ශ්රීමද්වාල්මීකීය රාමායණේ යුද්ධකාංඩම් ।
අථ ඒකපංචාශස්සර්ගඃ ।
තේෂාංසුතුමුලංශබ්දංවානරාණාංතරස්විනාම් ।
නර්දතාංරාක්ෂසෛස්සාර්ධංතදාශුශ්රාවරාවණඃ ॥ 1 ॥
ස්නිග්ධගංභීරනිර්ඝෝෂංශ්රුත්වාසනිනදංභෘශම් ।
සචිවානාංතතස්තේෂාංමධ්යේවචනමබ්රවීත් ॥ 2 ॥
යථාऽසෞසංප්රහෘෂ්ටානාංවානරාණාංසමුත්ථිතඃ ।
බහූනාංසුමහාන්නාදෝමේඝනාමිවගර්ජිතාම් ॥ 3 ॥
ව්යක්තංසුමහතීප්රීතිරේතේෂාංනාත්රසංශයඃ ।
තථාහිවිපුලෛර්නාදෛශ්චුක්ෂුභේවරුණාලයඃ ॥ 4 ॥
තෞතුබද්ධෞශරෛස්තීක්ෂ්ණෛර්භ්රාතරෞරාමලක්ෂ්මණෞ ।
අයංචසුමහාන්නාදශංකාංජනයතීවමේ ॥ 5 ॥
ඒතත්තුවචනංචෝක්ත්වාමංත්රිණෝරාක්ෂසේශ්වරඃ ।
උවාචනෛරෘතාංස්තත්රසමීපපරිවර්තිනඃ ॥ 6 ॥
ජ්ඤායතාංතූර්ණමේතේෂාංසර්වේෂාංචවනචාරිණාම් ।
ශෝකකාලේසමුත්පන්නහර්ෂකාරණමුත්ථිතම් ॥ 7 ॥
තථෝක්තාස්තේනසංභ්රාංතාඃප්රාකාරමධිරුහ්යච ।
දදෘශුඃපාලිතාංසේනාංසුග්රීවේණමහාත්මනා ॥ 8 ॥
තෞචමුක්තෞසුඝෝරේණශරබංධේනරාඝවෞ ।
සමුත්ථිතෞමහාභාගෞවිෂේදුඃප්රේක්ෂ්යරාක්ෂසාඃ ॥ 9 ॥
සංත්රස්තහෘදයාඃසර්වේප්රාකාරාත් වරුහ්යතේ ।
විෂණ්ණවදනාඝෝරාරාක්ෂසේංද්රමුපස්ථිතා ॥ 10 ॥
තදප්රියංදීනමුඛාරාවණස්යනිශාචරාඃ ।
කෘත්ස්නංනිවේදයාමාසුර්යථාවද්වාක්යකෝවිදාඃ ॥ 11 ॥
යෞතාවිංද්රජිතායුද්ධේභ්රාතරෞරාමලක්ෂ්මණෞ ।
නිබද්ධෞශරබංධේනනිෂ්ප්රකංපභුජෞකෘතෞ ॥ 12 ॥
විමුක්තෞශරබංධේනදෘශ්යේතේතෞරණාජිරේ ।
පාශානිවගජෞඡිත්වාගජේංද්රසමවික්රමෞ ॥ 13 ॥
තච්ඡ්රුත්වාවචනංතේෂාංරාක්ෂසේංද්රෝමහාබලඃ ।
චිංතාරෝෂසමාක්රාංතෝවිෂණ්ණවදනෝऽභවත් ॥ 14 ॥
ඝෝරෛර්දත්තවරෛර්භද්ධෞශරෛරාශීවිෂෝපමෛඃ ।
අමෝඝෛස්සූර්යසංකාශෛඃප්රමථ්යේංද්රජිතායුධි ॥ 15 ॥
තදස්ත්රබංධමාසාද්යයදිමුක්තෞරිපූමම ।
සංශයස්ථමිදංසර්වමනුපශ්යාම්යහංබලම් ॥ 16 ॥
නිෂ්ඵලාඃඛලුසම්වෘත්තාශ්ශරාඃවාසුකිතේජසඃ ।
අදත්තංයෛස්තුසංග්රාමේරිපූණාංජීවිතංමම ॥ 17 ॥
ඒවමුක්ත්වාතුසංක්රුද්ධෝනිශ්ශ්වසන්නුරගෝයථා ।
අබ්රවීද්රක්ෂසාංමධ්යේධූම්රාක්ෂංනාමරාක්ෂසම් ॥ 18 ॥
බලේනමහතායුක්තෝරාක්ෂසෛර්භීමවික්රමඃ ।
