආත්මනෝ ජීවිතේනාපි බ්රූහි යන්මනසේච්ඡසි ।
බලමාත්මනි ජානංතී න මාං ශංකිතුමර්හසි ॥ 35 ॥
කරිෂ්යාමි තව ප්රීතිං සුකෘතේනාපි තේ ශපේ ।
යාවදාවර්තතේ චක්රං තාවතී මේ වසුංධරා ॥ 36 ॥
ප්රාචීනාස්සිංධුසෞවීරා ස්සෞරාෂ්ට්රා දක්ෂිණාපථාඃ ।
වංගාංගමගධාඃ මත්ස්යාඃ සමෘද්ධා කාශිකෝසලාඃ ॥ 37 ॥
තත්ර ජාතං බහු ද්රව්යං ධනධාන්යමජාවිකම් ।
තතෝ වෘණීෂ්ව කෛකේයි යද්යත්ත්වං මනසේච්ඡසි ॥ 38 ॥
කිමායාසේන තේ භීරු උත්තිෂ්ඨෝත්තිෂ්ඨ ශෝභනේ ।
තත්ත්වං මේ බ්රූහි කෛකේයි යතස්තේ භයමාගතම් ॥ 39 ॥
තත්තේ ව්යපනයිෂ්යාමි නීහාරමිව රශ්මිවාන් ।
තථෝක්තා සා සමාශ්වස්තා වක්තුකාමා තදප්රියම් ॥ 40 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ දශමස්සර්ගඃ ॥