ත්වංවධායාභිනිර්යාහිරාමස්යසහවානරෛඃ ॥ 19 ॥
ඒවමුක්තස්තුධූම්රාක්ෂෝරාක්ෂසේංද්රේණධීමතා ।
කෘත්වාප්රණාමංසම්හෘෂ්ටෝනිර්ජගාමනෘපාලයත් ॥ 20 ॥
අභිනිෂ්ක්රම්යතදද්වාරංබලාධ්යක්ෂමුවාචහ ।
ත්වරයස්වබලංතූර්ණංකිංචිරේණයුයුත්සතඃ ॥ 21 ॥
ධූම්රාක්ෂවචනංශ්රුත්වාබලාධ්යක්ෂෝබලානුගඃ ।
බලමුද්යෝජයාමාසරාවණස්යාජ්ඤයාද්රුතම් ॥ 22 ॥
තේබද්ධඝංටාබලිනෝඝෝරරූපානිශාචරාඃ ।
විගර්ජමානාස්සම්හෘෂ්ටාධූම්රාක්ෂංපර්යවාරයන් ॥ 23 ॥
විවිධායුධහස්තාශ්චශූලමුද්ගරපාණයඃ ।
ගදාභිඃපට්ටසෛර්දංඩෛරායසෛර්මුසලෛර්භෘශම් ॥ 24 ॥
පරිඝෛර්භිංඩිවාලෛශ්චභල්ලෛප්රාසෛඃ පරශ්වථෛඃ ।
නිර්යයූරාක්ෂසාදිභ්යෝනර්ධංතෝජලදායථා ॥ 25 ॥
රථෛඃකවචිනස්ත්වන්යේධ්වජෛශ්චසමලංකෘතෛඃ ।
සුවර්ණජාලවිහිතෛඃඛරෛශ්චවිවිධානනෛඃ ॥ 26 ॥
හයෛඃපරමශීඝ්රෛශ්චගජෛශ්චෛවමදෝත්කටෛඃ ।
නිර්යයුර්නෛරෘතව්යාඝ්රාව්යාඝ්රාඉවදුරාසදාඃ ॥ 27 ॥
වෘකසිංහමුඛෛර්යුක්තංඛරෛඃකනකභූෂණෛඃ ।
ආරුරෝහරථංදිව්යංධූම්රාක්ෂඃඛරනිස්ස්වනඃ ॥ 28 ॥
සනිර්යාතෝමහාවීර්යෝධූම්රාක්ෂෝරාක්ෂසෛර්වෘතඃ ।
ප්රහසන්පශ්චිමද්වාරංහනුමාන්යත්රයූථපඃ ॥ 29 ॥
රථප්රවරමාස්ථායඛරයුක්තංඛරස්වනම් ।
ප්රයාංතංතුමහාඝෝරංරාක්ෂසංභීමදර්ශනම් ॥ 30 ॥
අංතරික්ෂගතාඃඝෝරාශකුනාඃප්රත්යෂේධයන් ।
රථශීර්ෂේමහාන්භීමෝගෘධ්රශ්චනිපපාතහ ॥ 31 ॥
ධ්වජාග්රේග්රථිතාශ්චෛවනිපේතුඃකුණපාශනාඃ ।
රුධිරාර්ද්රෝමහාන් ශ්වේතඃකබංධඃපතිතෝභුවි ॥ 32 ॥
විස්වරංචෝත්සෘජන්නාදංධූම්රාක්ෂස්යසමීපතඃ ।
වවර්ෂරුධිරංදේවස්සංචචාලචමේදිනී ॥ 33 ॥
ප්රතිලෝමංවනෞවායුර්නිර්ඝාතසමනිස්වනඃ ।
තිමිරෞඝවෘතාස්තත්රදිශශ්චනචකාශිරේ ॥ 34 ॥
සතූත්පාතාංස්තදාදෘෂ්ටවාරාක්ෂසානාංභයාවහාන් ।
ප්රාදුර්භූතාන්සුඝෝරාංශ්චධූම්රාක්ෂෝව්යථිතෝऽභවත් ॥ 35 ॥
මුමුහූරාක්ෂසාඃසර්වේධූම්රාක්ෂස්යපුරස්සරාඃ ।
තතඃසුභීමෝබහුභිර්නිශාචරෛර්වෘතෝऽභිනිෂ්ක්රම්යරණෝත්සුකෝබලී ।
දදර්ශතාංරාඝවබාහුපාලිතාංමහෞඝකල්පාංබහුවානරීංචමූම් ॥ 36 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ යුද්ධකාංඩේ ඒකපංචාශස්සර්ගඃ ॥
